Read Biatah Bidayuh MATTHEW 17 Bible Online

MATTHEW 17 - Biatah Bidayuh bible

MATTHEW 17

¹ Nŭm andu ripas anŭ Jesus ngaja Peter samŭn James ngga John adi bijurud, ka taban ngara maad ndi darŭd adi bigatung di yŭn ngara re sadi.

²Darŭm ngara tingga, Jesus birubah: jawin-I nyirinyak mun batŭh andu, ka piraka-I jadi buda ngasad.

³Komŭnŭ ngara taruh kiris Moses ngga Elijah minyu ngga Jesus.

⁴Jadi Peter minyu, nang-i di Jesus, “Tuhan, mbŭh raru kana inŭh kieh agi digiti! Kambŭi Kaam raan, aku an ndai taruh bari digiti, ndi yŭn Mai, ndi yŭn Moses, ka ndi yŭn Elijah.”

⁵ Darŭm ayŭh minyu, abun adi jawa mandŭg ka nyayung ngara, ka sirŭŭn so abun nang, “Ati inŭh Anak nyirot Ku, di Ayŭh asŭng Ku munos; dingah pinganang-I!”

⁶Kan murid murid anŭ dingah sirŭŭn anŭ, ngara mbŭh raru taru ka sipŭŭb di tana.

⁷Jesus tudu ngara ka tama ngara. “Makat,” Ayŭh nang. “Dŭhnyah taru!”

⁸Ngara kimat ka kiris mating daya adŭ-i Jesus.

⁹Darŭm ngara mūn darŭd, Jesus pesan ngara, “Dŭhnyah kidaan di tadŭ tadŭ daya kayuh adi angān bauh ko kiris ndŭg ka Anak Manusia mbŭh dog pakat so kabŭs.”

¹⁰ Murid murid siken Jesus, “Mani bara gurū Ukum-adat Jahudi nang Elijah dŭh siŭn dŭh mandŭg diŭ?”

¹¹“Elijah taŭn sawŭ mandŭg diŭ,” nam Jesus, “ka ayŭh re bada sopŭrŭg kayuh dog sidia.

¹² Pak Aku kidaan di angān, Elijah mbŭh mandŭg ka daya dŭh natŭng ayŭh pak ndai di tunduh-i nanyam suka asŭng ngara. Simŭnŭ gŭh ngara re pijera Anak Manusia.”

¹³Ka-i meh murid murid anŭ mirati Ayŭh minyu ngga ngara pasar John Pembaptisa.

¹⁴Kan ngara pari ka yŭn bara daya bagŭ, ndi naan daya mandŭg tudu Jesus, rasu sidikang di sirung jawin-I

¹⁵ka nang, “Tuan, masi di anak dari ku! Ayŭh dog andam nyisŭt, ka ari tumbang di apui puan kah di piin kan andam anŭ nyerang ayŭh.

¹⁶Aku taban ayŭh ka yŭn bara murid Mai, pak ngara dŭh tungang pibua ayŭh.”

¹⁷Jesus nam, “Angān manusia adi kurang sabah ka adi manyap! Ndŭg sinde meh Aku dŭh siŭn dŭh rŭŭ ngga angān? Ndŭg sinde Aku patut bijijŭ ngga angān? Taban anak anŭ kamati ka yŭn Ku!”

¹⁸Jesus mritah umot anŭ, ka-i ruah so anak anŭ, ka di jam anŭ gŭh ayŭh mbŭh bua.

¹⁹Komŭnŭ bara murid tudu Jesus kan ngara mbŭh sadi ka siken Ayŭh, “Mani kieh dŭh tungang pibu umot anŭ?”

²⁰ “Angān dŭh tungang sabab angān kurang sabah di Tapa,” Jesus nam. “Puan meh! Kambŭi angān biyŭn pinyabah mati sirah ruwang sabi, angān bisa nang di sandah ati, ‘Sigen adŭp mu kamajeh!’ ka-i sawŭ sigen adŭp-i. Tungang angān ndai tadŭ tadŭ kayuh!”

²¹Pak kaŭs simayang ngga bipusa adŭ tungang pibu umot; mating kayuh bŭkŭn tungang.][34]

²²Kan sopŭrŭg murid mbŭh samah mandŭg tikuruk di Galilee, Jesus nang di ngara, “Anak Manusia mbŭh re dog nyerah ka tangan ngara

²³adi re siŭ Ayŭh; pak taruh andu ripas anŭ Ayŭh re dog pakat udip bauh.” Bara murid mbŭh raru susah.

²⁴ Kan Jesus ngga bara murid-I mandŭg ka Capernaum, bara tukang sun suke Ramin Tuhan tudu Peter ka siken, “Bayar Gurū ngan kah suke Ramin Tuhan?”

²⁵“Bayar-I”, Peter nam. Kan Peter mŭrŭt ramin, Jesus minyu diŭ, “Peter, ani di pikir mu? Asi bayar suke ka raja raja di ong ati? Rayat di darŭm rais kah daya tami?”

²⁶“Daya tami,” Peter nam. “Kambŭi sakanŭ,” nam Jesus, “Rati-i rayat darŭm rais dŭhsah bayar suke.

²⁷Ata dŭh an nggen mangŭh di daya. Di ka danu ka tŭŭn pisis. Tambit sibungas iken adi nakap pisis mu, ka di baba-i kuu re dapŭd ndi kiping duit dang ngga bayar suke Ramin Tuhan ta duwŭh. Tambit-i ka bayar di ngara suke ta.”