Read Biatah Bidayuh MARK 13 Bible Online

MARK 13 - Biatah Bidayuh bible

MARK 13

¹Darŭm Jesus ruah so Ramin Tuhan, ndi so bara murid-I nang, “Tingga, Gurū! Ruai nang sangŭn-i batuh batuh ka ramin ramin ati!”

²Jesus nam, “Kiris mu dudu ramin bās ati? Ndi batuh mating gŭh re dŭm bisandug di yŭn-i ati; sopŭrŭg-i re rubuh.”

³Komŭnŭ Jesus di ka Sandah Kanā, ka guru di tarun yŭn adi bistatang ngga Ramin Tuhan kan Peter, James, John, ka Andrew mandŭg tudu Ayŭh.

⁴“Kidaan di kieh sinde kayuh ati re jadi,” ngara nang, “ka kidaan di kieh ani tandā adi kiren tika-i mbŭh mandŭg yŭn sopŭrŭg kayuh ati re jadi.”

⁵Jesus nang di ngara, “Jaga adŭp ngan, ka dŭhnyah tandah daya nipu angān.

⁶Bagŭ daya re mandŭg pakai adŭn Ku ka nang, ‘Aku ati inŭh ayŭh!’ ka re nipu bagŭ daya.

⁷Dŭhnyah susah kan angān dingah sak daya biperang ka agah biperang. Kayuh adi mun anŭ dŭh siŭn dŭh jadi, pak dŭh sirati-i sikasŭn ong mbŭh mandŭg.

⁸Rais re biperang ngga rais adi bŭkŭn; pritah re nyerang pritah adi bŭkŭn. Tana-bigugoh re agi di barang yŭn, ka re agi apag. Kayuh ati re keya ka sibungas andam dayung re biranak.

⁹ “Adŭp ngan dŭh siŭn dŭh an bijaga. Angān re dog nakap ka dog taban ka yŭn bisara. Angān re dog pukong di ramin simayang-Jahudi; angān re mijog situra jawin ngga bara pinguasa ka raja raja sabab angān pinunda Ku, siŭn angān piagah Agah Kana di ngara.

¹⁰Pak diŭ so sikasŭn ong, Agah Kana dŭh siŭn dŭh dog nyuse di sopŭrŭg bangsa daya.

¹¹Ka kan angān dog nakap ka dog taban ka yŭn bisara, dŭhnyah gapang pasar kayuh adi re ngan nang. Kan tipuh-i mbŭh mandŭg, angān nang anŭ adi dog nggen di angān di jam anŭ, amai bang bang piminyu adi angān piruah dŭh-i jangān, pak mandŭg so Roh Kudus.

¹²Daya re nyerah jurud adŭp-i da dog ukum kabŭs, ka sama re ndai simŭnŭ gŭh di bara anak-i. Anak re makat rawan pimas-i ka bada ngara dog ukum kabŭs.

¹³ Sopŭrŭg daya re tiru di angān sabab Aku. Pak asi asi adi bijijŭ ndŭg sikasŭn-i re dog nyiramat.

¹⁴ “Angān re kiris ‘Pinyembar adi Raru Sipŭ’ mijog di yŭn-i dŭh patut mijog.” (Ayŭh adi basa patut mirati ani rati kayuh ati!) “Di tika anŭ ngara adi di Judea dŭh siŭn dŭh babak ka tarun tana darŭd.

¹⁵ Daya adi di tibung ramin, dŭhnyah-i mūn di tambit kayuh darŭm ramin-i an taban ngga bu.

¹⁶Daya adi di ŭmŭh dŭh siŭn pari ka ramin di tambit jipo-i.

¹⁷Munki masam sipŭ-i tipuh anŭ re yŭn bara dayung adi bite ka yŭn bara sindŭ adi mira sŭ!

¹⁸Bidua ka Tapa isa kayuh ati dŭh jadi di tipuh madud!

¹⁹ Amai pinyusah di tipuh anŭ re rabis arap so adi ong ko kinyam, ngitong so sibungas Tapa napa ong ndŭg andu ati. Ka re mating tia mun anŭ.

²⁰Pak Tuhan mbŭh pisigŭt tipuh-i; kambŭi dŭh, mating manusia dŭm. Sitagar bara daya adi-I ko mien, Ayŭh pisigŭt tipuh anŭ.

²¹“Di tipuh anŭ, kambŭi agi daya nang di angān, ‘Tingga, digiti Kristus!’ puan kah, ‘Tingga, jeh rah-I,’ dŭhnyah angān sabah.

²²Amai bara Kristus kadong ka nabi kadong re timbur. Ngara re ndai pingandai-nginga ka pingandai-saruh ngga situngang tungang-i ngga kinanyap sopŭrŭg daya, rabis-i ngara adi Tapa mbŭh mien.

²³Pak bijaga meh, amai Aku mbŭh awar kidaan sopŭrŭg-i di angān.

²⁴ “Di tipuh ripas tika pinyusah anŭ, batŭh andu re karŭm, buran re dŭh tia nyekar,

²⁵ bara bitang re rabu so rangit, ka kuasa di rangit re dog ngugoh.

²⁶ Nganŭ Anak Manusia re tatŭng, mandŭg darŭm abun ngga kuasa ka bragah.

²⁷Ayŭh re pait bara malaikat ka pat sikuh ong da nguruk bara daya adi Tapa mbŭh mien so ong, so tŭbŭn ndi ndŭg tŭbŭn andi.

²⁸“So tŭngŭn ara angān bisa birajar. Kan daan daan-i jadi barŭm buang dŭdŭt ka piguru prisok, angān puan tipuh paras mbŭh sindŭk.

²⁹Simŭnŭ gŭh, kan angān kiris kayuh ati jadi, angān re puan tika-i mbŭh sindŭk, mbŭh re an piguru.[28]

³⁰Ingat nŭh, sopŭrŭg kayuh ati re jadi diŭ so manusia adi udip madin mbŭh abo kabŭs.

³¹Rangit ngga ong re mungan, pak pinganang Ku dŭh re manyap.

³² “Mating daya puan sinde andu-i puan kah jam-i mandŭg, bait-i malaikat, bait-i Anak Manusia; Tapa sadi adŭ puan.

³³Pak bijaga, ka sidia adŭp ngan, amai angān dŭh puan sinde tika-i mandŭg.

³⁴ Ayŭh re keya ka ndi naan daya adi tingge ramin-i ka matak ka tarun adi jo, tingge bara daya gaji-i da jaga, ripas-i ko nggen kraja di barang naan ngara, ka ripas-i ko bada sianŭ adi jaga tiban bijaga.

³⁵Bijaga meh, sabab angān dŭh puan sinde tuan ramin mandŭg; kadŭ-i ngga arong singumi andu puan kah sitŭrŭp ngarŭm, puan kah arong kok siok, puan kah ngga siri jawa.

³⁶Kambŭi ayŭh gŭgŭh mandŭg, manyah ayŭh dapŭd angān bŭŭs.

³⁷Kayuh adi Aku nang di angān, Aku nang di sopŭrŭg: Bijaga meh!”