Read Biatah Bidayuh HAGGAI 2 Bible Online

HAGGAI 2 - Biatah Bidayuh bible

HAGGAI 2

¹Di andu adi 21 darŭm buran ju sawa anŭ, TUHAN minyu dinge so baba nabi Haggai.

²Ayŭh bada Haggai minyu di Zerubbabel adi gabenor Judah, di Joshua adi Imam Bās, ngga di bara daya,

³ “Agi kah di dupan angān adi babŭ dapŭd ingat munki masam sangŭn Ramin TUHAN dawŭ-i? Munki-i kiris ngan madin? Mun au-tarun kani ayŭh.

⁴Pak angān dŭhnyah asa, tadŭ tadŭ so angān. Ndai kraja ngan, amai Aku agi ngga angān.

⁵ Di andu angān ruah so Egypt, Aku bijanji nang Aku re ari agi ngga angān. Aku babŭ agi ngga angān, jadi dŭhnyah taru.

⁶ “Dŭm dŭh tui Aku re ngugoh rangit ngga ong, deyŭh ngga rawŭt.

⁷Aku re pitumbang sopŭrŭg bangsa, ka ratā ngara re dog taban kamati, ka Ramin Ku re puno ngga pinyikaya.

⁸Sopŭrŭg pirak ngga mas di ong inŭh jaku.

⁹Ramin Ku adi bauh re rabis sangŭn so anŭ adi amba, ka diginŭ Aku re nggen di daya Ku udip mujur ngga damai.” TUHAN Bisa-pŭrŭg mbŭh minyu.

¹⁰Di andu adi 24 darŭm buran prii darŭm sawa adi duwŭh Darius jadi raja-empaya, TUHAN Bisa-pŭrŭg minyu dinge di nabi Haggai.

¹¹Ayŭh nang, “Siken di bara imam ani pikir-kira ngara di kayuh adi mun ati:

¹²Nyamtadar-i agi daya tambit ndi pire dagin so sadis adi muko dog jugan ka TUHAN, ka makot-i ngga tŭbŭn jipo ambu-i ka taban-i ngga maad. Ka kambŭi ko anŭ ayŭh bada jipo ambu-i anŭ dog ruti, pinguman adi dog tanŭk, wain, inyo kanā, bait tadŭ tadŭ pinguman adi bŭkŭn, kudus kah dŭh meh pinguman anŭ bada-i?” Kan ayŭh siken sakanŭ, bara imam nam, “Dŭh.”

¹³ Komŭnŭ Haggai siken, “Nyamtadar-i ndi naan daya sembar sabab ko tama tadang. Kambŭi ayŭh tama tadŭ tadŭ so pinguman anŭ, sembar kah dŭh pinguman anŭ bada-i?” Bara imam anŭ nam, “Sembar.”

¹⁴Komŭnŭ Haggai nang, “TUHAN nang simŭnŭ inŭh kayuh di daya daya bangsa ati ka di sopŭrŭg kayuh adi ngara piruah; ngapŭi meh sopŭrŭg kayuh adi ngara jugan di tunduh mija-sambah inŭh sembar.”

¹⁵TUHAN nang, “Dŭh kah angān rada kayuh adi mbŭh jadi di angān? Diŭ so angān piguru pari pijog Ramin Ku,

¹⁶angān di ka tugung gandom ka pikir adŭp ngan re dapŭd duwŭh ratus kilogram, pak diginŭ kaŭs-i siratus adŭ. Angān di nyauk siratus lita wain so tong wain, pak dapŭd pat puru lita adŭ.

¹⁷Aku pait sabak adi paras ngga ujen batuh bada pirusak sopŭrŭg kayuh adi angān purun, pak babŭ gŭh angān dŭh an marik pimudip ngan pari ka Aku.

¹⁸Andu ati inŭh adi duwŭh puru-pat darŭm buran prii, andu adi ngga pinagap-rasan Ramin TUHAN mbŭh kamas dog na. Ngatin ani re jadi so andu ati.

¹⁹Sunggu mating gandom dŭm, ka tŭngŭn anggor, tŭngŭn ara, tŭngŭn delima, ka tŭngŭn kanā bayuh buān, so madin Aku re nyiberkat angān.”

²⁰Di andu anŭ gŭh, andu adi 24 darŭm buran anŭ, TUHAN nggen dinge adi piduwŭh saba pinganang di Haggai

²¹yŭn Zerubbabel, adi gabenor Judah: “Dŭm dŭh tui Aku re ngugoh shorga ngga ong

²²ka pitumbang pritah pritah ka nyirubuh kuasa-i. Aku re bada krita krita kuda tibarik samŭn bara adi pimanu-i; kuda kuda re kabŭs, ka bara pinunggang-i re bisiŭ dupan adŭp ngara.

²³Di andu anŭ Aku re tambit kuu, Zerubbabel adi urun Ku, ka Aku re tijuan kuu bada mritah ngga adŭn Ku. Kuu inŭh adi Aku mbŭh mien.” TUHAN Bisa-pŭrŭg mbŭh minyu.