Read Biatah Bidayuh HAGGAI 1 Bible Online

HAGGAI 1 - Biatah Bidayuh bible

HAGGAI 1

¹ Darŭm sawa adi duwŭh Darius jadi raja-empaya Persia, dog ngga andu adi ndi darŭm buran nŭm, TUHAN minyu so baba nabi Haggai. Pinganang anŭ yŭn Zerubbabel anak Shealtiel adi gabenor Judah, ka yŭn Joshua anak Jehozadak adi Imam Bās.

²TUHAN Bisa-pŭrŭg nang di Haggai, “Bara daya ati nang ati dŭh tipuh adi ngga pari pijog Ramin TUHAN.”

³Jadi TUHAN nggen pinganang ati ka bara daya so baba nabi Haggai:

⁴“Daya Ku, mani angān rŭŭ di ramin adi grua, ka ramin Ku nyibawang?

⁵Dŭh kah angān rada kayuh adi mbŭh jadi di angān?

⁶Angān mbŭh purun bagŭ gandom, pak dŭh sadang ngga bada adŭp ngan bisoh. Angān biyŭn wain an ngan nok, pak dŭh re sadang ngga bada angān mabuk! Angān biyŭn piraka, pak dŭh re sadang ngga bada angān paras. Ka daya adi nyiraja dŭh re tungang dapŭd bagŭ duit ngga biranja adŭp-i.

⁷Dŭh kah angān puan mani-i mun anŭ?

⁸Madin di maad ka sandah sandah, ka ndu betang betang kayuh, ngga pari pijog Ramin Ku; komŭnŭ Aku re munos asŭng, ka re dog nyambah nimun patut-i.

⁹“Angān harap pingatŭm adi bagŭ, pak-i jadi adi sŭ. Ka kan angān taban buwa pingatŭm ngan ngga maad, Aku poh-i bada miyap.[1] Mani Aku ndai simŭnŭ? Aku ndai simŭnŭ sabab Ramin Ku nyibawang, darŭm barang naan angān dŭh paya paya ngatur ramin adŭp-i.

¹⁰Anŭ sabab ujen mating ndŭg ka kayuh mating timbu.

¹¹Aku mbŭh taban raga di ndi tarun tana ati ndŭg ka sandah sandah, ŭmŭh gandom, teya anggor, risŭn kanā, ngga barang masam buwa pimuruh adi tana piruah mbŭh jadi pisŭk. Manusia, dāng dāng, ngga masam masam pimuruh mbŭh sangsara bada tipuh raga.”

¹²Komŭnŭ Zerubbabel ngga Joshua ngga sopŭrŭg daya adi mbŭh pari so dog taran[2] di Babylonia, ndai kayuh adi TUHAN Tapa bada ngara ndai. Ngara taru ka nundok di Haggai, adi pinyisung TUHAN.

¹³Komŭnŭ Haggai nggen pinganang TUHAN di bara daya: “Aku re agi ngga angān; anŭ janji Ku ngga angān.”

¹⁴TUHAN kies atin barang naan daya bada pijog Ramin TUHAN: Zerubbabel adi gabenor Judah; Joshua adi Imam Bās, ka sopŭrŭg daya adi mbŭh pari so dog taran.[3] Ngara piguru pari pijog Ramin TUHAN Bisa-pŭrŭg, adi Tapa ngara,

¹⁵di andu adi 24 darŭm buran nŭm darŭm sawa adi duwŭh Darius jadi raja-empaya.