Read Biatah Bidayuh ZECHARIAH 10 Bible Online

ZECHARIAH 10 - Biatah Bidayuh bible

ZECHARIAH 10

¹Mite TUHAN nggen ujen di tipuh bunga. TUHAN inŭh adi bada kruman mandŭg taban ujen ndŭg ka tana jadi barŭm yŭn barang naan daya.

²Daya bisiken ngga tibudo samŭn daya adi pandai kidaan nasip, pak pinyinam adi ngara dapŭd inŭh pinganang kadong ka au-tarun. Agi adi tukang kidaan rati pŭmŭh, pak kaŭs ngara kinanyap angān. Pinganang saduh adi ngara nggen dŭh biguna. Ngapŭi daya bigandon mun biri adi manyap. Ngara susah amai dŭh biyŭn pinguru.

³TUHAN nang, “Aku baji di daya tami anŭ adi mritah daya Ku; Aku re ngukum ngara. Daya Judah inŭh jaku, ka Aku, adi TUHAN Bisa-pŭrŭg, re kingat ngara. Ngara re jadi kuda kuda perang Ku adi bake.

⁴So dupan ngara re mandŭg pimritah, pinguru, ngga pingibās adi re mritah daya[13] Ku.

⁵Daya Judah re manang mun bara soldadu adi bidigang di tunduh pinganyu di tawang di aran. Ngara re biperang sabab TUHAN agi ngga ngara, ka ngara re ngarah ndŭg ka bara pinganyu adi nunggang kuda.

⁶“Aku re bada daya Judah bake; Aku re nyiramat daya Israel. Aku re masi di ngara ka taban sopŭrŭg ngara ngga mari. Ngara re keya ka bŭn dog tirawan Ku. Aku ati TUHAN Tapa ngara; Aku re nam dua ngara.

⁷Daya Israel re bake mun soldadu, gaŭn mun daya adi mbŭh nok wain. Sesang ngara re ingat pimanang ati ka re gaŭn sabab kayuh adi TUHAN mbŭh ndai.

⁸“Aku re bagan daya Ku ka nguruk ngara. Aku re nyiramat ngara ka bada ngara bagŭ mun adi dawŭ-i.

⁹Sunggu Aku mbŭh bada ngara papar sasah di dupan bangsa bangsa, di tarun adi jo, ngara re ingat Aku. Ngara ngga anak anak ngara re siramat ka samah mari.

¹⁰So Egypt ngga Assyria Aku re taban ngara ngga mari ka na ngara di rais adŭp ngara. Aku re na gŭh ngara di Gilead ngga Lebanon; ndi tarun tana re puno ngga daya.

¹¹Kan ngara mutas rawŭt pinyusah ngara, Aku, adi TUHAN, re mupu girumbang, ka Yang Nile gŭh re badŭh. Assyria adi sambuh re dog pirapat, ka Egypt adi bake re manyap kuasa-i.

¹²Aku re bada daya Ku bake; ngara re nyambah ka nundok di Aku.” TUHAN mbŭh minyu.