Read Biatah Bidayuh MATTHEW 4 Bible Online

MATTHEW 4 - Biatah Bidayuh bible

MATTHEW 4

¹ Komŭnŭ Roh Kudus taban Jesus ka tarun tana-pajam yŭn dog suba Siarap.

²Ripas pat puru andu pat puru ngarŭm dŭh man, Jesus sibŭrŭk.

³Komŭnŭ Siarap mandŭg tudu Ayŭh ka nang, “Kambŭi Kaam Anak Tapa, mritah batuh batuh ati da jadi ruti.”

⁴ Pak Jesus nam, “Surat-kudus nang, ‘Manusia dŭh udip ngga ruti adŭ, pak biguna di barang bang piminyu adi ruah so baba Tapa.’ ”

⁵Komŭnŭ Siarap taban Jesus ka Jerusalem, Kupo kudus, na Ayŭh di tibung Ramin Tuhan,

⁶ ka nang di Ayŭh, “Kambŭi Kaam Anak Tapa, buan adŭp Mai, amai Surat-kudus agi nang: ‘Tapa re mritah malaikat-I da kingat Kaam; ngara re digŭng Kaam ngga tangan ngara, isa sirabi ka kaja Mai dŭh gŭh re kinaman dog batuh.’ ”

⁷ Jesus nam, “Pak Surat-kudus agi gŭh nang, ‘Dŭhnyah suba Tuhan adi Tapa mu.’ ”

⁸Komŭnŭ Siarap taban Jesus ka ndi darŭd adi raru bigatung ka kiren di Ayŭh pritah pritah ong ngga sopŭrŭg sangŭn-i.

⁹“Sopŭrŭg ati aku an nggen di Kaam,” Siarap nang, “kambŭi Kaam sidikang ka nyambah aku.”

¹⁰ Ka Jesus nam, “Bu, Shetan! Surat-kudus nang, ‘Nyambah Tuhan adi Tapa mu ka bituan di Ayŭh adŭ!’ ”

¹¹Komŭnŭ Siarap bu tingge Jesus; ka malaikat malaikat mandŭg di turung Ayŭh.

¹² Kan Jesus dingah John mbŭh dog jer, Ayŭh bu ka Galilee.

¹³ Ayŭh dŭh rŭŭ di Nazareth, pak matak di rŭŭ di Capernaum, kupo di bŭngŭn Danu Galilee, di tarun tana Zebulun ka Naphtali.

¹⁴Kayuh ati jadi ngga bada bitŭtŭk kayuh adi nabi Isaiah ko nang,

¹⁵ “Tana Zebulun ngga tana Naphtali, di aran nuju rawŭt, di pah mandi Yang Jordan, Galilee, tarun tana daya adi dŭh bangsa Jahudi!

¹⁶Daya adi udip darŭm karŭm re kiris jawa bās. Di ngara adi udip di rais adi dog kinarŭm pinyikabŭs jawa anŭ re nyekar.”

¹⁷ So nganŭ Jesus piguru nyuse ajar-I: “Dŭh tia bidosa pak marik pimudip ngan pari ka Tapa, sabab dŭm dŭh tui Tapa re mritah!”[3]

¹⁸Darŭm Jesus panu kadŭg bŭngŭn Danu Galilee, Ayŭh kiris duwŭh naan bijurud adi pinakap iken, Simon (adi dog kadŭn Peter) ngga jurud-i Andrew, nakap iken ngga jaring di danu.

¹⁹Jesus nang di ngara, “Ja tunda Aku, Aku re ngajar angān nakap manusia.”

²⁰Jam anŭ gŭh ngara tingge jaring ka tunda Ayŭh.

²¹Ayŭh panu dinge ka kiris adi bŭkŭn, duwŭh naan bijurud, James ngga John, anak Zebedee. Ngara aŭn darŭm arud ayō sama ngara Zebedee, sidia jaring. Jesus bagan ngara,

²²ka jam anŭ gŭh ngara tingge arud samŭn sama ngara, ka tunda Ayŭh.

²³ Jesus panu di ndi tarun tana Galilee, ngajar di ramin ramin simayang-Jahudi, nyuse Agah Kana pasar dŭm dŭh tui Tapa re mritah, ka pibua bagŭ daya adi naman barang masam andam ka udar.

²⁴Agah pasar Ayŭh kambang di ndi tarun tarun tana rais Syria, ndŭg ka daya taban ka yŭn-I sinadan adi birandam adi naman barang masam andam ngga pinyusah: daya adi dog mŭrŭt umot, adi nyisŭt, ka adi naman andam ruku. Jesus pibua sopŭrŭg ngara.

²⁵Bara bara daya bagŭ tunda Ayŭh so Galilee ka so Kupo-Simŭng, so Jerusalem, Judea, ka so tarun tana di pah mandi Yang Jordan.