Read Biatah Bidayuh ZECHARIAH 2 Bible Online

ZECHARIAH 2 - Biatah Bidayuh bible

ZECHARIAH 2

¹Aku kiris dinge keya ka darŭm pŭmŭh ndi naan daya digŭng taris pingŭkŭd.

²“Kamaki kuu?” aku siken. “Di ngŭkŭd Jerusalem,” ayŭh nam, “an puan ambu-i ngga buka-i.”

³Komŭnŭ aku kiris malaikat anŭ adi minyu ngga aku masang ka jawin, ka malaikat adi bŭkŭn mandŭg tudu ayŭh.

⁴Malaikat anŭ adi diŭ nang di sianŭ ndi, “Bikaduh ka kidaan di dari mara anŭ adi digŭng taris pingŭkŭd nang di Jerusalem re agi raru bagŭ daya ka raru bagŭ dāng kudip ndŭg ka sindung sindung kupo dŭh re dapŭd dog pijog tia.

⁵TUHAN mbŭh bijanji nang adŭp-I re jadi sindung apui maning kupo anŭ ka grindung-i ka adŭp-I re rŭŭ diginŭ ngga sopŭrŭg bragah-I.”

⁶TUHAN nang di daya-I, “Aku bada angān papar sasah di barang yŭn. Pak madin, angān daya adi dog taran ka rais tami, bu so Babylonia ka pari ka Jerusalem.

⁸Daya adi nyerang angān inŭh nyerang kayuh adi siabo brega di Aku.” Jadi TUHAN Bisa-pŭrŭg[1] pait aku ngga pinganang ati yŭn bangsa bangsa adi ko pirinda daya-I:

⁹“Adŭp TUHAN re rawan angān, ka angān re dog pirinda daya adi ko jadi urun ngan.” Kan kayuh anŭ jadi simŭnŭ, sopŭrŭg daya re puan nang TUHAN Bisa-pŭrŭg inŭh adi pait aku.

¹⁰TUHAN nang, “Biragu ngga gaŭn, daya Jerusalem! Aku mandŭg re rŭŭ di ruang ngan!”

¹¹Di tika anŭ bagŭ bangsa re mandŭg ka TUHAN ka jadi daya-I. Ayŭh re rŭŭ di ruang ngan, ka angān re puan nang Ayŭh inŭh adi pait aku ka angān.

¹²Daya Judah re pari jadi rata bās TUHAN di tarun tana kudus-I, ka Jerusalem re jadi kupo adi-I siabo rindu.

¹³Pajam, barang naan, di sirung jawin TUHAN, amai Ayŭh aŭn mandŭg so yŭn pinyirŭŭ-I adi kudus.