Read Biatah Bidayuh ZECHARIAH 14 Bible Online

ZECHARIAH 14 - Biatah Bidayuh bible

ZECHARIAH 14

¹Andu adi ngga TUHAN guru nggen bisara mbŭh sindŭk. Ka Jerusalem re dog mirupak, ka kayuh sirapas anŭ re dog kutung di sirung jawin mu.

²TUHAN re nguruk sopŭrŭg bangsa bada biperang ngga Jerusalem. Kupo anŭ re dog sirabut, ramin ramin re dog mirupak, ka bara dayung re dog miragag. Sitangah so bara daya re dog taran ka rais tami, pak ngara adi bŭkŭn re dŭh dog taban ngga bu so kupo.

³Komŭnŭ TUHAN re ruah ka biperang rawan bangsa bangsa anŭ, mun dawŭ-i.

⁴Di tika anŭ Ayŭh re mijog di Sandah Kanā, di parad ka timor Jerusalem. Komŭnŭ Sandah kanā re pape nyinuwŭh bada dau adi bayah. Sitangah sandah anŭ re tikana nuju parad ka utara ka sitangah nuju parad ka siratan.

⁵Kuu re bu kadŭg dau adi mire sandah anŭ nyinuwŭh.[19] Kuu re bu mun tayung-babuk mu di tika tana bigugoh di jaman Uzziah jadi raja di Judah. TUHAN Tapa re mandŭg ngga sopŭrŭg malaikat-I.

⁶Kan tika anŭ mbŭh mandŭg, re mating tia tipuh madud bait abun maku,[20]

⁷ka mating gŭh karŭm. Andu jawa re adu adu agi, ndŭg ka di tika karŭm ani. Sinde kayuh re jadi simŭnŭ, adŭp TUHAN adŭ puan.

⁸ Kan andu anŭ mbŭh mandŭg, piin adi nggen udip re aman so Jerusalem, sitangah di ka Rawŭt Pide ka sitangah di ka Rawŭt Mediterranean. Piin anŭ re aman sitŭkŭd sawa, di tipuh raga ngga di tipuh ujen.

⁹Komŭnŭ TUHAN re jadi raja yŭn ndi ong ong; barang naan daya re nyambah Ayŭh mun Tapa ka puan Ayŭh ngga adŭn anŭ gŭh.

¹⁰Ndi abong abong utung tarun tana rais, so kupo Geba di parad ka utara ndŭg kupo Rimmon di parad ka siratan, re dog pirata. Jerusalem re bigatung so tarun tana adi maning-i; bayah kupo anŭ inŭh so Tiban Benjamin ndŭg Tiban Sikuh, di yŭn adi ko agi dawŭ-i tiban, ka so Tawā Hananel ndŭg tarun yŭn mŭ anggor adi raja dapu.

¹¹ Daya re rŭŭ diginŭ ngga siramat, dŭh tia dog nyatŭk pinyirusag.

¹²TUHAN re bada andam adi bisā nyatŭk sopŭrŭg bangsa adi biperang ngga Jerusalem. Pŭrŭng ganan ngara, batŭh ngga jura ngara re madam darŭm ngara gibabŭ udip.

¹³Di tika anŭ TUHAN re bada ngara riruk buang taru ndŭg ka barang naan re nyerang ka nakap daya adi sindŭk adŭp-i.

¹⁴Bara daya Judah re birawan ngga ngibān Jerusalem. Ngara re sirapas pinyikaya so sopŭrŭg bangsa, mun mas, pirak, ka piraka ngga sibagŭ bagŭ-i.

¹⁵Andam adi bisā gŭh re nyatŭk kuda, kuda pinakan kaldi, onta, ka kaldi; simŭnŭ gŭh dāng adi di tarun yŭn pinganyu bibari.

¹⁶ Komŭnŭ sopŭrŭg daya so bangsa bangsa adi babŭ udip, adi nyerang Jerusalem, re di ka Jerusalem barang sawa di nyambah Raja, adi TUHAN Bisa-pŭrŭg, ka sita Gawai Bari-Dawŭn.

¹⁷Kambŭi tadŭ bangsa abah matak di nyambah Raja, adi TUHAN Bisa-pŭrŭg, ujen re dŭh rabu di rais ngara.

¹⁸Kambŭi daya Egypt abah sita Gawai Bari-Dawŭn, ngara re dog nyatŭk andam anŭ adi TUHAN re bada nyatŭk bangsa adi abah di ka Jerusalem di nyambah.

¹⁹Anŭ inŭh ukum adi re nyatŭk Egypt ngga sopŭrŭg bangsa, kambŭi ngara dŭh sita Gawai Bari-Dawŭn.

²⁰Di tika anŭ, ju ruseng kuda re agi dog mŭŭt dieh pinganang “Dog nitah ka TUHAN”. Priok ngga tanŭk adi di Ramin TUHAN re kudus mun makuk makuk adi di jawin mija-sambah.

²¹Barang priok ngga tanŭk di Jerusalem ka di barang yŭn di Judah re dog nitah yŭn pakai di tika nyambah TUHAN Bisa-pŭrŭg. Daya adi jugan sadis re pakai-i ngga tanŭk ngga piin dagin sadis. Kan tika anŭ mbŭh mandŭg, re mating daya dagang tia darŭm Ramin TUHAN Bisa-pŭrŭg.