Read Biatah Bidayuh ZECHARIAH 1 Bible Online

ZECHARIAH 1 - Biatah Bidayuh bible

ZECHARIAH 1

¹ Di buran adi mai darŭm sawa adi duwŭh Darius jadi raja-empaya di Persia, TUHAN nggen pinganang ati di nabi Zechariah, adi anak Berechiah ka sukuh Iddo.

²TUHAN Bisa-pŭrŭg bada Zechariah kidaan di daya-I, “Aku, adi TUHAN, raru baji di tayung-babuk ngan,

³pak madin Aku nang di angān, ‘Pari ka Aku, ka Aku re pari ka angān.

⁴Dŭhnyah mun tayung-babuk ngan. Ndun jah bara nabi nggen di ngara pinganang Ku, bada ngara ko bidosa. Pak ngara abah dingah Aku bait nundok di Aku.

⁵Tayung-babuk ngan ngga bara nabi anŭ mbŭh mating.

⁶So ka bara urun Ku adi bara nabi Aku nggen di tayung-babuk ngan pesan ngga pinyibakan, pak ngara nyibireu ka dapu tanggong di sarah adŭp ngara sundis andu. Komŭnŭ ngara marik pimudip ngara pari ka Aku ka ngaku Aku, adi TUHAN Bisa-pŭrŭg, mbŭh ngukum ngara nimun patut nanyam ka sarah ngara ka sabab Aku mbŭh natu an ndai simŭnŭ.’ ”

⁷Di sawa adi duwŭh Darius jadi raja-empaya, di andu adi 24 darŭm buran simŭng ndi (buran Shebat), TUHAN nggen di aku pinganang, singarŭm keya ka darŭm pŭmŭh.

⁸ Aku kiris ndi naan daya nunggang kuda bireh. Ayŭh rŭŭ di arong randa mirtel di dau, ka di punok-i agi kuda kuda adi bŭkŭn, adi bireh, adi bibatŭng, adi buda.

⁹Aku siken ayŭh, “Tuan, ani rati dudu kuda ati?” Ayŭh nam, “Aku an kidaan rati-i di kuu.

¹⁰TUHAN pait-i bada di pirasa ong.”

¹¹Ngara ripot di malaikat anŭ: “Kieh mbŭh di ka barang yŭn di ong ka kiris ndi ong ong mbŭh paya buang bamai.”

¹²Komŭnŭ malaikat anŭ nang, “Kaam adi Bisa-pŭrŭg TUHAN, Kaam mbŭh baji di Jerusalem ngga kupo kupo Judah sitŭkŭd ju puru sawa. Ndŭg sinde baji Mai anŭ ka sinde meh Kaam re apun ngara?”

¹³TUHAN nam malaikat anŭ ngga pinganang saduh,

¹⁴ka malaikat anŭ bada aku piagah kayuh adi TUHAN Bisa-pŭrŭg mbŭh nang: “Aku raru masi buang mbit bat pasar Jerusalem, kupo kudus Ku,

¹⁵ka Aku raru baji di bangsa bangsa adi kinyam sanang buang bamai. Amai darŭm Aku nyijŭn baji Ku di daya Ku, bangsa bangsa anŭ bada daya Ku rabis sangsara.

¹⁶Jadi Aku mbŭh pari ka Jerusalem di kiren masi Ku di kupo anŭ. Ramin Ku re pari dog pijog, ka kupo anŭ re dog ndai bada pari kana.”

¹⁷Malaikat anŭ bada gŭh aku piagah: “TUHAN Bisa-pŭrŭg nang kupo kupo-I re pari mujur ka Ayŭh re pari turung Jerusalem ka ngaku-i kupo adŭp-I.”

¹⁸Keya ka darŭm pŭmŭh gŭh dinge, aku kiris pat tanduk sapi.

¹⁹Aku siken di malaikat anŭ adi minyu ngga aku, “Ani rati tanduk tanduk anŭ?” Ayŭh nam, “Rati-i inŭh kuasa pritah ong adi bada daya Judah, daya Israel, ka daya Jerusalem papar sasah.”

²⁰Komŭnŭ TUHAN kiren di aku pat naan tukang basi adi taban pabā.

²¹Aku siken, “Ngara mandŭg re ndai ani?” Ayŭh nam, “Ngara mandŭg di pitaru ka pirabu bangsa bangsa adi bandar bandar bada tarun tana Judah asur ka bada daya-i papar sasah.”