Read Biatah Bidayuh NAHUM 1 Bible Online

NAHUM 1 - Biatah Bidayuh bible

NAHUM 1

¹ Ati inŭh pinganang pasar Nineveh, adi kidaan pasar kayuh adi dog kiris Nahum keya ka darŭm pŭmŭh; ayŭh anŭ ndi naan daya so Elkosh.

²TUHAN dŭh tandah ani ani adi sitama ngga adŭp-I; Ayŭh ngukum daya adi nyakar adŭp-I. Darŭm baji-I Ayŭh maras dendam di pinganyu-I.

³TUHAN dŭh udah baji, pak Ayŭh bikuasa ka bŭn tandah daya adi sarah dŭh dog ukum. Di yŭn TUHAN panu, sabak ribut makat; Abun inŭh dabu so yŭn kaja-I bidigang!

⁴Ayŭh mritah rawŭt, ka-i makat! Ayŭh bada sungi badŭh. Tarun tana Bashan pisŭk, Darŭd Carmel marui sia, ka bunga bunga Lebanon rayu.

⁵Darŭd darŭd bigagar di sirung jawin TUHAN; sandah sandah riris kan situra ngga Ayŭh. Ong bigugoh kan TUHAN nandŭng; ong ngga sopŭrŭg daya-i kimŭtŭr.

⁶Kan Ayŭh baji, asi tan? Asi dapŭd rupas so bisā baji-I? Ayŭh piruah baji-I keya ka apui adi bijagu; batuh ruruh kan situra ngga Ayŭh.

⁷TUHAN inŭh kana; Ayŭh grindung daya-I di tika pinyusah; Ayŭh kingat ngara adi mandŭg ka Ayŭh.

⁸Keya ka uba bās nyarab, Ayŭh pirarap bara pinganyu-I;[1] Ayŭh siŭ ngara adi nyakar Ayŭh.

⁹Ani pekat ngan rawan TUHAN? Ayŭh re pirabur angān. Mating daya dapŭd nyakar Ayŭh piduwŭh kari.

¹⁰Keya ka randa reja adi bikarut ka mun siriyang adi badŭh, angān pimabuk re dog badang!

¹¹So kuu, Nineveh, mandŭg ndi naan daya adi puno ngga akar arap, adi bipekat rawan TUHAN.

¹²Ati inŭh kayuh adi TUHAN nang di daya-I: “Sunggu daya Assyria bake buang bagŭ, ngara re dog pirabur ka re miyap. Daya Ku, Aku ko bada angān sangsara, pak Aku dŭh re ndai simŭnŭ dinge.

¹³Aku re kadi kuasa Assyria so tunduh angān, ka Aku re matŭd parik basi adi muak angān.”

¹⁴Ati inŭh kayuh adi TUHAN mbŭh miratak pasar daya Assyria: “Ngara re dŭh biyŭn sesang adi re tubu asar ngara. Aku re pirabur tibudo tibudo adi darŭm bari-sambah tapa ngara. Aku mbŭh sidia kubur yŭn bara daya Assyria; ngara dŭh patut udip!”

¹⁵ Tingga, ndi naan pinyisung mandŭg mutas darŭd taban agah kana! Ayŭh mandŭg an kidaan pasar pimanang! Daya Judah, sita gawai gawai ngan ka nggen di Tapa kayuh adi angān mbŭh bipayu an nggen di Ayŭh. Daya ginaka re dŭh tia nyerang angān. Ngara mbŭh dog pirabur!