Read Biatah Bidayuh MATTHEW 12 Bible Online

MATTHEW 12 - Biatah Bidayuh bible

MATTHEW 12

¹ Dŭh tui ripas anŭ, Jesus panu mutas teya teya gandom di andu Sabbath. Bara murid-I sibŭrŭk, jadi ngara piguru kutas tundun gandom ka man.

²Kan bara daya Pharisee kiris, ngara nang di Ayŭh, “Tingga, bara murid Mai mbŭh miranggar Ukum-adat ta, ndai kayuh adi dŭh siŭn dog ndai di andu Sabbath!”

³ Jesus nam, “Bŭn kah angān basa kayuh adi David ndai kan ayŭh ngga bara dingan-i sibŭrŭk?

⁴ Ayŭh di ka darŭm ramin Tapa, ka ayŭh ngga bara dingan-i man ruti adi dog jugan ka Tapa, pŭn-i miranggar Ukum-adat nŭŭh man-i; ruti anŭ, kaŭs-i bara imam adŭ bisa man.

⁵ Puan kah mating kani angān basa darŭm Ukum-adat Moses nang barang andu Sabbath imam imam darŭm Ramin Tuhan agi gŭh miranggar ukum-adat Sabbath, pak gŭt-i ngara dŭh sarah?

⁶Aku kidaan di angān digiti agi kayuh adi rabis bās so Ramin Tuhan.

⁷ Surat-kudus nang, ‘Atin mandis inŭh Aku raan, dŭh-i sadis dāng.’ Kambŭi angān sawŭ puan rati kayuh anŭ, angān dŭh nyarah daya adi dŭh sarah;

⁸amai Anak Manusia inŭh adi biyŭn kuasa di tunduh andu Sabbath.”

⁹Jesus bu so nŭ di ka ramin simayang-Jahudi,

¹⁰di yŭn agi ndi naan daya adi mabŭs tangan-i. Kada daya adi raan nyarah Jesus mbŭh agi diginŭ, jadi ngara siken Ayŭh, “Miranggar Ukum-adat ta kah pibua daya di andu Sabbath?”

¹¹ Jesus nam, “Munki kambŭi ndi naan so angān biyŭn ndi biri, ka-i rabu darŭm rubang adi tŭrŭp di andu Sabbath? Dŭh kah ayŭh re tambit ka piruah biri anŭ so rubang?

¹²Ka manusia taŭn brega dŭ so biri! Ngapŭi meh, adat ta taŭn nyibandar ata turung daya di andu Sabbath.”

¹³Komŭnŭ Ayŭh nang di sianŭ adi mabŭs tangan-i, “Ton tangan mu.” Ayŭh ton tangan-i, ka-i mbŭh pari bua, mun tangan-i anŭ ndi.

¹⁴Komŭnŭ bara Pharisee anŭ bu ka bisatur munki ngara re siŭ Jesus.

¹⁵Kan Jesus dingah daya agi bipekat rawan adŭp-I, Ayŭh bu so tarun anŭ; ka bara daya bagŭ tunda Ayŭh. Ayŭh pibua sopŭrŭg adi birandam

¹⁶ka kidaan di ngara da dŭh pigarau di daya pasar adŭp-I.

¹⁷Ayŭh ndai simŭnŭ ngga bada jadi bitŭtŭk kayuh adi Tapa nang so baba nabi Isaiah:

¹⁸ “Ati inŭh Urun Ku, adi Aku ko mien, adi Aku rindu; di Ayŭh asŭng Ku munos. Aku re pait Roh Ku di Ayŭh, ka Ayŭh re kidaan pinyitŭnggŭn Ku di sopŭrŭg bangsa.

¹⁹Ayŭh dŭh re bikarit bait kah nyirais, puan kah minyu ngga sirŭŭn bana di aran passar.

²⁰Ayŭh dŭh re mata tŭngŭn reed adi miringe, bait mura prita adi bŭrŭp bŭrŭp, Ayŭh re bijijŭ ndŭg ka-I mbŭh bada pinyitŭnggŭn manang,

²¹ka di Ayŭh sopŭrŭg bangsa re na pingarap-i.”

²²Komŭnŭ kada daya taban ka yŭn Jesus ndi naan daya adi karak ka dŭh pandai minyu sabab mbŭh dog mŭrŭt umot. Jesus pibua daya anŭ ka-i rasu dapŭd minyu ka kiris tarun.

²³Bara daya bagŭ anŭ mbŭh inga inga di pingandai Jesus anŭ. “Dŭh ka Ayŭh Anak David?” ngara siken.

²⁴ Kan bara daya Pharisee dingah ati, ngara nam, “Ayŭh pibu umot sabab raja umot, Beelzebul mbŭh nggen di Ayŭh kuasa ngga ndai simŭnŭ.”

²⁵Jesus puan ani di pikir daya Pharisee, jadi Ayŭh nang di ngara, “Rais adi pape jadi bagŭ tibaran adi biperang dupan adŭp-i dŭh re tan tui. Ka kupo puan kah rawang adi pape jadi bagŭ tibaran adi biperang dupan adŭp-i re rubuh.

²⁶Simŭnŭ gŭh kambŭi ndi tibaran biperang ngga tibaran adi bŭkŭn darŭm pritah Shetan, rati-i ayŭh mbŭh pape jadi bagŭ tibaran ka re rikas rubuh!

