Read Biatah Bidayuh MARK 14 Bible Online

MARK 14 - Biatah Bidayuh bible

MARK 14

¹ Nganŭ mbŭh duwŭh andu diŭ so Gawai Paska ka Gawai Ruti Dŭh-Biragi. Bara pingubak imam ngga gurū Ukum-adat Jahudi mbŭh jiroh aran an nakap Jesus darŭm bisukan ka siŭ Ayŭh.

²“Ata dŭh siŭn ndai-i di tika gawai,” ngara nang, “te daya guga rai-i.”

³ Jesus mbŭh di Bethany di ramin Simon, daya adi ko naman andam kurit adi bisā. Darŭm Jesus aŭn man, ndi naan dayung mŭrŭt ngga gabuk alabasta puno ngga inyo wangi adi mbar rega-i adi dog ndai so tigŭrŭ kayuh adi buuh ramak. Ayŭh mape gabuk anŭ ka susen wangi anŭ di ubak Jesus.

⁴Agi kada daya diginŭ tuas ka nang dupan adŭp ngara, “Re ngga mani saat wangi anŭ?

⁵Ayŭh patut dog jua ngga rega rabis so taruh ratus kiping duit pirak,[29] ka duit anŭ nŭŭh nggen di daya sirata!” Ka ngara bandar ngamun ayŭh.

⁶Pak Jesus nang, “Tandah ayŭh! Mani angān nyusah ayŭh? Ayŭh mbŭh ndai kayuh adi raru kana yŭn Ku.

⁷ Angān re siraru biyŭn daya sirata ngga angān, ka di tadŭ nga-i angān raan, angān bisa turung ngara. Pak Aku dŭh re siraru agi ngga angān.

⁸Ayŭh mbŭh ndai kayuh adi-i tungang ndai; ayŭh susen wangi di pŭrŭng Ku ngga sidia-i diŭ so tipuh-i yŭn kubur.

⁹Ingat nŭh! Di barang yŭn injil dog nyuse di ong, kayuh adi-i mbŭh ndai re dog kidaan ngga ingat ayŭh.”

¹⁰Komŭnŭ Judas Iscariot, ndi so ngara adi simŭng-duwŭh naan murid Jesus, di ka bara pingubak imam an jua Jesus di ngara.

¹¹Ngara munos asŭng dingah kayuh adi-i nang, ka mbŭh bijanji an nggen di ayŭh duit. Jadi Judas piguru jiroh pluang ngga nyerah Jesus ka ngara.

¹²Ngga andu adi ndi darŭm Gawai Ruti Dŭh-Biragi, andu adi ngga anak anak biri Paska dog simareh, murid Jesus siken Ayŭh, “Diki Kaam raan kieh sidia yŭn Mai man gawai Paska?”

¹³Jadi Jesus pait duwŭh naan so ngara ngga pinganang sakati: “Di ka kupo, ka agi ndi naan daya kabis tipayan piin re bidapŭd ngga angān. Tunda ayŭh

¹⁴ka ramin adi-i mŭrŭt, ka nang di sianŭ adi dapu ramin: ‘Gurū nang, Diki birit di yŭn Ku ngga bara murid Ku bisa man gawai Paska?’

¹⁵Ayŭh re kiren di angān birit adi bayah di sambu, muko dog ngamas, di yŭn ngan bisa sidia kayuh yŭn ta.”

¹⁶Murid murid anŭ panu, di ka kupo, ka dapŭd sopŭrŭg-i nimun adi Jesus ko kidaan di ngara; ka ngara sidia man gawai Paska.

¹⁷Kan-i mbŭh singumi andu, Jesus mandŭg ngga bara murid-I adi simŭng-duwŭh naan.

¹⁸ Darŭm ngara mbŭh guru man, Jesus nang, “Aku kidaan di angān, ndi so angān re jua Aku; sianŭ adi man ngga Aku inŭh ayŭh.”

¹⁹Bara murid-I mbŭh susah ka piguru siken Ayŭh, ndi ngga ndi, “Tatu dŭh-i aku adi Kaam nang, dŭh kah?”

²⁰Jesus nam, “Taŭn-i re ndi so angān adi simŭng-duwŭh naan, sianŭ adi njug ruti-i darŭm pinggen ngga Aku.

²¹Anak Manusia re kabŭs nimun adi dog nang darŭm Surat-kudus; pak mbŭh raru payah-i sianŭ adi jua Anak Manusia! Mbŭh kana dŭ inŭh ayŭh simudan dŭh dog biranak!”

²²Darŭm ngara aŭn guru man, Jesus mbit ndi kiping ruti, nang dua trima kaseh, mire-i, ka nggen-i di bara murid-I. “Tambit,” Ayŭh nang, “ati inŭh pŭrŭng Ku.”

