Read Biatah Bidayuh MATTHEW 2 Bible Online

MATTHEW 2 - Biatah Bidayuh bible

MATTHEW 2

¹Jesus dog biranak di kupo Bethlehem di Judea, di jaman raja Herod. Komŭnŭ, agi kada daya adi birajar pasar bitang mandŭg so Timor ka Jerusalem,

²ka siken, “Diki sipira anŭ dog biranak adi re jadi raja daya Jahudi? Kieh agi kiris bitang-I tatŭng di timor, ka kieh meh mbŭh mandŭg an nyambah Ayŭh.”

³Kan Raja Herod dingah kayuh anŭ, ayŭh mbŭh raru susah, ka simŭnŭ gŭh barang naan daya bŭkŭn di Jerusalem.

⁴Ayŭh bagan bada tikuruk sopŭrŭg pingubak imam ka gurū gurū Ukum-adat Jahudi ka siken, “Diki Raja adi Tapa ko bijanji an pait[1] re dog biranak?”

⁵“Di kupo Bethlehem di Judea,” ngara nam. “Amai anŭ inŭh kayuh adi nabi ko nuris:

⁶ ‘Bethlehem di tarun tana Judah, kuu ngaŭn dŭh siabo sŭ dupan sopŭrŭg kupo bās di Judah; amai so kuu re mandŭg ndi naan pinguru adi re nyiruton daya Ku Israel.’ ”

⁷Jadi Herod bagan bara pinami anŭ adi so Timor bada bidapŭd ngga adŭp-i darŭm bisukan, ka natu ngga ngara sinde bitang anŭ tatŭng.

⁸Komŭnŭ ayŭh pait ngara ka Bethlehem ngga pinganang sakati: “Panu di nakit jiroh Anak anŭ; ka kan angān dapŭd Ayŭh, kidaan di aku, isa aku bisa gŭh di sua nyambah Ayŭh.”

⁹Ka ngara sawŭ di, ka di aran ngara kiris bitang anŭ adi ngara ko kiris di Timor. Kan ngara kiris-i, munki masam graŭh buang gaŭn ginanyŭn-i ngara! Bitang anŭ panu diŭ so ngara ndŭg ka-i mbŭh rŭŭ nyirungan tarun yŭn Anak anŭ.

¹¹Ngara mŭrŭt ramin anŭ, ka kan ngara kiris Anak anŭ ngga sindŭ-I Mary, ngara sidikang ka nyambah Ayŭh. Ngara kisak pinganggen ka jugan mas, kimanyan, ngga myrrh ka Ayŭh.

¹²Komŭnŭ ngara pari ka rais adŭp ngara kadŭg aran bŭkŭn, amai Tapa ko bakan ngara darŭm pŭmŭh da dŭh pari ka Herod.

¹³Kan ngara mbŭh bu, malaikat Tuhan nandŭng darŭm pŭmŭh di Joseph ka nang, “Herod re jiroh Anak anŭ, an siŭ Ayŭh. Ngapŭi makat meh, taban Anak anŭ ngga sindŭ-I bu ka Egypt, ka rŭŭ diginŭ ndŭg ka Aku bada kuu bu so nŭ.”

¹⁴Joseph makat, tambit Anak anŭ ngga sindŭ-I, ka bu singarŭm ka Egypt,

¹⁵ di yŭn ngara rŭŭ ndŭg ka Herod mbŭh kabŭs. Ayŭh mbŭh simŭnŭ ngga bada bitŭtŭk kayuh adi Tuhan ko nang so baba nabi, “Aku bagan Anak Ku da ruah so Egypt.”

¹⁶Kan Herod rada bara pinami so Timor kadong adŭp-i, ayŭh mbŭh raru baji. Ayŭh nggen ukum bada sopŭrŭg anak dari di Bethlehem samŭn di tarun tana maning anŭ adi mbŭh duwŭh sawa ngga adi mara dog siŭ. Ayŭh ndai simŭnŭ nanyam ka pinyidapŭd-i so bara pinami anŭ pasar jam adi ngga bitang anŭ tatŭng.

¹⁷Simŭnŭ inŭh kayuh adi nabi Jeremiah ko nang jadi bitŭtŭk:

¹⁸ “Agi dog dingah di Ramah, sirŭŭn muās bana. Rachel sien nyibara bara anak-i; abah-i dog nyaduh, amai bara anak-i mbŭh mating.”

¹⁹Kan Herod mbŭh kabŭs, malaikat Tuhan nandŭng darŭm pŭmŭh di Joseph di Egypt

²⁰ka nang, “Makat, tambit Anak anŭ samŭn sindŭ-I, ka pari ka tarun tana Israel, sabab ngara adi ko suba an siŭ Anak anŭ mbŭh abo kabŭs.”

²¹Jadi Joseph makat, taban Anak anŭ ngga sindŭ-I, ka pari ka Israel.

²²Pak kan Joseph dingah Archelaus mbŭh gati sama-i Herod jadi raja di Judea, ayŭh taru di kamanŭ. Ayŭh trima bagŭ pinganang darŭm pŭmŭh, jadi ayŭh di ka utung rais Galilee

²³ ka piramin di kupo dŭn Nazareth. Ka sawŭ kayuh adi nabi nabi ko nang mbŭh jadi bitŭtŭk: “Ayŭh re dog kadŭn daya Nazareth.”