Read Biatah Bidayuh ZECHARIAH 11 Bible Online

ZECHARIAH 11 - Biatah Bidayuh bible

ZECHARIAH 11

¹Kuka tiban tiban mu, Lebanon, isa apui bisa badang bada rŭpŭg tŭngŭn tŭngŭn sedar mu![14]

²Sien ka nyikaong, tŭngŭn tŭngŭn kayuh sipres, tŭngŭn tŭngŭn sedar mbŭh tumbang; tŭngŭn tŭngŭn kayuh adi bibragah anŭ mbŭh dog pirabur! Sien ka nyirais, tŭngŭn oak di Bashan, amai tuān adi tabar mbŭh dog tabŭng!

³Pimritah nyirais amai susah; bragah ngara mbŭh miyap! Dingah ngŭr singah; tuān adi arŭn ngara mbŭh dog pirabur!

⁴TUHAN adi Tapa ku nang di aku, “Ndai adŭp mu bada mun pingingat[15] kaban biri adi re dog siŭ.

⁵Daya adi dapu biri siŭ kaban biri anŭ ka dŭh dog ukum. Ngara jua dagin-i ka nang, ‘Puji ka TUHAN! Kieh kaya!’ Pingingat adŭp biri dŭh gŭh masi di biri.”

⁶(TUHAN nang, “Aku re dŭh tia masi di tadŭ tadŭ daya di ong. Adŭp Ku re na sopŭrŭg daya ka darŭm tangan pimritah ngara. Bara pimritah anŭ re pirabur ong, ka Aku dŭh re nyiramat-i so kuasa ngara.”)

⁷Ngara adi miris ka jua biri ngaji aku, ka aku jadi pingingat-biri adi re dog siŭ. Aku tambit duwŭh sikud: ndi aku kadŭn “Pinyirasi”, ka anŭ ndi Aku kadŭn “Bisindi”. Ka aku kingat kaban biri anŭ.

⁸Aku mbŭh dŭh tia sabar ngga pingingat-biri adi bŭkŭn, adi tiru di aku; jadi darŭm tipuh ndi buran anŭ aku taran ngara.

⁹Komŭnŭ aku nang di kaban biri anŭ, “Aku re dŭh tia jadi pingingat ngan. Anŭ adi re kabŭs, isa-i kabŭs. Anŭ adi re dog pirabur, isa-i dog pirabur. Anŭ adi dŭm re bisiŭ dupan adŭp-i.”

¹⁰Komŭnŭ aku tambit sikud adi dog kadŭn “Pinyirasi” ka mata-i, ngga kinating simanya adi TUHAN mbŭh ndai ngga sopŭrŭg bangsa.

¹¹Simŭnŭ inŭh simanya dog kinating di andu anŭ. Ngara adi miris ka jua biri nyibatŭh aku, ka ngara puan nang TUHAN minyu so pingandai ku anŭ.

¹² Aku nang di ngara, “Kambŭi angān raan, nggen gaji ku. Pak kambŭi abah, nyikŭn adŭ.” Ngara nggen di aku 30 kiping duit pirak.

¹³TUHAN nang di aku, “Na-i di darŭm pinyirikŭn-rata Ramin TUHAN.”[16] Jadi aku tambit 30 kiping duit pirak anŭ, adi mua kiang-i ngga ngara ngaji aku, ka na-i di darŭm pinyirikŭn-rata Ramin TUHAN.

¹⁴Komŭnŭ aku mata sikud adi numbor duwŭh anŭ, adi aku kadŭn “Bisindi”, ka udip bisindi Judah ngga Israel meh patŭd.

¹⁵Komŭnŭ TUHAN nang di aku, “Ndai dinge adŭp mu bada mun pingingat-biri; kari ati bada adŭp mu mun pingingat adi dŭh biguna.

¹⁶Aku mbŭh tijuan pingingat-biri bada kingat kaban biri Ku, pak ayŭh dŭh turung biri adi re dog pinyusah, bait nguri anŭ adi biragan, bait paan anŭ adi tiranah. Tibarik ayŭh man dagin biri adi siabo gamu ka dimbut tinjug biri.

¹⁷Mbŭh payah inŭh pingingat-biri anŭ! Ayŭh mbŭh tagan kaban biri-i. Perang re pirabur kuasa-i. Tangan-i re ramah, ka batŭh-i karak.”