Read Biatah Bidayuh MARK 11 Bible Online

MARK 11 - Biatah Bidayuh bible

MARK 11

¹Darŭm ngara mbŭh dŭ dŭ sindŭk Jerusalem, dŭh jo so kupo Bethphage ngga kupo Bethany, ngara mbŭh ndŭg Sandah Kanā. Jesus pait duwŭh naan murid-I da panu diŭ

²ngga pinganang sakati: “Panu ka kupo ajeh di jawin ngan. Kan angān mbŭh ndŭg nŭ, angān re rasu dapŭd ndi anak kaldi adi bŭn dog nunggang dog nyirunggo. Kuka sirunggo-i ka taban kamati.

³Ka kambŭi agi daya siken mani angān kuka sirunggo-i, kidaan di ayŭh Gurū[24] biguna dieh ka re rikas pari-i.”

⁴Jadi ngara panu ka dapŭd ndi anak kaldi di aran, dog mŭŭng di tiban ramin. Darŭm ngara kuka sirunggo-i,

⁵kada daya adi mijog sindŭk siken ngara, “Ani ndai ngan? Mani angān kuka sirunggo anak kaldi anŭ?”

⁶Ngara nam nimun Jesus ko kidaan, ka ngara diginŭ tandah ngara panu.

⁷Ngara taban anak kaldi anŭ ka Jesus; ngara na jipo ngara di tunduh dāng anŭ, ka Jesus maad ka tunduh-i.

⁸Bagŭ daya mamad jipo ngara di aran, atan ngara adi bŭkŭn kapŭg daan daan kayuh so tarun ka tipan-i di aran.

⁹ Bara daya adi tura ka jawin samŭn ngara adi tunda di punok piguru nyirais nang, “Puji Tapa! Tapa nyiberkat Ayŭh adi mandŭg ngga adŭn Tuhan!

¹⁰Biberkat inŭh pinyipritah-I adi re mandŭg, pinyipritah Raja David adi babuk ta! Puji ka Tapa!”

¹¹Jesus mŭrŭt Jerusalem, di ka darŭm Ramin Tuhan, ka kimat bait tauh-I tingga sopŭrŭg kayuh. Pak amai andu mbŭh re karŭm, Ayŭh di ka Bethany ngga bara murid-I.

¹²Andu anŭ ndi, darŭm ngara pari so Bethany, Jesus mbŭh sibŭrŭk.

¹³Ayŭh kiris so jo ndi tŭngŭn ara adi raru pidawŭn-i, jadi Ayŭh di tingga an puan agi kah mating buwa-i. Pak kan Ayŭh ndŭg nŭ, Ayŭh kiris dudu dawŭn adŭ, sabab-i dŭh tika adi ngga-i buān.

¹⁴Jesus nang di tŭngŭn ara anŭ, “Mating daya re man buwa ara so kuu dinge!” Bara murid-I dingah Ayŭh.

¹⁵Kan ngara mbŭh ndŭg Jerusalem, Jesus di ka Ramin Tuhan ka piguru pibu sopŭrŭg daya adi bijua ka adi miris kayuh diginŭ. Ayŭh kureb mija ngara adi tukang nyambi duit samŭn baku ngara adi jua manuk asang,

¹⁶ka dŭh-I tandah daya taban kayuh panu so badag Ramin Tuhan.

¹⁷ Komŭnŭ Ayŭh ngajar bara daya: “Agi dog nuris di Surat-kudus Tapa nang, ‘Ramin-Ku re dog kadŭn ramin simayang yŭn sopŭrŭg bangsa daya.’ Pak angān mbŭh bada-i jadi tarun yŭn pirupak bisukan!”

¹⁸Bara pingubak imam ngga gurū Ukum-adat Jahudi dingah pinganang anŭ, ka ngara piguru jiroh aran an siŭ Jesus. Ngara taru Ayŭh, sabab bara daya bagŭ gi-aŭn nyaruh di ajar-I.

¹⁹Kan-i mbŭh singumi andu, Jesus ngga bara murid-I bu so kupo anŭ.

²⁰Awar isan isan andu jawa ndi, darŭm ngara panu di aran, ngara kiris tŭngŭn ara anŭ. Ayŭh mbŭh kabŭs ndi tŭngŭn tŭngŭn-i ndŭg uat.

²¹Peter ingat kayuh adi mbŭh jadi ka-i nang di Jesus, “Tingga, Gurū, tŭngŭn ara adi Kaam ko mangu mbŭh kabŭs!”

²²Jesus nam ngara, “Sabah meh di Tapa.

²³ Ka puan meh, asi asi adi nang di sandah ati da makat ka taran adŭp-i ka rawŭt ngga atin adi puno sabah di pinganang-i re sawŭ jadi, kayuh anŭ taŭn re sawŭ jadi yŭn-i.

²⁴Ngapŭi Aku nang di angān: Kan angān simayang mite kayuh, sabah meh angān mbŭh kambat-i, ka angān taŭn re dog nggen tadŭ tadŭ kayuh adi angān mite.

²⁵ Ka kan angān mijog simayang, apun sopŭrŭg sarah daya di tunduh ngan, isa Sama ngan adi di shorga apun gŭh dosa ngan.” [

²⁶Kambŭi angān dŭh apun daya, Sama ngan adi di shorga dŭh re apun sarah adi angān ko ndai.][25]

²⁷Ngara mandŭg dinge ka Jerusalem. Darŭm Jesus panu di Ramin Tuhan, bara pingubak imam, gurū Ukum-adat Jahudi, ka nyamba bangsa Jahudi mandŭg tudu Ayŭh

²⁸ka siken Ayŭh, “Ani hak Mu ndai kayuh kayuh ati? Asi nggen di Kuu hak ngga ndai-i?”

²⁹Jesus nam ngara, “Aku an nggen di angān ndi pinyiken, ka kambŭi angān nggen di Aku pinyinam ngan, Aku re kidaan di angān ani hak Ku ndai kayuh kayuh ati.

³⁰Kidaan di Aku, so ki hak John baptisa daya, so Tapa kah so manusia?”

³¹Ngara rasu bikarit dupan adŭp-i, “Ani re ta nang? Kambŭi ata nang, ‘So Tapa,’ Ayŭh re nang, ‘Mani meh, garang, angān dŭh sabah John?’

³²Pak kambŭi ata nang, ‘So manusia...’ ” (Ngara taru bara daya, sabab sopŭrŭg ngara mbŭh sabah nang John mbŭh nabi.)

³³Jadi ngara nam Jesus, “Kieh dŭh puan.” Jesus nang di ngara, “Dŭh gŭh Aku an kidaan di angān ani hak Ku ndai sopŭrŭg kayuh ati.”