Read Biatah Bidayuh MARK 12 Bible Online

MARK 12 - Biatah Bidayuh bible

MARK 12

¹ Komŭnŭ Jesus nyidundan upama ati di ngara: “Agi ndi sidah ndi naan daya ndai teya anggor, ndai buwang maning-i, kareh rubang yŭn mŭ anggor, ka pijog sirangga. Komŭnŭ ayŭh nyewa teya anggor-i anŭ di daya, ka adŭp-i di matak nami.

²Kan-i mbŭh tika adi ngga daya sun buwa anggor, ayŭh pait urun-i ka bara pinyewa teya da kambat so ngara tung jangi utung so buwa buwa adi dog sun.

³Pinyewa teya nakap urun anŭ, mukong ayŭh, ka bada ayŭh bu bŭrŭh.

⁴Komŭnŭ ayŭh adi dapu teya pait urun adi bŭkŭn; pinyewa teya mukong ayŭh di ubak ka pimangŭh ayŭh.

⁵Ayŭh adi dapu teya pait urun adi bŭkŭn, pak ngara siŭ ayŭh. Ngara ndai simŭnŭ gŭh di ngara adi bŭkŭn, agi adi dog pukong ka agi adi dog siŭ.

⁶Kaŭs-i dŭm ndi naan adŭ adi re dog pait, anak adŭp-i. Sikasŭn-i meh ayŭh pait anak adŭp-i ka bara pinyewa teya anŭ. ‘Tatu ngara re stabi di anak ku,’ ayŭh nang.

⁷Pak bara pinyewa teya anŭ nang dupan adŭp ngara, ‘Ati inŭh anak daya adi dapu teya. Bah, ja ata siŭ ayŭh, isa buat rata-i jadi jata!’

⁸Jadi ngara nakap ka siŭ ayŭh ka taran tadang-i ka sapa teya anggor.

⁹“Ani, meh, re daya adi dapu teya anggor ndai?” Jesus siken. “Ayŭh re mandŭg ka siŭ bara pinyewa teya anŭ ka nggen teya anggor anŭ ka daya bŭkŭn.

¹⁰ Tatu angān ko basa pinganang Surat-kudus ati? ‘Batuh adi tukang ramin taran mbŭh jadi anŭ adi siabo biguna.

¹¹Ati mbŭh pingandai Tuhan; mbŭh raru sangŭn-i di batŭh ta!’ ”

¹²Bara pingibās bangsa Jahudi suba an nakap Jesus, sabab ngara puan Ayŭh mbŭh nyidundan upama anŭ pasar ngara. Pak ngara taru bara daya, jadi ngara bu tingge Ayŭh.

¹³Kada daya Pharisee ka kada daya so tibaran daya Herod dog pait ka yŭn Jesus da kudog Ayŭh ngga pinyiken.

¹⁴Ngara mandŭg tudu Ayŭh ka nang, “Gurū, kieh puan Kaam kidaan kayuh adi sawŭ, dŭh kira ani nang daya. Kaam dŭh piduri pangkat daya, pak ngajar pasar pinyiraan Tapa yŭn manusia. Kidaan di kieh, rawan Ukum-adat kah dŭh nŭŭh bayar suke ka Caesar? Re ta bayar kah dŭh ayŭh?”

¹⁵Pak Jesus puan akar ngara, Ayŭh nam, “Mani angān suba an kudog Aku? Taban ndi kiping duit pirak kamati, bada Aku tingga-i.”

¹⁶Ngara taban ndi kiping duit pirak ka Ayŭh, ka Ayŭh nang, “Raŭn asi ka dŭn asi ati?” “Raŭn Caesar,” ngara nam.

¹⁷Jadi Jesus nang, “Nggen di Caesar kayuh adi Caesar dapu, ka nggen di Tapa kayuh adi Tapa dapu.” Ngara mbŭh inga inga dingah pinganang Jesus.

¹⁸ Komŭnŭ kada daya Sadducee, ngara adi nang mating pinyimakat so kabŭs, mandŭg ka Jesus ka nang,

¹⁹ “Gurū, Moses nuris ukum-adat ati yŭn ami: ‘Kambŭi daya kabŭs ka tingge sawŭn-i pak dŭh biyŭn anak, jurud-i dŭh siŭn dŭh tambit uban-i ndu sawŭn isa ngara bisa biyŭn anak adi bisa dog nyirundeng anak sianŭ adi mbŭh kabŭs.’

²⁰Agi ndi sidah ju naan bijurud; adi pinuai sawan ka kabŭs dŭh biyŭn anak.

²¹Ka adi numbor duwŭh tambit uban-i ndu sawŭn, ka ayŭh gŭh kabŭs dŭh biyŭn anak. Simŭnŭ gŭh ngga adi numbor taruh,

²²ndŭg ka sopŭrŭg adi bŭkŭn: sopŭrŭg ngara adi ju madis mbŭh tambit dayung anŭ ndu sawŭn ka kabŭs dŭh biyŭn anak. Sikasŭn-i, adŭp dayung anŭ kabŭs gŭh.

