Read Biatah Bidayuh ZEPHANIAH 3 Bible Online

ZEPHANIAH 3 - Biatah Bidayuh bible

ZEPHANIAH 3

¹Mbŭh payah inŭh Jerusalem, adi raru arap, kupo adi an birawan ka adi kinanyuh daya adŭp-i.

²Kupo anŭ abah dingah pinganang pitayan TUHAN bait tunda ajar-I. Kupo anŭ abah na pinyabah-i di TUHAN bait mite turung so Ayŭh.

³Bara pingibās-i mbŭh keya ka singah ngŭr; bara akim-i mbŭh keya ka kasong tarun adi sibŭrŭk, raru pirusong ndŭg ka abah kidŭm ndi apŭg turang yŭn isan isan andu sipagi.

⁴Bara nabi dŭh an dapu tanggong di kayuh ka dŭh dapŭd dog sabah; bara imam nyembar kayuh adi kudus, ka nikok ukum-adat Tapa yŭn guna adŭp ngara.

⁵Pak TUHAN babŭ darŭm kupo anŭ; Ayŭh ndai kayuh adi batur ka bŭn-i kayuh adi sarah. Barang isan Ayŭh natu adŭp-I pimanu pinyitŭnggŭn yŭn daya-I. Pak daya adi dŭh tŭnggŭn diginŭ ngandŭ ndai sarah ka dŭh biyŭn mangŭh.

⁶TUHAN nang, “Aku mbŭh kinanyap bagŭ bangsa; Aku mbŭh pirabur kupo kupo ngara ka bada sindung ngga tawā-i rubuh. Kupo kupo mbŭh dog tagan; aran aran mbŭh mating daya dieh; mating daya rŭŭ diginŭ tia.

⁷Aku pikir mbŭh tatu meh daya Ku raan pari stabi di Aku ka trima ajar Ku, ka ngara dŭh re kambŭt[6] kayuh adi Aku ngajar di ngara. Pak urah arap ngara rikas pari mun adi mbŭh.

⁸“Kajŭn adŭ,” TUHAN nang, “Kajŭn andu anŭ adi ngga Aku makat ka nyarah bangsa bangsa. Aku mbŭh ndai pikir Ku an nguruk bangsa bangsa ngga pritah pritah, isa Aku bisa bada ngara kinyam bisā baji Ku. Ndi ong ong re dog pirabur ngga apui baji Ku.

⁹“Komŭnŭ Aku re ngubah atin bangsa bangsa anŭ, ka ngara re bidua ka Aku sadi adŭ ka dŭh ka tapa tapa bŭkŭn. Sopŭrŭg ngara re nundok di Aku.

¹⁰Jeh so Ethiopia adi jo, daya Ku adi papar sasah re taban sadis ka Aku.

¹¹Di tika anŭ angān, adi daya Ku, re dŭhsah tia mangŭh ngarun adŭp ngan ko rawan Aku. Aku re kadi daya adi sambuh buang gambung, ka angān re dŭh tia rawan Aku di sandah kudus[7] Ku.

¹²Aku re tandah diginŭ daya adi pirapat adŭp-i ngga ngara adi dog ngamun, adi re mandŭg ka Aku mite turung.

¹³ Daya Israel adi babŭ udip re dŭh ndai sarah di daya, kadong daya, bait suba an nipu daya. Ngara re udip mujur ka bamai, ka dŭh taru daya.”

¹⁴Biragu ka nyirais amai gaŭn, daya Israel! Pawŭn ngga siabo atin mu, Jerusalem!

¹⁵TUHAN mbŭh ko ngukum kuu; Ayŭh mbŭh pibu sopŭrŭg pinganyu mu. TUHAN, adi raja Israel, agi ngga kuu; kuu dŭhsah tia taru madin.

¹⁶Tika-i re mandŭg adi ngga daya re nang di Jerusalem, “Kupo Zion, dŭhnyah taru! dŭhnyah ramah!

¹⁷TUHAN adi Tapa mu agi ngga kuu; kuasa-I nggen pimanang di kuu. TUHAN re pawŭn ka gaŭn sabab kuu. ka ngga pinyirindu-I Ayŭh re nggen udip bauh di kuu.[8] Ayŭh re biragu ka gaŭn sabab kuu,

¹⁸gaŭn mun daya di tika gawai.” TUHAN nang, “Aku re dŭh tia bada kuu dog nyatŭk pinyirusag ka re dŭh tia tandah kuu dog pimangŭh.[9]

¹⁹Tika-i re mandŭg! Aku re ngukum ngara adi kinanyuh kuu; Aku re nyiramat sopŭrŭg adi bajang ka taban pari ngara adi dog taran ka rais tami. Aku re bada daya stabi di ngara, ka di ndi ong ong daya re muji ngara.

²⁰Tika-i re mandŭg! Aku re taban mari daya mu adi papar sasah; Aku re bada kuu timagah di ndi ong ong ka bada kuu udip mujur dinge.” TUHAN mbŭh minyu.