Read Biatah Bidayuh ZECHARIAH 4 Bible Online

ZECHARIAH 4 - Biatah Bidayuh bible

ZECHARIAH 4

¹Malaikat adi minyu ngga aku tudu aku dinge ka kies aku, mun ani aku nganŭ taŭn bŭŭs.

²“Ani kiris mu?” ayŭh siken. “Ndi rika prita adi dog ndai so mas,” Aku nam. “Di tibung-i agi ndi makuk inyo. Di rika prita anŭ agi ju prita, ka sopŭrŭg-i biyŭn ju yŭn sumbu.

³ Diginŭ agi duwŭh tŭngŭn kanā ngapid rika prita anŭ, ndi di parad ka tauh ka ndi di parad ka bait-i.”

⁴Komŭnŭ aku siken di malaikat anŭ, “Ani rati kayuh kayuh anŭ, tuan?”

⁵“Dŭh kah kuu puan?” ayŭh siken aku. “Dŭh aku puan, tuan,” aku nam.

⁶ Malaikat anŭ bada aku nggen di Zerubbabel pinganang ati so TUHAN: “Kuu re mujur di pingandai mu, dŭh so ka pinyibake soldadu bait so ka pinyibake adŭp mu, pak so ka Roh Ku.

⁷Sitika adi bās mun darŭd re miyap so jawin mu. Kuu re pari pijog Ramin Ku, ka darŭm kuu nyandug sikasŭn batuh di yŭn-i, daya re nyirais nang, ‘Sangŭn, sangŭn!’ ”

⁸Pinganang adi bŭkŭn mandŭg ka aku so TUHAN.

⁹Ayŭh nang, “Zerubbabel mbŭh na pinagap-rasan Ramin TUHAN, ka ayŭh re ngamas kraja piramin anŭ. Kan-i mbŭh kamas, daya Ku re puan nang Aku inŭh adi pait kuu ka yŭn ngara.

¹⁰ Ngara asa sabab kraja piramin anŭ paŭh sais. Pak ngara re kiris Zerubbabel pijuu pijog Ramin TUHAN, ka anŭ re bada ngara sanang asŭng.” Malaikat anŭ nang di aku, “Rati ju prita anŭ inŭh ju batŭh TUHAN, adi nyibatŭh ndi ong ong.”

¹¹ Komŭnŭ aku siken di ayŭh, “Ani rati tŭngŭn kanā anŭ adi di parad ka tauh ngga adi di parad ka bait rika prita anŭ?

¹²Ka ani rati duwŭh daan so tŭngŭn kanā adi ngapid duwŭh betang paip mas adi so inyo kanā dog ren?”

¹³Ayŭh siken aku, “Dŭh kah kuu puan?” “Dŭh aku puan, tuan,” aku nam.

¹⁴Komŭnŭ ayŭh nang, “Anŭ inŭh duwŭh naan daya adi Tapa mbŭh mien ka nginyo bada bituan di adŭp-I, TUHAN adi nguasa ndi ong ong.”