Read Biatah Bidayuh MATTHEW 13 Bible Online

MATTHEW 13 - Biatah Bidayuh bible

MATTHEW 13

¹Di andu anŭ Jesus ruah so ramin anŭ, di ka bŭngŭn danu, di yŭn-I guru ka ngajar.

² Bara daya adi mandŭg tikuruk maning Ayŭh mbŭh raru bagŭ ndŭg ka Ayŭh mindah ka darŭm arud ka guru diginŭ, atan bara daya mijog di tabing.

³Ayŭh pakai upama ngga kidaan bagŭ masam kayuh di ngara. “Agi ndi sidah, ndi naan daya matak di nabur bine.

⁴Darŭm ayŭh nabur bine, kada-i rabu di aran, ka manuk mandŭg di man-i.

⁵Kada-i rabu di tarun pibatuh, di yŭn kurang tana. Bine anŭ rasu timbu, sabab tana dŭh tŭrŭp.

⁶Pak kan batŭh andu makat, ayŭh dog paras sura; ka sabab uat-i dŭh tŭrŭp, ayŭh rayu ka kabŭs.

⁷Kada bine rabu di ruang reja, adi timbu ka piaka ayŭh.

⁸Pak kada bine rabu di tana mandis, ka ayŭh piruah bagŭ buwa: kada-i biyŭn siratus rupet, adi bŭkŭn nŭm puru, ka adi bŭkŭn taruh puru.”

⁹Ka Jesus meh nang, “Dingah meh garang, kambŭi angān biyŭn kajit!”

¹⁰Komŭnŭ bara murid tudu Jesus ka siken Ayŭh, “Mani Kaam pakai upama kan Kaam minyu ngga bara daya?”

¹¹Jesus nam, “Kuasa ngga puan rusia pasar munki Tapa mritah[27] mbŭh dog nggen di angān, pak dŭh di ngara.

¹² Amai daya adi mbŭh biyŭn kayuh re dog nggen bagŭ, isa ayŭh biyŭn rabis so sadang; pak sianŭ adi dŭh biyŭn ani ani sirabi ka rapuh kayuh adi-i biyŭn re dog tambit gŭh so ayŭh.

¹³Aku pakai upama ngga minyu ngga ngara amai kan ngara tingga, ngara dŭh kiris, ka kan ngara nyiringa, ngara dŭh dingah puan kah mirati.

¹⁴ Jadi pinganang-binabi Isaiah mbŭh jadi bitŭtŭk pasar ngara: ‘Daya ati dingah ka dingah, pak dŭh-i mirati; ngara tingga ka tingga, pak dŭh-i kiris,

¹⁵sabab pikir ngara madŭd, ka ngara mbŭh mapot kajit-i buang mbŭh nutu batŭh-i. Kambŭi dŭh simŭnŭ, batŭh ngara kiris, kajit ngara dingah, pikir ngara mirati, ka ngara an pari ka Aku, Tapa nang, ka Aku pibua ngara.’

¹⁶ “Mun angān, mbŭh raru binasip! Batŭh ngan kiris ka kajit ngan dingah.

¹⁷Puan meh! Mbŭh bagŭ nabi samŭn daya adi ndai pinyiraan Tapa gruwŭn an kiris kayuh adi angān kiris, pak dŭh tungang, ka raan dingah kayuh adi angān dingah, pak dŭh gŭh tungang.

¹⁸“Dingah meh garang, ka birajar ani rati-i upama daya nabur bine.

¹⁹Ngara adi dingah agah pasar munki Tapa mritah pak dŭh mirati-i agi keya ka bine adi rabu di aran. Siarap mandŭg ka sirapas anŭ adi dog purun darŭm ngara.

²⁰Bine adi rabu di tana pibatuh rati-i ngara adi rasu ngga sanang asŭng-i trima agah anŭ kan ngara dingah-i.

