Read Biatah Bidayuh ZECHARIAH 12 Bible Online

ZECHARIAH 12 - Biatah Bidayuh bible

ZECHARIAH 12

¹Pinganang ati so TUHAN pasar Israel. TUHAN adi mamad rangit, napa ong, ka nggen udip di manusia nang,

²“Aku re bada Jerusalem mun makuk wain. Bangsa bangsa adi maning-i re nok ka tibabeu mun daya mabuk. Ka kan ngara ngarah Jerusalem, kupo kupo Judah adi bŭkŭn re dog ngarah gŭh.

³Pak di tika anŭ, Aku re bada Jerusalem mun batuh adi bat. Tadŭ tadŭ bangsa adi suba an pakat-i re biragan. Sopŭrŭg bangsa di ong re bipambit nyerang Jerusalem.

⁴Di tika anŭ Aku re pitaru sopŭrŭg kuda ka bada sopŭrŭg pinunggang-i jadi gira. Aku re jaga daya Judah, pak kuda pinganyu ngara Aku re bada karak.

⁵Ka bara manak Judah re nang dupan adŭp ngara, ‘TUHAN Tapa Bisa-pŭrŭg nggen pinyibake di daya-I adi rŭŭ di Jerusalem.’

⁶“Di tika anŭ Aku re bada manak Judah mun apui di tuān bait mun apui di ŭmŭh gandom adi mbŭh masak. Ngara re pirabur sopŭrŭg bangsa adi maning ngara. Daya Jerusalem re siramat darŭm kupo.

⁷“Aku, adi TUHAN, re nggen pimanang di bara tibaran soldadu Judah diŭ, isa bragah adi sesang David ngga daya Jerusalem re trima dŭh bās dŭ so anŭ adi daya Judah adi bŭkŭn trima.

⁸Di tika anŭ TUHAN re grindung ngara adi rŭŭ di Jerusalem, ka ngara adi siabo ramah di dupan ngara re jadi bake mun David gŭh. Sesang sesang David re nguru ngara mun adi dog nguru malaikat TUHAN, ka mun adi dog nguru adŭp Tapa.

⁹Di tika anŭ Aku re pirabur sopŭrŭg bangsa adi suba nyerang Jerusalem.

¹⁰ “Aku re nggen di sesang sesang David ngga di daya Jerusalem atin adi masi ngga atin adi gagā bidua. Ngara re tingga sianŭ adi ngara mbŭh tabŭk ndŭg ka kabŭs, ka ngara re ngurid-i mun ngurid anak tambŭ adŭp ngara. Ngara re bandar bandar ngurid, mun daya ngurid anak pinuai dari.

¹¹Di tika anŭ re agi daya ngurid di Jerusalem, re bisā mun daya ngurid Hadad Rimmon[17] di rabak Megiddo.

¹²Barang rawang di tarun tana rais anŭ re ngurid sadi adŭp-i: rawang sesang David, rawang sesang Nathan, rawang sesang Levi, rawang sesang Shimei, ka sopŭrŭg rawang adi bŭkŭn. Barang rawang re ngurid sadi adŭp-i, ka dari di barang rawang re ngurid dŭh bigaur ngga dayung.