Read Biatah Bidayuh MALACHI 1 Bible Online

MALACHI 1 - Biatah Bidayuh bible

MALACHI 1

¹Ati inŭh pinganang adi TUHAN nggen di Malachi bada kidaan di daya Israel.

² TUHAN nang di daya-I, “Aku taŭn ari rindu angān.” Pak ngara nam, “Munki Kaam rindu kieh?” TUHAN nam, “Esau ngga Jacob bijurud, pak Jacob ngga bara sesang-i Aku rindu,

³ka Esau ngga bara sesang-i Aku tiru. Aku mbŭh pirusak rais tarun tana sandah Esau ka tandah tarun tana anŭ jadi tarun yŭn dāng dāng tarun.”

⁴Kambŭi sesang sesang Esau, adi bara daya Edom, nang, “Kupo kupo ami mbŭh dog pirabur, pak kieh re pari pijog-i,” ka TUHAN re nam, “Tandah ngara pari pijog-i, ka Aku re pirabur-i dinge. Daya re kadŭn-i ‘Rais adi pirumot’ ka ‘Bangsa adi yŭn TUHAN adu adu baji.’ ”

⁵Daya Israel re kiris kayuh anŭ ngga batŭh adŭp ngara, ka ngara re nang, “TUHAN inŭh sukup bikuasa, ka di sapa tarun tana Israel ani!”

⁶TUHAN Bisa-pŭrŭg nang di bara imam, “Anak stabi di sama-i, ka urun stabi di tuan-i. Aku ati Sama ngan, mani angān dŭh stabi di Aku? Aku ati Tuan ngan, mani angān dŭh taru di Aku? Angān ngamun Aku, pak angān siken, ‘Munki kieh ngamun Kaam?’

⁷Simuti inŭh: angān jugan sadis adi dŭh biguna di tunduh mija-sambah Ku. Ka angān siken, ‘Munki kieh dŭh stabi di Kaam?’ Aku kidaan di angān: angān dŭh biradat di mija-sambah Ku.

⁸ Kan angān taban dāng adi karak adi mandam adi bajang an ngan nyadis ka Aku, angān pikir anŭ dŭh sarah kah? Suba nggen dāng adi mun anŭ di gabenor! Re munos kah asŭng-i di angān, ka re kana kah ayŭh ngga angān?”

⁹Madin, angān bara imam, suba mite Tapa kana ngga ata. Ayŭh dŭh re nam dua ngan, ka anŭ mbŭh sarah adŭp ngan.

¹⁰TUHAN Bisa-pŭrŭg nang, “Kana dŭ inŭh ndi naan so angān tŭŭp adŭ tiban Ramin Ku isa angān dŭh ndai apui adi dŭh biguna di tunduh mija-sambah Ku. Aku dŭh munos asŭng di angān; Aku dŭh re trima sadis sadis adi angān taban ka Aku.

¹¹Daya so bŭngŭn ong di parad ndi ndŭg bŭngŭn ong di parad andi stabi di Aku. Di barang yŭn ngara badang kimanyan ka Aku, ka jugan sadis adi patut dog trima. Sopŭrŭg ngara stabi di Aku!

¹²Pak angān dŭh stabi di Aku kan angān nang mija-sambah Ku dŭh biguna, ka kan angān jugan di tunduh-i pinguman adi adŭp ngan ngamun.

¹³Angān nang, ‘Mbŭh raru reju kieh di sopŭrŭg kayuh ati!’ ka ko anŭ angān ngamun Aku. Ndu ngan sadis yŭn Ku, angān taban dāng adi ko dog naku puan kah anŭ adi bajang puan kah adi mandam. Angān pikir Aku raan trima anŭ so angān?

¹⁴Pangu re nyatŭk pinipu adi nyadis ka Aku dāng adi dŭh biguna, darŭm-i biyŭn di dupan kaban dāng-i dāng adi pidanah adi-i mbŭh bijanji an nggen di Aku! Amai Aku ati inŭh raja adi bās, ka daya so sopŭrŭg bangsa taru di Aku.”