Read Biatah Bidayuh HABAKKUK 3 Bible Online

HABAKKUK 3 - Biatah Bidayuh bible

HABAKKUK 3

¹Ati inŭh dua nabi Habakkuk:[7]

²O TUHAN, aku mbŭh dingah pasar kayuh adi Kaam mbŭh ndai, ka aku angan-i. Madin ndai dinge di jaman ati pingandai bās adi Kaam ari ndai. Masi di kieh, bait-i di tika Kaam baji.

³Tapa mandŭg dinge so Edom; Tapa adi kudus mandŭg so sandah sandah Paran. Bragah-I nutu rangit; ka ong puno ngga puji yŭn-I.

⁴Ayŭh mandŭg ngga jawa kijat; jawa nyekar so tangan-I, diginŭ di yŭn kuasa-I dog sukan.

⁵Ayŭh pait andam diŭ so adŭp-I ka pesan pinyikabŭs bada tunda adŭp-I.

⁶Kan Ayŭh rŭŭ, ong bigugoh; bangsa bangsa kimŭtŭr kan Ayŭh kimat. Darŭd adi tan tui mbŭh asur; sandah adi tan tui mbŭh timŭtŭm, sandah di yŭn-I panu di jaman jah.

⁷Aku kiris daya Cushan taru ka daya Midian kimŭtŭr.

⁸Sungi kah adi bada Kaam baji TUHAN? Rawŭt kah adi bada Kaam bangok? Kaam nunggang abun; krita kuda Mai inŭh abun sabak-ribut, darŭm Kaam taban pimanang ka daya Mai.

⁹Kaam mbŭh sidia re pakai bawŭh Mai, sidia re nimbak reja-panah.[8] Kijat Mai mire ong.

¹⁰Kan darŭd darŭd kiris Kaam, ngara kimŭtŭr; ujen rabu so rangit. Piin di ribo tana magā, ka girumbang-i raru bigatung.

¹¹Kan kirab reja-panah Mai adi raju mikabur ka jarok Mai adi mikirib, batŭh andu ngga buran rŭŭ panu.

¹²Kaam panu mutas ong darŭm baji; ngga bangok Mai Kaam digang bangsa bangsa.

¹³Kaam ruah di nyiramat daya Mai, di nyiramat raja adi Kaam mbŭh mien. Kaam pirabu pinguru daya ginaka ka pirarap bara pinunda-i.[9]

¹⁴Reja-panah Mai tabŭk pingibās tibaran bara soldadu-i, kan ngara mandŭg mun sabak ribut di mesak kieh, gaŭn mun daya adi bisukan kinanyuh daya sirata.[10]

¹⁵Kaam bidigang di rawŭt ngga kuda kuda Mai, ka piin bās anŭ bibude.

¹⁶Aku dingah sopŭrŭg-i, ka atin ku simadup; bibis ku kimŭtŭr amai taru. Pŭrŭng ganan ku ramah, ka kaja ku sikak[11] darŭm aku panu. Aku re kajŭn andu anŭ mandŭg adi ngga Tapa ngukum ngara adi nyerang ata.

¹⁷Sunggu tŭngŭn ara dŭh biyŭn buwa ka tŭngŭn anggor dŭh buān, sunggu tŭngŭn kanā dŭh biyŭn buwa ka ŭmŭh dŭh piruah gandom, sunggu biri abo kabŭs ka kandang sapi engan,

¹⁸aku babŭ gŭh re gaŭn ka sanang asŭng, sabab TUHAN Tapa inŭh pinyikudip ku.

¹⁹ TUHAN Raja nggen di aku pinyibake. Ayŭh bada kaja ku bake mun kaja peyu, ka bada aku siramat di darŭd.