²³Komŭnŭ Ayŭh tambit makuk, nggen trima kaseh di Tapa, ka nggen-i di ngara; ka sopŭrŭg ngara nok so dieh.

²⁴ Jesus nang, “Ati inŭh deya Ku adi dog ren yŭn daya bagŭ, deya Ku adi natu simanya Tapa.

²⁵Aku kidaan di angān, Aku dŭh re tia nok wain ati ndŭg andu adi ngga Aku nok wain adi bauh di Ong Bauh Sama Ku.”[30]

²⁶Komŭnŭ ngara nang nyanyi ka ruah ka Sandah Kanā.

²⁷ Jesus nang di ngara, “Sopŭrŭg ngan re bikaduh bu tagan Aku, amai Surat-kudus agi nang, ‘Tapa re siŭ pingingat-biri, ka sopŭrŭg biri re pambar.’

²⁸ Pak ripas Aku dog pakat udip bauh, Aku re di ka Galilee diŭ so angān.”

²⁹Peter nam, “Aku dŭh re tagan Kaam, sunggu ngara adi bŭkŭn re tangan Kaam!”

³⁰Jesus nang di Peter, “Aku kidaan di kuu, sibayuh babang kukok piduwŭh kari sikambŭh, kuu re pitaruh kari nang adŭp mu dŭh puan Aku.”

³¹Pak Peter darah nang, “Aku dŭh re nang sakanŭ, sunggu bait kani aku dŭh siŭn dŭh kabŭs ngga Kaam!” Sopŭrŭg murid adi bŭkŭn samah nang sakanŭ.

³²Ngara mandŭg ka tarun yŭn adi dog kadŭn Gethsemane, ka Jesus nang di bara murid-I, “Kajŭn digiti atan Aku simayang.”

³³Ayŭh ngaja Peter, James, ka John da sua ngga adŭp-I. Ayŭh mbŭh raru susah buang payah,

³⁴ka nang di ngara, “Pinyusah Ku raru bat-i, batang re kabŭs nyam Ku da-i. Kajŭn digiti angān buang bijaga.”

³⁵Ayŭh panu jo nisit so ngara, mŭŭb di tana, ka simayang mite, kambŭi bisa, adŭp-I dŭhsah kinyam jera-birasa anŭ.

³⁶“Sama,” Ayŭh nang, “Sama Ku! Sopŭrŭg kayuh bisa jadi, di Kaam. Kadi makuk jera-birasa ati so Aku. Sunggu mŭnŭ dŭhnyah nurut pinyiraan Ku, pak ndai adŭ pinyiraan Mai.”

³⁷Komŭnŭ Ayŭh pari ka dapŭd ngara taruh aŭn bŭŭs. Ayŭh nang di Peter, “Simon, kuu bŭŭs kah? Dŭh kah kuu tungang bijaga piji ka ndi jam?”

³⁸Ayŭh nang di ngara, “Bijaga nŭh ka simayang isa angān dŭh rabu darŭm pinyisuba. Pinyiraan taŭn agi pak pŭrŭng ngan paŭh dŭh sinunuh.”

³⁹Ayŭh di dinge ka bidua, babŭ nang pinganang anŭ tejah.

⁴⁰Komŭnŭ Ayŭh pari ka yŭn murid-I ka dapŭd ngara babŭ bŭŭs; ngara mbŭh dŭh tungang nyijŭn batŭh-i. Ka ngara dŭh puan ani re nang di Ayŭh.

⁴¹Kan Ayŭh pari adi pitaruh saba, Ayŭh nang di ngara, “Gibabŭ kah angān bŭŭs buang rŭŭ-paya? Dang ayŭh! Jam-i mbŭh mandŭg! Tingga, madin Anak Manusia mbŭh dog nyerah ka tangan daya bidosa.

⁴²Makat, ka panu meh ja. Tingga, daya adi jua Aku mbŭh mandŭg!”

⁴³Jesus gibabŭ minyu kan Judas, ndi so ngara adi simŭng-duwŭh naan murid-I, mandŭg. Ayō ayŭh agi bara daya bagŭ taban pedang ka pukong, dog pait bara pingubak imam, gurū Ukum-adat Jahudi, ka nyamba bangsa Jahudi.

⁴⁴Sianŭ adi jua Jesus muko nggen tandā di bara daya anŭ: “Sianŭ adi aku sium inŭh daya adi angān raan. Nakap Ayŭh ka nakit jaga Ayŭh darŭm angān taban Ayŭh ngga bu.”

⁴⁵Kan Judas mbŭh mandŭg, ayŭh rasu tudu Jesus ka nang, “Gurū!” ka sium Ayŭh.

⁴⁶Jadi ngara nakap Jesus ka muak Ayŭh.

⁴⁷Pak ndi so ngara adi mijog diginŭ nyitak pedang-i ka japa urun Imam Bās, nyaper kajit-i.