²¹Pak-i dŭh mŭrŭt tŭrŭp ka darŭm ngara, ka ngara dŭh tan tui. Jadi kan pinyusah ngga pinyikisiis mandŭg sitagar agah anŭ, ngara jimŭ ka dŭh tia sabah dieh.

²²Bine adi rabu di ruang reja rati-i ngara adi dingah agah anŭ; pak pinyusah pasar pimudip di ong ati ngga pinyirindu di pinyikaya piaka agah anŭ, ka ngara dŭh buān.

²³Ka bine adi dog nabur di tana mandis rati-i ngara adi dingah agah anŭ ka mirati-i: ngara buān, kada-i mbŭh siratus bagŭ-i, adi bŭkŭn nŭm puru, ka adi bŭkŭn taruh puru.”

²⁴Jesus kidaan di ngara upama adi bŭkŭn: “Kan Tapa mritah,[28] kayuh agi keya ka ndi naan daya adi nabur bine di ŭmŭh.

²⁵Ndi ngarŭm, kan sopŭrŭg daya mbŭh bŭŭs, pinganyu mandŭg ka purun uduh di dupan gandom ka rasu bu.

²⁶Kan bine mbŭh timbu ka piguru pijadi tundun gandom, nganŭ gŭh uduh tatŭng.

²⁷Daya-gaji daya anŭ mandŭg ka nang di ayŭh, ‘Tuan, bine adi kana inŭh adi kaam nabur di ŭmŭh mai; so ki meh uduh anŭ mandŭg?’

²⁸‘Anŭ mbŭh pingandai pinganyu,’ ayŭh nam. ‘An kah kaam bada kieh di dimbut uduh anŭ?’ ngara siken ayŭh.

²⁹‘Dŭhnyah,’ ayŭh nam, ‘Sabab darŭm angān dimbut uduh angān dimbut gŭh kada gandom rai-i.

³⁰Tandah gandom ngga uduh samah timbu ndŭg tipuh ngatŭm. Nganŭ aku re kidaan di bara adi tukang ngatŭm da dimbut uduh diŭ, mŭŭng-i ka badang-i, ka komŭnŭ di nguruk gandom ka na-i di panggau ku.’ ”

³¹[29] Jesus kidaan di ngara upama adi bŭkŭn: “Kan Tapa mritah, kayuh agi keya ka ndi sirah ruwang sabi dog purun di ŭmŭh.

³²Ati inŭh adi siabo siit ruwang, pak kan-i timbu, ayŭh jadi siabo bigatung. Ayŭh jadi tŭngŭn kayuh, ndŭg ka manuk mandŭg ndai sarin di daan-i.”

³³Jesus kidaan dinge di ngara upama adi bŭkŭn: “Kan Tapa mritah, kayuh agi keya ka ndi naan dayung adi tambit kada ragi ka kunyu-i ngga pat puru lita tibaduk ndŭg ka kambang.”

³⁴Jesus pakai upama ngga kidaan sopŭrŭg kayuh ati di bara daya bagŭ anŭ; dŭh-I an nang kayuh di ngara kambŭi dŭh pakai upama.

³⁵ Ayŭh ndai simŭnŭ ngga-I bada bitŭtŭk kayuh adi nabi ko nang, “Aku re pakai upama kan Aku minyu ngga ngara; Aku re kidaan di ngara kayuh kayuh adi dŭh dog puan so sibungas ong dog napa.”

³⁶Kan Jesus mbŭh bu tingge bara daya bagŭ anŭ ka mbŭh mŭrŭt ka darŭm arŭn, bara murid-I tudu Ayŭh ka nang, “Kidaan di kieh ani rati-i, upama pasar uduh di ŭmŭh.”

³⁷Jesus nam, “Daya anŭ adi nabur bine adi kana inŭh Anak Manusia;

³⁸ŭmŭh inŭh ong; bine adi kana inŭh bara daya adi Tapa mbŭh mien; uduh inŭh daya adi dog dapu Siarap;

³⁹ka pinganyu adi purun uduh inŭh Siarap. Pingatŭm inŭh Andu Sikasŭn, ka bara adi tukang ngatŭm inŭh bara malaikat.

