Read Biatah Bidayuh ZECHARIAH 7 Bible Online

ZECHARIAH 7 - Biatah Bidayuh bible

ZECHARIAH 7

¹Di sawa adi pat darŭm pinyipritah Darius adi raja-empaya, di andu adi pat darŭm buran prii (buran Kislev), TUHAN nggen pinganang di aku.

²Daya Bethel muko pait Sharezer ngga Regemmelech ngga bara daya-i ka Ramin TUHAN Bisa-pŭrŭg an bidua mite berkat so TUHAN

³ka siken di imam imam ngga nabi nabi: “Patut kah kieh pijuu ngurid pinyirusag Ramin TUHAN, ngga bipusa darŭm buran rimŭh nimun adi mbŭh ami bisawa sawa ndai?”

⁴Ati inŭh pinganang TUHAN adi mandŭg ka aku.

⁵Ayŭh nang, “Kidaan di bara daya tarun tana rais ati ngga bara imam nang kan ngara bipusa ka ngurid darŭm buran rimŭh ngga buran ju darŭm tipuh ju puru sawa ati, dŭh-i ngga stabi di Aku.

⁶Kan ngara man nok, anŭ batur-i ngga ngara pimunos adŭp-i.”

⁷Anŭ inŭh kayuh adi TUHAN nang so baba bara nabi di jaman Jerusalem gibabŭ agi daya rŭŭ dieh buang mujur. Di jaman anŭ bagŭ daya rŭŭ dŭh darŭm anak anak kupo maning kupo anŭ adŭ pak di abong tarun tana parad ka siratan ngga di sigŭn sandah di parad ka barat.

⁸TUHAN nggen pinganang ati di Zechariah:

⁹“Ndun jah Aku nggen pesan ati ka daya Ku: ‘Angān dŭh siŭn dŭh bada pinyitŭnggŭn dog pimanu, ka dŭh siŭn dŭh mandis ka masi di dingan ngan.

¹⁰Dŭhnyah kinanyuh dayung uban, anak tumang, daya tami adi rŭŭ di ruang ngan, bait tadŭ tadŭ daya adi udip susah. Ka dŭhnyah bipusar an kandam dingan ngan.’

¹¹“Pak daya Ku tangek ka abah dingah pinganang. Ngara mapot kajit isa ngara dŭh dingah

¹²ka bada atin ngara riang mun batuh. Sabab ngara abah dingah ajar adi Aku pait so baba bara nabi ndun jah, Aku mbŭh raru baji.

¹³Sabab ngara abah dingah kan Aku minyu, Aku dŭh nam kan ngara bidua.

¹⁴Mun sabak ribut Aku poh ngara bada rŭŭ di tarun tana rais tami. Tarun tana adi kana ati dog tingge jadi tana matung, ka mating daya rŭŭ dieh.”