⁴⁸Ka Jesus minyu ka nang di ngara, “Sah kah angān mandŭg ngga pedang ka pukong ngga nakap Aku mun ani Aku ati daya arap?

⁴⁹ Barang andu Aku agi ngga angān ngajar di Ramin Tuhan, ka angān dŭh nakap Aku. Pak pinganang Surat-kudus dŭh siŭn dŭh jadi bitŭtŭk.”

⁵⁰Nganŭ sopŭrŭg murid-I bikaduh bu tagan Ayŭh.

⁵¹Agi ndi naan dari adi mara, nēn banang linen, tunda Jesus. Ngara suba nakap ayŭh,

⁵²pak ayŭh bikaduh bu sitagor, tingge banang linen anŭ.

⁵³Komŭnŭ Jesus dog taban ka ramin Imam Bās, di yŭn sopŭrŭg pingubak imam, nyamba bangsa Jahudi, ka gurū Ukum-adat Jahudi mbŭh tikuruk.

⁵⁴Peter tunda so jo ka mŭrŭt badag ramin Imam Bās. Diginŭ ayŭh guru ngga bara soldadu adi jaga, nyinduh di apui.

⁵⁵Bara pingubak imam ka bara Kunsil anŭ suba jiroh taksi ngga nyarah Jesus, siŭn ngara bisa nggen ukum kabŭs di Ayŭh; pak ngara dŭh tungang dapŭd ani ani.

⁵⁶Bagŭ saksi nggen taksi kadong rawan Jesus, pak dundan ngara dŭh brisak.

⁵⁷Komŭnŭ agi kada daya mijog ka nggen taksi kadong rawan Jesus:

⁵⁸ “Kieh agi dingah Ayŭh nang, ‘Aku re nyirubuh Ramin Tuhan ati adi dog ndai so tangan manusia, ka ripas taruh andu Aku re pijog anŭ adi dŭh so tangan manusia.’ ”

⁵⁹Ngara dŭh gŭh tungang bada dundan-i brisak.

⁶⁰Imam Bās mijog di sirung jawin sopŭrŭg ngara ka siken Jesus, “Mating kah pinyinam Mu ngga rawan pinganang ngara adi nyarah Kuu?”

⁶¹Pak Jesus pirŭŭ adŭp-I, dŭh an nang ani ani. Imam Bās siken Ayŭh dinge, “Kuu Kristus kah, Anak Tapa adi biberkat?”

⁶² “Aku ati inŭh Ayŭh,” Jesus nam, “ka angān sopŭrŭg re kiris Anak Manusia guru tura ka tauh Ayŭh adi Bisa-pŭrŭg ka mandŭg ngga abun so rangit!”

⁶³Imam Bās nyiratak jipo-i ka nang, “Ata dŭh biguna di saksi tia!

⁶⁴ Angān mbŭh dingah pinganang ujat-I. Munki meh pikir ngan madin?” Sopŭrŭg ngara nang Ayŭh sawŭ sarah ka patut dog nggen ukum kabŭs.

⁶⁵Kada so ngara piguru nyiruja Jesus, nutu batŭh-I, ka mukong Ayŭh. “Suba kidaan asi mukong Kuu!” ngara nang. Ka bara soldadu tambit Ayŭh ka napar Ayŭh.

⁶⁶Peter babŭ di badag kan ndi naan so ngara adi dayung, adi daya-gaji Imam Bās, murah.

⁶⁷Kan ayŭh kiris Peter nyinduh, ayŭh tirek ayŭh ka nang, “Kuu gŭh, agi ngga Jesus so Nazareth.”

⁶⁸Pak ayŭh miman. “Aku dŭh puan; aku dŭh mirati kayuh nang mu,” ayŭh nam. Ka-i panu di ka tiban buwang ramin. Ka nganŭ gŭh babang kukok.[31]

⁶⁹Daya-gaji anŭ kiris dinge ayŭh diginŭ ka-i nang di ngara adi mijog diginŭ dinge, “Ayŭh inŭh ndi so ngara!”

⁷⁰Pak Peter miman dinge. Dŭh tui ripas anŭ, ngara adi mijog diginŭ nyarah Peter dinge, “Kuu dŭh bisa miman adŭp mu ndi so ngara, sabab kuu so Galilee gŭh.”

⁷¹Peter nang, “Aku bipayu aku kidaan kayuh adi sawŭ! Isa-i Tapa ngukum aku kambŭi aku kadong! Aku dŭh puan daya anŭ adi nang ngan!”

⁷²Ka jam anŭ gŭh babang kukok adi piduwŭh saba, ka Peter ingat Jesus agi nang di ayŭh, “Diŭ so babang kukok piduwŭh kari, kuu re pitaruh kari nang adŭp mu dŭh puan Aku.” Ka ayŭh nyisakuk sien.