²⁷Angān nang Aku pibu umot sabab Beelzebul mbŭh nggen di Aku kuasa ngga ndai simŭnŭ. Asi meh garang, nggen di bara pinunda ngan kuasa ngga pibu umot? Anŭ adi bara pinunda ngan ndai mbŭh kiren angān sarah!

²⁸Dŭh-i Beelzebul pak Roh Tapa, inŭh adi nggen di Aku kuasa ngga pibu umot; rati-i Tapa mbŭh piguru mritah[24] di ruang ngan.

²⁹“Mating daya tungang mŭrŭt ramin daya bake ka taban bu barang-i kambŭi ayŭh dŭh diŭ muak daya bake anŭ; muko ndai simŭnŭ ka ayŭh tungang gruga ramin-i.

³⁰ “Daya adi dŭh ngga Aku inŭh rawan Aku; daya adi dŭh turung Aku taŭn-i pirusak kraja pingandai Ku.

³¹Sabab anŭ meh Aku kidaan di angān; daya dapŭd dog apun so tadŭ mun dosa-i ka so tadŭ mun pinganang arap-i;[25] pak asi asi adi ngujat rawan Roh Kudus dŭh dapŭd dog apun.

³² Daya adi nang pinganang arap rawan Anak Manusia dapŭd dog apun; pak daya adi ngujat rawan Roh Kudus dŭh dapŭd dog apun, madin bait di tadŭ nga-i.

³³ “An dapŭd buwa adi kana angān dŭh siŭn dŭh biyŭn tŭngŭn adi kana; kambŭi biyŭn tŭngŭn adi arap angān re dapŭd buwa adi arap. Tŭngŭn pimuruh dapŭd dog natŭng so buwa-i.

³⁴ Angān jippŭh. Simuki angān bisa minyu kayuh kana kan adŭp ngan arap? Amai baba piruah anŭ adi so atin.

³⁵Daya adi kana piruah kayuh kana so adŭp-i adi taŭn puno ngga pinyikana; daya adi arap piruah kayuh arap so adŭp-i adi taŭn puno ngga kayuh arap.

³⁶“Ingat nŭh, di Andu Bisara barang naan daya re dapu tanggong di sopŭrŭg pinganang adi dŭh biguna adi-i ko piruah.

³⁷Pinganang adŭp ngan inŭh adi re dog pakai ngga tingga angān, sarah kah dŭh angān.”

³⁸ Komŭnŭ kada gurū Ukum-adat Jahudi samŭn kada daya Pharisee minyu, nang-i, “Gurū, kieh raan tingga Kaam ndai pingandai-nginga.”

³⁹ “Paŭh mbŭh arap buang dŭh stabi di Tapa inŭh daya jaman ati!” Jesus sigara. “Angān mite Aku ndai pingandai-nginga? Dŭh, dŭh bisa! Pingandai-nginga adi re dog nggen di angān adŭ-i pingandai-nginga nabi Jonah.

⁴⁰ Nimun Jonah rŭŭ darŭm tain tibande iken taruh andu taruh ngarŭm, simŭnŭ gŭh Anak Manusia re di rasan ong.

⁴¹ Di Andu Bisara daya so Nineveh re makat ka nyarah angān, sabab ngara marik pimudip ngara pari ka Tapa kan ngara dingah Jonah ngajar; ka Aku kidaan di angān, digiti agi kayuh adi rabis bās so Jonah!

⁴² Di Andu Bisara Rani so Sheba re makat ka nyarah angān, sabab ayŭh mandŭg so rais-i adi jo ramŭn an dingah pinyibijak ajar Raja Solomon; ka puan meh digiti agi kayuh adi rabis bās so Solomon!

⁴³“Kan roh arap ruah so daya, ayŭh bigandon di ndi tarun tana adi badŭh jiroh tarun yŭn rŭŭ. Kambŭi-i dŭh tungang dapŭd,

⁴⁴ayŭh nang di adŭp-i, ‘Aku re pari ka ramin adŭp ku.’ Jadi ayŭh sawŭ pari ka dapŭd ramin engan, bisig buang tirase.

⁴⁵Komŭnŭ ayŭh ruah ka taban ju roh adi bŭkŭn adi rabis arap so adŭp-i; ngara mandŭg ka rŭŭ diginŭ. Pinŭbŭn-i, daya anŭ mbŭh jadi rabis arap so adi mbŭh. Ati inŭh kayuh adi re jadi di daya adi arap di jaman ati.”

⁴⁶Jesus gi-aŭn minyu di daya kan sindŭ ngga bara jurud-I mandŭg. Ngara mijog di sapa, mite adŭp-i minyu ngga Jesus.

⁴⁷Jadi ndi naan so daya diginŭ nang di Ayŭh, “Tingga, sindŭ Mai ngga bara jurud Mai agi mijog di sapa, an minyu ngga Kaam.”[26]

⁴⁸Jesus nam, “Asi sindŭ Ku? Asi bara jurud Ku?”

⁴⁹Komŭnŭ Ayŭh tiju bara murid-I ka nang, “Tingga! Ngara ati inŭh sindŭ ngga bara jurud Ku!

⁵⁰Asi asi adi ndai pinyiraan Sama Ku adi di shorga inŭh jurud dari Ku, jurud dayung Ku, ka sindŭ Ku.”