Read Biatah Bidayuh MATTHEW 11 Bible Online

MATTHEW 11 - Biatah Bidayuh bible

MATTHEW 11

¹Kan Jesus muko nakit pesan simŭng-duwŭh naan murid-I sakanŭ, Ayŭh bu so nŭ ka di ngajar di kupo kupo adi sindŭk arong anŭ.

²Kan John Pembaptisa, darŭm jer, dingah pasar kayuh adi Kristus ndai, ayŭh pait kada murid-i ka yŭn-I.

³“Kidaan di kieh,” ngara siken Jesus, “Kaam kah sianŭ adi re mandŭg nanyam ka janji Tapa, kambŭi dŭh patut kah kieh kajŭn adi bŭkŭn?”

⁴Jesus nam, “Panu pari ka kidaan di John sigara kayuh adi angān ko kiris ka dingah:

⁵ daya karak dapŭd kiris, daya bajang dapŭd panu, ngara adi naman andam kurit adi bisā mbŭh dog pibisig,[21] daya bangam dapŭd dingah, daya kabŭs dog pakat, ka Agah Kana mbŭh dog nyuse di daya sirata.

⁶Munki masam sanang inŭh ngara adi dŭh kurang sabah di Aku!”

⁷Atan bara murid John bu, Jesus minyu pasar ayŭh di bara daya bagŭ: “Di andu angān matak ka yŭn John di tarun tana-pajam, ani anŭ adi angān an tingga? Dawŭn kupai miringe dog poh sabak?

⁸Angān matak an tingga ani? Daya nēn piraka grua? Daya adi nēn piraka grua rŭŭ di istana!

⁹Kidaan di Aku, angān matak an tingga ani? Nabi? Taŭn sawŭ, pak angān kiris sianŭ adi rabis bās so nabi.

¹⁰ Amai pasar John inŭh Surat-kudus nang: ‘Tapa nang, Aku re pait pinyisung Ku diŭ so Kuu da sidia aran yŭn Mu.’

¹¹Puan meh! Gi-mating daya darŭm ong ati re rabis bās so John Pembaptisa. Pak sianŭ adi siabo sŭ di dupan ngara adi kinyam Pinyipritah Tapa[22] agi bās dŭ so John.

¹² So andu John nyuse ajar-i ndŭg andu ati Pinyipritah Tapa mbŭh dog nyerang,[23] ka daya ganas suba an nguasa-i ngga gaya adi kasar.

¹³Ndŭg jaman John sopŭrŭg nabi ka Ukum-adat Moses minyu pasar Pinyipritah anŭ;

¹⁴ ka kambŭi angān an sabah pinganang ngara, John inŭh Elijah, adi ko dog ninjau pimandŭg-i.

¹⁵Dingah garang, kambŭi angān biyŭn kajit!

¹⁶“Ani meh bisa Ku ngga awing daya di jaman ati? Ngara keya ka anak-anya adi guru di arong passar. Agi kada-i nang di dingan-i,

¹⁷‘Kieh main ragu sawan yŭn ngan, pak angān dŭh an bitanda! Kieh nang ragu puās, pak angān dŭh an muās!’

¹⁸Kan John mandŭg, ayŭh bipusa ka dŭh nok wain, ka sopŭrŭg daya nang, ‘Ayŭh pirumot!’

¹⁹Kan Anak Manusia mandŭg, Ayŭh man nok, ka sopŭrŭg daya nang, ‘Tingga daya ati! Ayŭh daya pirusong ka pimabuk, bidingan ngga daya pinsuke ka daya adi dog tirawan!’ Pinyibijak Tapa, sunggu mŭnŭ, taŭn tatŭng sawŭ darŭm kraja pingandai daya adi trima pinyibijak anŭ.”

²⁰Daya adi di kupo di yŭn Jesus ko ndai bagŭ pingandai-nginga dŭh an marik pimudip ngara pari ka Tapa; jadi Jesus nyarah kupo kupo anŭ.

²¹ “Mbŭh raru payah-i re di kuu, Chorazin! Mbŭh raru payah-i gŭh di kuu, Bethsaida! Kambŭi pingandai-nginga adi ko dog ndai di kuu dog ndai di Tyre ngga Sidon, mbŭh tui daya diginŭ pakai banang guni buang ngabu apŭk di adŭp-i, ngga kiren adŭp-i mbŭh marik pimudip-i pari ka Tapa!

²²Puan meh! Di Andu Bisara Tapa re masi dŭ di daya di Tyre ngga di Sidon so di angān!

²³ Ka kuu, Capernaum! Agi kuu an katuh adŭp mu ka shorga? Kuu re dog taran ka neraka! Kambŭi pingandai-nginga adi ko dog ndai di kuu dog ndai di Sodom, Sodom gibabŭ agi ndŭg andu ati!

²⁴ Puan meh! Di Andu Bisara Tapa re masi dŭ di Sodom so di angān!”

²⁵Di tika anŭ Jesus nang, “Sama, Kaam adi nguasa rangit ngga ong! Aku nggen trima kaseh di Kaam sabab Kaam mbŭh kiren di ngara adi dŭh pitar-pandai kayuh adi Kaam sukan so ngara adi bijak buang pitar-pandai.

²⁶Sawŭ, Sama, anŭ inŭh nanyam ka pinyiraan Mai.

²⁷ “Sama Ku mbŭh nggen di Aku sopŭrŭg kayuh. Mating daya puan Anak adŭ-i Sama, ka mating daya puan Sama adŭ-i Anak samŭn ngara adi Anak ko mien yŭn-I pinandŭng Sama.

²⁸“Mandŭg ka Aku, sopŭrŭg ngan adi mbŭh jera da pinyirabis bat, ka Aku re pirupas angān so bat-i.

²⁹ Tunda pritah Ku ka trima ajar Ku, amai Aku ati duduh buang tŭkŭn darŭm roh; Aku re piranyah angān.

³⁰Amai pritah adi Aku nggen di angān sanang dog nurut ka pinyirabis adi Aku nggen sanang dog kabis.”