Read Biatah Bidayuh ZECHARIAH 8 Bible Online

ZECHARIAH 8 - Biatah Bidayuh bible

ZECHARIAH 8

¹TUHAN Bisa-pŭrŭg nggen pinganang ati di Zechariah:

²“Aku raru raan turung Jerusalem sabab Aku raru rindu daya-i, pinyirindu adi bada Aku baji di bara pinganyu-i.

³Aku re pari ka Jerusalem, kupo kudus Ku, ka rŭŭ diginŭ. Kupo anŭ re dog kadŭn kupo adi tŭtŭd, ka sandah TUHAN Bisa-pŭrŭg[8] re dog kadŭn sandah kudus.

⁴Bara nyamba dari ngga nyamba dayung adi mbŭh raru minyamba ka pakai sikud ngga panu, re pari agi guru di pakan kupo.

⁵Ka aran aran kupo re pari puno ngga dudu anak dari ngga dudu anak dayung adi sŭ birubi.

⁶“Kayuh anŭ mun adi dŭh bisa jadi di batŭh ngara adi babŭ udip so bangsa ati, pak di Aku kayuh anŭ bisa jadi.

⁷Aku re nyiramat daya Ku so tarun tana adi yŭn ngara dog taran,

⁸ka re taban ngara ngga pari so timor ngga barat bada rŭŭ di Jerusalem. Ngara re jadi daya Ku, ka Aku re jadi Tapa ngara, mritah ngara ngga tŭtŭd ka ngga pinyitŭnggŭn.

⁹“Bada atin ngan pagan! Angān madin dingah pinganang anŭ adi bara nabi ko nang di tika pinagap-rasan dog na yŭn pari pijog Ramin Ku.

¹⁰Diŭ so tika anŭ mating daya dapŭd ngaji daya bait dāng, ka mating daya siramat so dog mito pinganyu. Aku adi bada daya birawan dupan adŭp-i.

¹¹Pak madin gaya Aku ngga bara daya adi babŭ udip so bangsa ati inŭh bŭkŭn.

¹²Ngara re purun bine darŭm damai. Tŭngŭn anggor ngara re buān, tana re piruah buwa pimuruh, ka re agi ujen. Aku re nggen sopŭrŭg berkat ati di daya so bangsa Ku adi babŭ udip.

¹³Daya Judah ngga daya Israel! Dawŭ-i daya tami mangu dingan-i sakati, ‘Isa-i pinyirusag anŭ adi nyatŭk Judah ngga Israel nyatŭk angān!’ Pak Aku re nyiramat angān, ka komŭnŭ bara daya tami anŭ re nang di dingan-i, ‘Isa-i angān kambat berkat anŭ adi mandŭg ka Judah ngga Israel!’ Ngapŭi pagan meh ka dŭhnyah taru.”

¹⁴TUHAN Bisa-pŭrŭg nang, “Kan tayung-babuk ngan bada Aku baji, Aku ngatur pinyirusag yŭn ngara ka Aku dŭh nukar pikir Ku, pak pijadi-i.

¹⁵Pak madin Aku bisatur an nyiberkat daya Jerusalem ngga daya Judah. Ngapŭi dŭhnyah taru.

¹⁶ Ati inŭh kayuh adi angān patut ndai: minyu kayuh adi sawŭ di dingan ngan. Di tarun yŭn bisara, minyu ngga pimanu pinyitŭnggŭn; anŭ inŭh kayuh adi taban damai.

¹⁷Dŭhnyah bipusar an kandam dingan ngan. Dŭhnyah nggen taksi kadong buang angān bipayu. Aku tiru di pinyikadong, tiru di atur adi dŭh ngga pimanu pinyitŭnggŭn, ka tiru di pinyiganas.”

¹⁸TUHAN Bisa-pŭrŭg nggen pinganang ati di Zechariah:

¹⁹“Pusa adi dog sita darŭm buran pat, buran rimŭh, buran ju, ka darŭm buran simŭng re jadi gawai ngga pawŭn ka gaŭn yŭn daya Judah. Angān dŭh siŭn dŭh rindu pinyawŭ ka damai.”

²⁰TUHAN Bisa-pŭrŭg nang, “Tika-i re mandŭg kan daya so bagŭ kupo[9] re mandŭg ka Jerusalem.

²¹Ngara adi mandŭg so kupo ndi re nang di ngara adi mandŭg so kupo andi, ‘Kieh re nyambah TUHAN Bisa-pŭrŭg ka bidua mite berkat so Ayŭh. Ja sua!’

²²Bagŭ daya[10] ngga bangsa bangsa adi bikuasa re mandŭg ka Jerusalem di nyambah TUHAN Bisa-pŭrŭg, ka mite berkat so Ayŭh.

²³Di tipuh anŭ simŭng naan daya tami re mandŭg ka ndi naan daya Jahudi ka nang, ‘Kieh raan sua dog nyiberkat ngga angān sabab kieh mbŭh dingah Tapa agi ngga angān.’ ”