Read Biatah Bidayuh MATTHEW 9 Bible Online

MATTHEW 9 - Biatah Bidayuh bible

MATTHEW 9

¹Jesus mŭrŭt arud ka mutas danu anŭ pari ka kupo adŭp-I,[17]

²di yŭn agi kada daya taban ka yŭn-I ndi naan daya naman andam ruku, guring di ambok. Kan Jesus kiris munki masam bās-i pinyabah ngara, Ayŭh nang di daya adi naman andam ruku anŭ, “Dŭhnyah susah, nak! Dosa mu mbŭh dog apun.”

³Ka agi kada gurū Ukum-adat Jahudi nang dupan adŭp-i, “Daya ati ngujat!”

⁴Jesus puan ani di pikir ngara, ka-I nang, “Mani angān bipikir kayuh adi arap?

⁵Udah dŭ kah nŭŭh nang, ‘Dosa mu mbŭh dog apun,’ puan kah nang, ‘Makat meh panu’?

⁶Aku an kiren di angān, garang, Anak Manusia biyŭn kuasa di ong ngga apun dosa.” Jadi Ayŭh nang di sianŭ adi naman andam ruku, “Makat, mbit ambok mu, ka maad!”

⁷Daya anŭ makat ka rasu maad.

⁸Kan daya kiris kayuh anŭ, ngara mbŭh taru, ka muji Tapa amai-I mbŭh nggen kuasa adi mun anŭ di manusia.

⁹Jesus bu so nŭ, ka darŭm Ayŭh panu, Ayŭh kiris ndi naan daya pinsuke, dŭn Matthew, guru di yŭn-i nyiraja. Ayŭh nang di ayŭh, “Tunda Aku.” Matthew makat ka tunda Ayŭh.

¹⁰ Darŭm Jesus man di ramin Matthew,[18] bagŭ daya pinsuke ngga daya adi dog tirawan mandŭg sua man ngga Jesus ngga bara murid-I.

¹¹Kada daya Pharisee kiris ka siken bara murid-I, “Mani gurū ngan man ngga bara daya adi mun anŭ?”

¹²Jesus dingah ngara ka-I nam, “Daya adi bua dŭh-i biguna di doktor, pak ngara adi birandam inŭh.

¹³ Di tingga ka jiroh rati pinganang Surat-kudus adi nang: ‘Atin mandis inŭh adi Aku raan, dŭh-i sadis dāng.’ Aku dŭh mandŭg di bagan daya adi nang adŭp-i kana, pak di bagan ngara adi dog tirawan.”

¹⁴Komŭnŭ bara pinunda John Pembaptisa mandŭg tudu Jesus, siken, “Mani kieh ka bara daya Pharisee awet bipusa, pak bara murid Mai taŭn dŭh adŭ bipusa?”

¹⁵Jesus nam, “Bisa kah bara pingabang di gawai sawan susah sitadŭn pingaten dari agi ngga ngara? Taŭn-i dŭh bisa! Pak andu-i re mandŭg kan pingaten dari re dog tambit so ngara; nganŭ ngara bisa bipusa.

¹⁶“Mating daya napung jipo-tabar adi amba ngga supek banang adi bauh, amai supek adi bauh re kŭrŭng ka ndai rubang rabis baga di jipo-tabar anŭ.

¹⁷Dŭh gŭh daya na wain adi bauh darŭm bŭrŭh-kurit adi amba, amai bŭrŭh-kurit anŭ re bubus, wain re babas, ka bŭrŭh-kurit anŭ re rusak. Wain adi bauh daya na darŭm bŭrŭh-kurit adi tibŭn kidŭ-i, ka soduwŭh-i re tan.”

¹⁸Darŭm Jesus nang kayuh anŭ, ndi naan pingubak ramin simayang-Jahudi tudu Ayŭh, sidikang di sirung jawin-I, ka nang, “Anak dayung ku bauh kabŭs; pak ja na tangan Mai di tunduh-i, isa ayŭh udip.”

¹⁹Jadi Jesus makat ka tunda ayŭh, ka bara murid-I sua gŭh ngga Ayŭh.

²⁰Ndi naan dayung adi naman andam bideya sitŭkŭd simŭng-duwŭh sawa mandŭg so punok Jesus ka tama tŭbŭn jipo-I.

²¹Ayŭh nang darŭm asŭng-i, “Kambŭi aku tama adŭ jipo-I, aku re bua.”

²²Jesus bigiring ka kiris ayŭh, ka nang, “Dŭhnyah susah nak! Amai kuu sabah di Aku kuu mbŭh bua.” Di jam anŭ gŭh dayung anŭ bua.

²³Komŭnŭ Jesus di ka ramin pingubak ramin simayang-Jahudi anŭ. Kan Ayŭh kiris bara daya adi tukang mambak tirari yŭn nyikubur ka bara daya mbŭh aŭn birisut,

²⁴Ayŭh nang, “Ruah sopŭrŭg ngan! Anak dayung anŭ dŭh-i kabŭs, bŭŭs adŭ ayŭh!” Ngara tawŭh Ayŭh.

²⁵Pak kan bara daya mbŭh dog bada ka sapa, Jesus rasu mŭrŭt birit anak dayung anŭ ka tambit tangan-i; anak anŭ rasu makat.

²⁶Agah pasar kayuh ati kambang di ndi tarun tana rais anŭ.

²⁷Jesus bu so nŭ, ka darŭm-I panu, duwŭh naan daya karak tunda Ayŭh. “Masi di kieh, Anak David!” ngara nang.

²⁸Kan Jesus mbŭh mŭrŭt ka darŭm arŭn, ngara duwŭh adi karak anŭ tudu Ayŭh, ka-I siken ngara, “Sabah ngan kah Aku tungang pibua angān?” “Sabah Tuan!” ngara nam.

²⁹Jadi Jesus tama batŭh ngara buang nang, “Isa-i jadi, garang, nanyam pinyabah ngan!”

³⁰ka batŭh ngara pari kana. Jesus nang di ngara, “Dŭhnyah kidaan kayuh ati di tadŭ tadŭ daya!”

³¹Pak ngara bu so nŭ ka pigarau pasar Jesus di ndi tarun tana parad rais anŭ.

³²Darŭm ngara aŭn bu, kada daya taban ka Jesus ndi naan daya adi dŭh bisa minyu sabab mbŭh dog mŭrŭt umot.

³³Pak kan umot anŭ mbŭh dog pibu, daya anŭ piguru minyu, ka sopŭrŭg daya mbŭh inga inga. “Gi-bŭn ata kiris kayuh mun ati di Israel!” ngara sigara.

³⁴ Pak bara daya Pharisee nang, “Pingubak umot inŭh adi nggen di Ayŭh kuasa ngga pibu umot.”

³⁵ Jesus panu ka barang kupo ngga anak anak kupo ka ngajar di ramin ramin simayang-Jahudi, nyuse Agah Kana pasar Tapa re mritah, ka pibua sopŭrŭg daya adi naman barang masam andam.

³⁶ Darŭm Ayŭh kiris bara daya bagŭ, Ayŭh mbŭh raru masi di ngara, sabab ngara riruk ka dŭh dapŭd ndai ani ani, mun biri adi dŭh biyŭn pingingat.

³⁷ Jadi Ayŭh nang di bara murid-I, “Pingatŭm mbŭh raru bās-i, pak daya adi tukang ngatŭm dŭh bagŭ.

³⁸Simayang meh mite daya adi dapu pingatŭm pait bagŭ daya da di ngatŭm.”