²³Di andu sopŭrŭg daya adi kabŭs makat so kabŭs, sawŭn asi ayŭh re? So-ju ngara ko tambit ayŭh ndu sawŭn.”

²⁴Jesus nam ngara, “Mbŭh raru sarah angān! Puan ngan sabab-i? Angān mun anŭ sabab angān dŭh puan Surat-kudus puan kah kuasa Tapa.

²⁵Amai kan daya makat so kabŭs, ngara re mun malaikat di shorga ka dŭh re banan sawan.

²⁶ Ka pasar daya dog pakat so kabŭs: bŭn kah angān basa di Surat Moses dundan pasar anak tŭngŭn kayuh adi bijagu apui dieh? Diginŭ agi dog nuris Tapa nang di Moses, ‘Aku ati Tapa Abraham, Tapa Isaac, ka Tapa Jacob.’

²⁷Ayŭh inŭh Tapa daya adi udip, dŭh-I Tapa daya adi kabŭs. Pinyidapŭd ngan mbŭh ruai nang aset-i.”

²⁸ Ndi naan gurū Ukum-adat Jahudi agi diginŭ adi mbŭh dingah kirakar ngara. Ayŭh kiris Jesus mbŭh nam ngara ngga pinyinam adi batur, jadi ayŭh tudu Ayŭh ngga pinyiken: “Pinyipesan aki ndi adi siabo biguna?”

²⁹ Jesus nam, “Adi siabo biguna inŭh ati: ‘Dingah, O Israel! Tuhan Tapa ta agi sadi-I Tuhan.[26]

³⁰Rindu Tuhan adi Tapa ngan ngga siabo atin ngan, ngga siabo simangi ngan, ngga siabo pikir ngan, ka ngga siabo tungang ngan.’

³¹ Adi numbor duwŭh agi sakati: ‘Rindu dingan ngan nimun angān rindu adŭp ngan.’ Mating Pinyipesan adi bŭkŭn adi re rabis biguna so ati duwŭh.”

³² Gurū Ukum-adat Jahudi anŭ nang di Jesus, “Batur, Gurū! Taŭn-i sawŭ, sak adi nang Mai, kaŭs-i Tuhan sadi adŭ Tapa ka mating tapa adi bŭkŭn adŭ-i Ayŭh.

³³ Ka daya dŭh siŭn dŭh rindu Tapa ngga siabo atin-i ka ngga siabo pikir-i ka ngga siabo tungang-i; ka ayŭh dŭh siŭn dŭh rindu dingan-i nimun ayŭh rindu adŭp-i. Rabis dŭ nŭŭh an sita Pinyipesan ati duwŭh so nŭŭh jugan di mija-sambah dāng ngga sadis sadis ka Tapa.”

³⁴Jesus kiris munki masam bijak pinyinam-i, jadi Ayŭh nang di ayŭh, “Kuu dŭh jo so Pinyipritah Tapa.”[27] Ripas anŭ mating daya birani nggen pinyiken di Jesus tia.

³⁵Darŭm Jesus ngajar di Ramin Tuhan, Ayŭh siken, “Simuki bara gurū Ukum-adat Jahudi bisa nang Kristus sesang David?

³⁶ Roh Kudus nguasa David da nang: ‘Tuhan nang di Tuhan ku: Guru digiti tura ka tauh Ku ndŭg ka Aku mbŭh na pinganyu Mu di ribo kaja Mu.’

³⁷Adŭp David bagan Ayŭh ‘Tuhan’; jadi simuki meh Kristus bisa jadi sesang David?” Bara daya ngga atin gaŭn dingah Jesus ngajar.

³⁸Darŭm Ayŭh ngajar ngara, Ayŭh nang, “Jaga adŭp ngan so bara gurū Ukum-adat Jahudi, adi suka panu nēn piraka ambu ka dog tabi di arong passar,

³⁹adi mien baku baku adi tura ka jawin di ramin simayang-Jahudi ka yŭn adi rabis kana di tika gawai.

⁴⁰Ngara nipu bara dayung uban ka sirapas ramin ngara, ka komŭnŭ kiren adŭp-i tui bidua. Tung ngara ukum re rabis bat!”

⁴¹Darŭm Jesus guru sindŭk pati duit Ramin Tuhan, Ayŭh pirati daya misŭn duit dieh. Bagŭ daya adi kaya misŭn bagŭ duit;

⁴²komŭnŭ ndi naan dayung uban mandŭg ka misŭn duwŭh kiping duit timaga, adi raru siit asŭng-i.

⁴³Ayŭh bagan bara murid-I ka nang di ngara, “Aku nang di angān, dayung uban adi sirata ati mbŭh misŭn rabis bagŭ darŭm pati duit anŭ so daya bŭkŭn.

⁴⁴Amai ngara adi bŭkŭn mbŭh nggen so ka rabis pinyikaya ngara; pak ayŭh so sirata-i mbŭh nggen sopŭrŭg adi-i biyŭn; ayŭh mbŭh nggen kaŭs kaŭs duit-i.”