Read Biatah Bidayuh MATTHEW 15 Bible Online

MATTHEW 15 - Biatah Bidayuh bible

MATTHEW 15

¹Komŭnŭ kada daya Pharisee ngga gurū gurū Ukum-adat Jahudi mandŭg so Jerusalem ka siken Ayŭh,

²“Mani bara murid Mai nyibireu ajar tayung-babuk ta? Ngara dŭh mbe tunda atur adat sibayuh ngara man!”

³Jesus nam, “Ka mani angān nyibireu pinyipesan Tapa ka tunda ajar adŭp ngan?

⁴ Tapa nang, ‘Stabi di sindŭ sama ngan,’ ka ‘Daya adi mangu sindŭ sama-i dŭh siŭn dŭh dog ukum kabŭs.’

⁵Pak angān ngajar: Kambŭi daya nang di sindŭ sama-i, ‘Kayuh adi aku patut pakai ngga turung sindŭ ngga sama, mbŭh aku jugan ka Tapa,’

⁶ka daya anŭ dŭhsah stabi di sama-i.[31] Simŭnŭ inŭh angān dŭh piduri pinyipesan Tapa, ramŭn an tunda ajar adŭp ngan.

⁷Angān pingadong! Mbŭh raru batur-i Isaiah kan ayŭh minyu-binabi pasar angān!

⁸ ‘Bara daya ati, Tapa nang, kibās Aku ngga baba-i, pak atin-i sawŭ jo so Aku.

⁹Mating guna ngara nyambah Aku, sabab ngara ngajar atur manusia bada-i mun ukum ukum-adat Ku!’ ”

¹⁰Komŭnŭ Jesus bagan bara daya bagŭ ka adŭp-I ka nang di ngara, “Dingah ka mirati meh!

¹¹Dŭh-i kayuh adi mŭrŭt baba adi kinais daya; pak kayuh adi ruah so baba, anŭ inŭh adi kinais daya.”

¹²Komŭnŭ bara murid tudu Ayŭh ka nang, “Puan Mai, bara Pharisee naman pinganang Mai anŭ?”

¹³“Barang tŭngŭn kayuh adi Sama Ku adi di shorga dŭh purun re dog dimbut,” nam Jesus.

¹⁴ “Dŭhnyah piduri ngara! Ngara anŭ pinguru adi karak yŭn bara adi karak; kan ndi naan daya karak kayak ndi naan daya karak, soduwŭh-i re rabu darŭm parit.”

¹⁵Peter minyu, nang-i, “Kidaan rati pinganang anŭ di kieh.”

¹⁶Jesus nang di ngara, “Angān ati bara pinunda Ku pak angān mbŭh dŭh mbŭh so daya bŭkŭn, dŭh mirati kayuh.

¹⁷Dŭh kah angān mirati? Kayuh adi mŭrŭt baba daya radus ka tain daya ka komŭnŭ kayuh anŭ ruah so pŭrŭng-i.

¹⁸ Pak kayuh adi ruah so baba daya mandŭg so atin-i, ka kayuh ati inŭh adi kinais daya.

¹⁹Amai so atin daya mandŭg pikir-kira adi arap adi bada ayŭh siŭ daya, tanggah, ka ndai barang masam pingandai kais; mirupak, kadong, ka napŭ daya.

²⁰Kayuh kayuh anŭ inŭh adi bada daya kais. Pak man dŭh mbe nunda ka atur adi ngara nang, dŭh-i bada daya kais.”

²¹Jesus bu so nŭ ka matak ka tarun tana sindŭk kupo kupo Tyre ngga Sidon.

²²Ndi naan dayung daya Canaan adi rŭŭ di tarun anŭ mandŭg tudu Jesus. “Anak David!” ayŭh bagan. “Masi di aku, Tuan! Anak dayung ku dog mŭrŭt umot ka mbŭh raru sangsara-i.”

²³Pak Jesus dŭh nang ani ani di ayŭh. Bara murid-I tudu Ayŭh ka mite, “Pibu ayŭh! Ayŭh tunda ata buang bidudu adŭ!”

²⁴Jesus nang di dayung anŭ, “Aku dog pait adŭ-i yŭn daya Israel adi keya ka biri adi manyap.”

²⁵Dingah sakanŭ, dayung anŭ nyindŭk Jesus ka sidikang di kaja-I. “Turung aku, Tuan!” ayŭh nang.

²⁶Jesus nam, “Dŭh-i patut nŭŭh tambit pinguman anak-sŭ ka taran-i ka kasong.”

²⁷“Anŭ sawŭ, Tuan,” dayung anŭ nam, “pak kasong man gŭh rapuh tadŭh pinguman adi rabu so mija tuan-i.”

²⁸Jadi Jesus nam ayŭh, “Kuu dayung adi raru sabah di Aku! Kayuh adi kuu raan re dog ndai yŭn mu.” Ka di jam anŭ gŭh anak dayung-i bua.

²⁹Jesus bu so nŭ ka panu kadŭg bŭngŭn Danu Galilee. Ayŭh maad sandah ka guru.

³⁰Bara daya bagŭ mandŭg tudu Ayŭh, taban daya adi bajang, adi karak, adi kipang, adi dŭh pandai minyu, ka bagŭ daya adi birandam adi bŭkŭn, adi ngara na di kaja Jesus; ka Ayŭh pibua ngara.

³¹Daya mbŭh inga inga buang bipikir kan ngara kiris daya adi dŭh pandai minyu dapŭd minyu, adi kipang bua, adi bajang dapŭd panu, ka adi karak dapŭd kiris; ka ngara meh muji Tapa daya Israel.

³²Jesus bagan bara murid-I da tudu adŭp-I ka nang, “Aku masi kiris bara daya ati, sabab ngara mbŭh taruh andu ngga Aku digiti ka madin ngara mbŭh dŭh biyŭn kayuh man. Aku dŭh an bada ngara bu dŭh man, sibia-i ngara mijŭp di aran.”

³³Bara murid siken ayŭh, “So ki ata re dapŭd sukup pinguman di tarun tana-pajam ati ngga paan bara daya ati?”

³⁴“Kudu baru ruti angān biyŭn?” Jesus siken. “Ju baru,” ngara nam, “ka agi nisŭ iken adi anŭk.”

³⁵Jadi Jesus bada bara daya guru di tana.

³⁶Komŭnŭ Ayŭh tambit ju baru ruti samŭn iken anŭ, nggen trima kaseh di Tapa, mire-i, ka nggen-i di bara murid; ka bara murid nggen-i di daya.

³⁷Sopŭrŭg ngara man ka mbŭh bisoh. Komŭnŭ bara murid sun ka ngisi ju bakur puno ngga tadŭh tadŭh ruti ka iken anŭ.

³⁸Kiang bara dari adi man agi pat ribu naan, dŭh ngitong bara dayung ngga anak-anya.

³⁹Ko anŭ Jesus bada daya mari, ka adŭp-I mŭrŭt arud, ka matak ka tarun tana Magadan.