Read Biatah Bidayuh MALACHI 4 Bible Online

MALACHI 4 - Biatah Bidayuh bible

MALACHI 4

¹TUHAN Bisa-pŭrŭg nang, “Andu re mandŭg adi ngga sopŭrŭg daya adi sambuh ngga adi arap re dog badang keya ka siriyang dog badang. Di andu anŭ ngara re abo dog badang, ndŭg ka mating ani ani dŭm so ngara.

²Pak yŭn angān adi nundok di Aku, kuasa Ku adi nyiramat angān re makat keya ka batŭh andu, ka kuasa Ku anŭ re nggen pinyibua keya ka jawa batŭh andu. Angān re dog pirupas ka gaŭn keya ka anak sapi dog piruah so kandang.

³Di andu Aku makat ndai kayuh, angān re ngarah daya ginaka, ka ngara re keya ka dabu tana di punda kaja ngan.

⁴“Ingat ajar urun Ku Moses, ka ukum-adat ngga pesan adi Aku nggen di ayŭh di Darŭd Sinai yŭn sopŭrŭg daya Israel tunda.

⁵ “Pak diŭ so andu bās ka bisā anŭ, andu TUHAN mandŭg, Aku re pait ka angān nabi Elijah.

⁶Ayŭh re bada sama ngga anak jadi ndi atin dinge; isa Aku dŭh mandŭg di pirabur rais ngan.”