Read Biatah Bidayuh MATTHEW 5 Bible Online

MATTHEW 5 - Biatah Bidayuh bible

MATTHEW 5

¹Jesus kiris bara daya bagŭ anŭ ka maad sandah ka guru.[4] Bara murid-I tikuruk maning Ayŭh,

²ka-I piguru ngajar ngara:

³“Sanang inŭh ngara adi puan adŭp-i biguna di Tapa; ngara inŭh adi kinyam Pinyipritah Tapa![5]

⁴ Sanang inŭh ngara adi ngurid; Tapa re nyaduh ngara!

⁵ Sanang inŭh ngara adi pirapat adŭp-i; ngara re kambat kayuh adi Tapa ko bijanji an nggen!

⁶ Sanang inŭh ngara adi gruwŭn adŭp-i ndai pinyiraan Tapa; Tapa re pimunos ngara ngga sipuno-i!

⁷Sanang inŭh ngara adi masi di daya; Tapa re masi di ngara!

⁸ Sanang inŭh ngara adi bisig di atin-i; ngara re kiris Tapa!

⁹Sanang inŭh ngara adi taban damai di dupan daya; Tapa re kadŭn ngara bara anak-I!

¹⁰ Sanang inŭh ngara adi dog kisiis sabab ngara ndai pinyiraan Tapa; ngara inŭh adi kinyam Pinyipritah Tapa.

¹¹ “Sanang inŭh angān kan daya pimangŭh angān, kisiis angān ka napŭ angān sabab angān pinunda Ku.

¹² Sanang ka gaŭn meh angān, amai upah bās agi kajŭn angān di shorga. Simŭnŭ inŭh nabi nabi adi diŭ so angān dog kisiis.

¹³ “Angān mbŭh keya ka garo yŭn sopŭrŭg manusia. Pak kambŭi garo mbŭh dŭh tia pide, mating aran re bada-i pide dinge. Ayŭh mbŭh dŭh tia biguna, ayŭh dog taran ka dog digang.

¹⁴ “Angān mbŭh keya ka sekar jawa yŭn ndi ong ong. Kupo adi dog pijog di tunduh sandah dŭh bisa dog sukan.

¹⁵ Mating daya tung prita ka na-i di ribo sambong; na-i di tunduh rika prita kidŭ-i, di yŭn-i nggen jawa di barang naan daya di ramin.

¹⁶ Simŭnŭ gŭh jawa ngan dŭh siŭn dŭh nyirinyak di sirung jawin daya, isa ngara kiris kraja kana ngan ka muji Sama ngan di shorga.

¹⁷“Dŭhnyah angān pikir Aku mandŭg an taran Ukum-adat Moses ka ajar bara nabi. Aku dŭh mandŭg an taran-i, pak an bada ajar ngara jadi bitŭtŭk.

¹⁸ Ingat nŭh, siragi rangit ngga ong babŭ agi, ndi titik puan kah ndi batŭh turis adi siabo siit di Ukum-adat dŭh re dog taran sibayuh pimungan sopŭrŭg kayuh.[6]

¹⁹Jadi meh, asi asi adi nyibireu sirabi ka Pinyipesan adi siabo kurang biguna ka ngajar daya bŭkŭn da ndai simŭnŭ, re jadi siabo kurang biguna di dupan ngara adi kinyam Pinyipritah Tapa. Pak ngara adi sita Ukum-adat ka ngajar daya bŭkŭn da ndai simŭnŭ, re jadi bās di dupan ngara adi kinyam Pinyipritah Tapa.

²⁰Aku kidaan di angān meh garang, nang angān re tungang kinyam Pinyipritah Tapa adŭ-i kambŭi angān rabis tŭtŭd so bara gurū Ukum-adat Jahudi ka bara daya Pharisee darŭm angān ndai pinyiraan Tapa.

²¹ “Angān agi dingah daya jah dog kidaan, ‘Dŭhnyah siŭ daya; asi asi adi siŭ daya re dog bisara.’

²²Pak madin Aku kidaan di angān: kambŭi angān baji[7] di jurud ngan, angān re dog bisara; kambŭi angān nang di jurud ngan ‘Kuu dŭh biguna!’ angān re dog taban ka Kunsil, ka kambŭi angān nang jurud ngan sibudo adi dŭh biguna, angān re dog taran ka apui neraka.

²³Jadi kambŭi darŭm angān aŭn re jugan pinganggen ngan ka Tapa di mija-sambah ka diginŭ angān rada jurud ngan agi dŭh sanang asŭng-i di angān,

²⁴tingge pinganggen ngan di jawin mija-sambah anŭ, ka pari jam anŭ ka bidamai ngga jurud ngan, ka ripas anŭ pari di jugan pinganggen ngan ka Tapa.

