Read Biatah Bidayuh NAHUM 3 Bible Online

NAHUM 3 - Biatah Bidayuh bible

NAHUM 3

¹Mbŭh payah inŭh kupo adi pingadong ka adi pinyiŭ, puno ngga ratā adi re dog sirapas ka dog ngakut!

²Dingah! Jawŭn padŭs, jawŭn kaja krita kuda, jawŭn kuda bikaduh, jawŭn krita kuda nganing!

³Bara pinunggang kuda nyurong, pedang mikirab, jarok mikirib! Tadang bitugung, adi mbŭh kabŭs dŭh tungang dog mirang, daya sikak-i!

⁴Nineveh adi sundar anŭ dog ukum. Ramus buang puno ngga puge adi bisā, ayŭh muge bangsa bangsa ka piurun[4] ngara.

⁵TUHAN Bisa-pŭrŭg nang, “Aku re ngukum kuu, Nineveh! Aku re bada kuu sitabet ka tandah bangsa bangsa tingga kuu, tingga sopŭrŭg anŭ adi mangŭh mu ngarun.

⁶Ngga Aku kiren munki masam Aku ngamun kuu, Aku taran adām sapok di kuu. Daya re nyitŭrŭng kuu buang triyŭn.

⁷Sopŭrŭg adi tingga kuu re ngundur. Ngara re nang, ‘Nineveh mbŭh rubuh! Agi kah daya masi di ayŭh? Agi kah daya an nyaduh ayŭh?’ ”

⁸Nineveh, kuu rabis kana so Thebes kah, adi sindŭ kupo Egypt? Ayŭh gŭh biyŭn ndi sungi adi grindung-i keya ka sindung; Yang Nile inŭh adi ngibān ayŭh.

⁹Ayŭh mritah Ethiopia ngga Egypt; mating pinyikurang kuasa-i. Libya mbŭh jadi pambit-i.

¹⁰Pak babŭ gŭh daya Thebes dog taran ka rais tami. Di barang sakap aran anak anak ngara dog mukong ndŭg kabŭs. Bara pinguru ngara dog muak ngga parik basi ka dog kutung dupan daya adi nakap ngara.

¹¹Nineveh, kuu gŭh re mabuk. Kuu gŭh re suba pirupas adŭp mu so pinganyu mu.

¹²Sopŭrŭg kuta mu re keya ka tŭngŭn ara adi mbŭh masak buwa-i: ngugoh tŭngŭn-i, ka buwa-i rabu ka darŭm baba mu!

¹³Bara soldadu mu keya ka bara dayung, ka rais mu rapā yŭn dog nyerang pinganyu. Apui re badang parang parang tiban mu.

¹⁴Nambah piin yŭn pakai di tipuh kuu dog nyikapung, ka nagap kuta mu! Kunyak meh tana-riyat ngga ndai batuh batā, ka sidia meh suan-i!

¹⁵Ani ani adi kuu ndai re dŭh biyŭn rati, amai kuu babŭ gŭh re dog badang ndŭg ka kabŭs bait dog siŭ darŭm bisaad. Kuu re miyap keya ka buwa pimuruh dog man dudu kadis. Kuu papah mun kadis!

¹⁶Daya dagang mu rabis bagŭ so bitang di rangit! Pak madin ngara mbŭh mating, keya ka kadis murai urad-i ka mikabur bu.

¹⁷Bara pinurung mu keya ka dudu kadis adi bisukan di sindung di tika andu madud. Pak kan batŭh andu tatŭng, ngara mikabur bu, ka mating daya puan kamaki-i bu!

¹⁸Raja-empaya Assyria, bara pimritah mu mbŭh kabŭs, ka bara daya bās mu mbŭh bŭŭs adu adu! daya mu mbŭh mingare di arong darŭd, ka mating daya re tia taban ngara ngga mari.

¹⁹Kuu biragan ka dŭh dapŭd dog nguri, tawan mu dŭh dapŭd bua. Sopŭrŭg daya adi dingah agah pasar pinyirusag mu nupap tangan amai gaŭn. Agi kah daya tungang pirupas adŭp-i so gaok mu?