⁴⁰Nimun uduh dog nguruk ka dog badang di apui, simŭnŭ inŭh kayuh re di Andu Sikasŭn:

⁴¹Anak Manusia re pait bara malaikat-I da kadi so dupan daya adi-I ko mien sinadan adi bada daya bidosa samŭn adi ndai kayuh arap,

⁴²ka ngara re taran ngara ka darŭm buwang apui, di yŭn ngara re sien buang sangsara.

⁴³Komŭnŭ bara daya adi ndai pinyiraan Tapa re nyirinyak mun batŭh andu darŭm Ong Bauh Tapa, adi Sama ngara. Dingah meh garang, kambŭi angān biyŭn kajit!

⁴⁴“Kan Tapa mritah, kayuh agi keya ka ndi naan daya adi tipia dapŭd rata adi dog sukan di tana. Ayŭh pari kubur-i, ka buang-i mbŭh raru gaŭn ayŭh di jua sopŭrŭg kayuh adi-i biyŭn, ka maad di miris tana anŭ.

⁴⁵“Kan Tapa mritah, kayuh agi keya ka ndi naan daya jiroh mutiara adi sukup kana,

⁴⁶ka kan-i mbŭh dapŭd anŭ adi nyaruh kana, ayŭh di jua sopŭrŭg kayuh adi-i biyŭn, ka miris mutiara anŭ.

⁴⁷“Kan Tapa mritah, kayuh agi keya ka pinakap pinakap iken kibar jara ngara di danu ka nakap barang masam iken.

⁴⁸Kan jara ngara mbŭh puno, ngara tarik-i ka deyŭh ka guru kutung iken anŭ: adi kana dog na darŭm bradi, adi dŭh biguna ngara taran.

⁴⁹Simŭnŭ inŭh kayuh re di Andu Sikasŭn: bara malaikat re mandŭg di nguruk daya adi arap so dupan bara adi ndai pinyiraan Tapa.

⁵⁰Ka ngara adi arap ngara re taran ka darŭm buwang apui, di yŭn ngara re sien buang sangsara.

⁵¹“Mirati ngan kah kayuh kayuh ati?” Jesus siken ngara. “Mirati,” ngara nam.

⁵²Jadi Ayŭh nam, “Sirati-i inŭh meh, barang naan gurū Ukum-adat Jahudi adi mbŭh trima ajar pasar Pinyipritah Tapa,[30] mbŭh keya ka tuan ramin adi piruah kayuh bauh ngga kayuh amba so darŭm birit pinyirikŭn-i.”

⁵³Kan Jesus muko kidaan upama upama anŭ, Ayŭh bu so nŭ

⁵⁴ka pari ka kupo adŭp-I. Ayŭh ngajar di ramin simayang-Jahudi, ka sinadan daya adi dingah Ayŭh mbŭh inga inga di ajar-I. “So ki Ayŭh dapŭd pinyibijak adi mun anŭ?” ngara siken. “Ka so ki kuasa adi ngga-I ndai pingandai-nginga anŭ?

⁵⁵Dŭh kah Ayŭh anak daya tukang-kayuh? Dŭh kah Mary sindŭ-I, ka dŭh kah James, Joseph, Simon ka Judas bara jurud-I?

⁵⁶Dŭh kah sopŭrŭg jurud dayung-I agi rŭŭ digiti? So ki meh Ayŭh dapŭd sopŭrŭg kayuh ati?”

⁵⁷ Ka ngara meh rasu tirawan Ayŭh. Jesus nang di ngara, “Nabi dog stabi di barang yŭn adŭ-i di kupo adŭp-i ka di dupan rawang adŭp-i.”

⁵⁸Sabab ngara dŭh sabah di Ayŭh, Jesus dŭh ndai pingandai-nginga diginŭ.