²⁵“Kambŭi daya dawa angān ka taban angān ngga bisara, bidamai ngga ayŭh san tipuh ngan gibabŭ agi, sibayuh angān ndŭg yŭn bisara. Pasu angān mbŭh ndŭg nŭ, ayŭh re nyerah angān ka akim, adi re nggen angān ka polis, ka angān meh re mŭrŭt jer.

²⁶Diginŭ angān re rŭŭ, Aku kidaan di angān, ndŭg ka angān mbŭh kubo bayar ukum ngan.

²⁷ “Angān agi dingah dog nyabŭt, ‘Dŭhnyah tanggah.’

²⁸Pak madin Aku kidaan di angān: daya adi tirek dayung ka ripong di ayŭh mbŭh tanggah ngga ayŭh darŭm asŭng-i.

²⁹ Jadi kambŭi batŭh tauh ngan bada angān bidosa, tuket-i ka taran! Kana dŭ inŭh angān kambet so ndi pŭrŭng ganan ngan dog taran ka darŭm apui neraka.

³⁰ Kambŭi tangan tauh ngan bada angān bidosa, kapŭg-i ka taran! Kana dŭ inŭh angān kipang so ndi pŭrŭng ganan ngan di ka apui neraka.

³¹ “Agi gŭh dog nyabŭt, ‘Daya adi taran sawŭn-i dŭh siŭn dŭh an nggen di sawŭn-i surat sare.’

³² Pak madin Aku kidaan: kambŭi daya taran sawŭn-i ngga tadŭ mun sabab-i pak dŭh sabab sawŭn-i tanggah, daya anŭ dapu tanggong di tanggah-i kambŭi ayŭh banan dinge; ka sianŭ adi sawan ngga ayŭh mbŭh tanggah gŭh.

³³ “Angān ko gŭh dingah daya jah dog kidaan, ‘Dŭhnyah kambŭt janji ngan, pak ndai anŭ adi angān ko bipayu ngga Tapa an ndai.’

³⁴ Pak madin Aku kidaan di angān: dŭhnyah bipayu kan angān ndai janji. Dŭhnyah bipayu pakai rangit, amai rangit inŭh takta Tapa;

³⁵ dŭh gŭh pakai ong, amai ong inŭh bangan kaja Tapa; dŭh gŭh pakai Jerusalem, amai-i kupo Raja adi bās.

³⁶Dŭhnyah bipayu pakai ubak ngan, sabab angān dŭh bisa bada ndi sirah ubok ngan buda bait singŭt.

³⁷Nang ‘Yŭh’ bait ‘Dŭh’, amai rabis so anŭ adi angān nang taŭn-i mandŭg so Siarap.

³⁸ “Angān mbŭh dingah pinganang sakati, ‘Batŭh gati batŭh; jipŭh gati jipŭh.’

³⁹Pak madin Aku kidaan di angān: dŭhnyah maras dendam. Kambŭi daya napar angān di paŭp tura ka tauh, bada ayŭh napar gŭh angān di paŭp tura ka bait.

⁴⁰Ka kambŭi daya taban angān ngga bisara sitagar jipo ngan, tandah ayŭh tambit jipo-tabar ngan ani.

⁴¹Ka kambŭi ndi naan soldadu adi mŭrŭt rais ngan takan angān da kabis barang-i ndi kilomita, kabis-i duwŭh kilomita.

⁴²Kan daya mite kayuh so angān, nggen-i di ayŭh; kan daya an nginjam kayuh, bada ayŭh nginjam.

⁴³ “Angān mbŭh dingah agi dog nyabŭt, ‘Rindu dingan ngan, tiru di pinganyu ngan.’

⁴⁴Pak madin Aku kidaan di angān: rindu pinganyu ngan ka simayang yŭn ngara adi kisiis angān,

⁴⁵isa angān bisa jadi bara anak Sama ngan adi di shorga. Amai Ayŭh adi bada batŭh andu nyekar di daya adi arap ngga daya adi kana, ka adi nggen ujen di ngara adi ndai kana ka di ngara adi ndai arap.

⁴⁶Re ngga mani Tapa ngupah angān kambŭi angān rindu daya adi rindu angān adŭ? Adŭp daya pinsuke ndai gŭh simŭnŭ!

⁴⁷Ka kambŭi angān minyu di jerā ngan adŭ, ani bŭkŭn-i? Daya adi dŭh puan Tapa pandai gŭh ndai simŭnŭ!

⁴⁸ Angān dŭh siŭn dŭh an sukup kana, nimun Sama ngan di shorga agi sukup kana.