Read Biatah Bidayuh ZEPHANIAH 1 Bible Online

ZEPHANIAH 1 - Biatah Bidayuh bible

ZEPHANIAH 1

¹ Ati inŭh pinganang adi TUHAN nggen di Zephaniah di jaman Josiah anak Amon jadi raja Judah. (Zephaniah inŭh sesang Raja Hezekiah so ka Amariah, Gedaliah, ka Cushi.)

²TUHAN nang, “Aku re pirusak sopŭrŭg kayuh di ong,

³sopŭrŭg manusia ngga dāng dāng, manuk ka iken. Aku re pirabu[1] daya adi ginaka. Aku re pirabur sopŭrŭg bangsa manusia, ka mating daya re udip. Aku, adi TUHAN, mbŭh minyu.

⁴“Aku re ngukum daya Jerusalem ka simŭnŭ gŭh sopŭrŭg daya Judah. Aku re pirabur sikasŭn arok arok sambah Baal diginŭ, isa daya dŭh ingat imam imam adi ko bituan di Baal.

⁵Aku re pirabur tadŭ tadŭ daya adi maad ka tibung ramin ka nyambah batŭh andu, buran, ka bitang bitang. Aku gŭh re pirabur daya adi nyambah Aku ka bipayu an tŭtŭd di Aku, pak komŭnŭ bipayu ngga dŭn tapa Molech.

⁶Aku re pirabur daya adi tagan Aku ka adi dŭh tia tunda Aku, daya adi dŭh mandŭg ka Aku bait kah mite pinyiruton so Aku.”

⁷Andu mbŭh sindŭk adi ngga TUHAN re guru nggen bisara; jadi pajam meh di sirung jawin-I. TUHAN mbŭh sidia re nyadis daya-I ka mbŭh bagan bara pinganyu bada pirinda Judah.

⁸“Di andu daya Ku dog siŭ anŭ,” nang TUHAN, “Aku re ngukum bara pinurung pritah, anak anak raja, ka sopŭrŭg daya adi tunda adat tami.

⁹Aku re ngukum sopŭrŭg daya adi nyambah mun daya so adat karŭm ka adi naku ka adi siŭ ngga ngisi ramin tuan ngara[2] ngga kayuh sirapas.

¹⁰“Di andu anŭ,” nang TUHAN, “angān re dingah daya sien di Tiban Iken di Jerusalem. Angān re dingah sien adi bana di parad kupo anŭ adi bauh ka jawŭn bana kayuh nyirasas di sandah.

¹¹Nyirais ka sien kan angān dingah kayuh anŭ, angān adi rŭŭ di parad kupo adi rapat, sabab sopŭrŭg daya dagang mbŭh kabŭs!

¹²“Di tika anŭ Aku re tambit prita ka nyiru Jerusalem. Aku re ngukum daya adi mbŭh puas ka adi dŭh gapang, adi nang dupan adŭp ngara, ‘TUHAN dŭh re ndai ani ani, simuti bait simŭnŭ.’

¹³Pinyikaya ngara re dog sirapas ka ramin ramin ngara re dog pirabur. Ngara re dŭh rŭŭ di ramin adi ngara pijog bait nok wain so teya anggor adi ngara ndai.”

¹⁴Andu bās TUHAN mbŭh sindŭk; raru sindŭk buang rikas! Anŭ inŭh andu adi raru bisā, sirabi ka[3] bara soldadu adi siabo pagan re nyirais gŭh darŭm taru!

¹⁵Anŭ re andu magā, andu pinyusah ngga andu pito, andu pinyirubuh ngga andu pinyirusag, andu karŭm ngga andu adi nyabūk, andu adi karŭm patŭ' ka kruman,

¹⁶andu adi puno ngga jawŭn trompet perang ka ngāb bara soldadu nyerang kuta kuta kupo ka tawā tawā adi bigatung.

¹⁷TUHAN nang, “Aku re taban pinyirusag anŭ bada nyatŭk manusia, ndŭg ka barang naan daya re panu kāp tarun mun daya karak. Ngara mbŭh bidosa rawan Aku, ka madin deya ngara re babas mun piin, ka tadang ngara re prigure di tunduh tana, madam.”

¹⁸Di andu adi ngga TUHAN kiren baji-I, sopŭrŭg pirak ngga mas ngara dŭh gŭh re tungang pirupas ngara. Ndi ong ong re dog pirabur ngga apui baji-I. Ayŭh re nyirŭgŭh bada mungan barang naan daya adi udip di ong.