Read Biatah Bidayuh MARK 15 Bible Online

MARK 15 - Biatah Bidayuh bible

MARK 15

¹Awar isan isan bara pingubak imam bigaut ngudung ngga bara nyamba bangsa Jahudi, gurū Ukum-adat Jahudi, ka bara Kunsil, bisatur munki ngara re ngga Jesus. Ngara muak Jesus ngga parik basi ka taban Ayŭh bu, ka nyerah Ayŭh ka Pilate.

²Pilate siken Ayŭh, “Kuu kah raja daya Jahudi?” Jesus nam, “Adŭp mu mbŭh nang.”

³Bara pingubak imam nyarah Jesus pasar bagŭ masam kayuh;

⁴jadi Pilate siken Ayŭh dinge, “Dŭh kah Kuu re nam? Dingah Mu ngara nyarah Kuu!”

⁵Babŭ gŭh Jesus dŭh an nang ani ani; ka Pilate mbŭh inga inga kiris Ayŭh mun anŭ.

⁶Tiap Gawai Paska Pilate ngga kanyet-i pirupas ndi naan daya adi dog jer nunda ka pimite daya bagŭ.

⁷Di tika anŭ agi ndi naan daya dŭn Barabbas dog jer ngga bara adi bŭkŭn adi rawan pritah, adi ko siŭ daya darŭm ngara ndai pito darŭm rais.

⁸Kan bara daya mbŭh tikuruk ka piguru mite Pilate ndai nanyam kanyet-i yŭn ngara,

⁹ayŭh siken ngara, “An kah angān bada aku pirupas yŭn ngan raja daya Jahudi?”

¹⁰Ayŭh taŭn puan bara pingubak imam nyerah Jesus ka adŭp-i sabab atin sina ngara.

¹¹Pak bara pingubak imam ngasut bara daya bagŭ da mite Pilate pirupas Barabbas yŭn ngara.

¹²Pilate minyu dinge di bara daya bagŭ, “Ani meh garang raan ngan aku ndai di sianŭ adi angān kadŭn raja daya Jahudi?”

¹³Ngara nyirais nam, “Masak Ayŭh di rigang!”

¹⁴“Pak ani sarah-I?” Pilate siken. Ngara nyirais rabis bana-i, “Masak Ayŭh di rigang!”

¹⁵Pilate raan pimunos asŭng bara daya, ayŭh pirupas Barabbas yŭn ngara. Komŭnŭ ayŭh bada daya madŭs Jesus, ka nggen Ayŭh di bara soldadu yŭn masak di rigang.

¹⁶Bara soldadu anŭ taban Jesus ka darŭm istana gabenor adi dŭn Praetorium ka bagan da tikuruk bara soldadu adi bŭkŭn.

¹⁷Ngara bada Jesus nēn jipo-ambu adi bēng, ndai makota so bakah reja, ka na-i di ubak Jesus.

¹⁸Komŭnŭ ngara piguru nadar nggen tabi di Ayŭh: “Tabi ka Kaam Raja daya Jahudi!”

¹⁹Ngara mukong ubak-I ngga kayuh, nyiruja Ayŭh, sidikang ka nadar nyambah Ayŭh.

²⁰Kan ngara muko napat Ayŭh, ngara kadi jipo-ambu adi bēng anŭ ka pari kasŭk piraka adŭp-I. Komŭnŭ ngara taban Ayŭh ruah yŭn masak di rigang.

²¹ Di aran ngara bidapŭd ngga ndi naan daya dŭn Simon, adi mandŭg ka Kupo so sapa tarun tana rais, ka bara soldadu takan ayŭh da gŭrŭng rigang Jesus. (Simon asar daya Cyrene ka mbŭh sama Alexander ngga Rufus.)

²²Ngara taban Jesus ka tarun yŭn adi dŭn Golgotha, rati-i “Tarun yŭn Tikurok.”

²³Diginŭ ngara suba nggen di Ayŭh wain bigaur ngga myrrh, pak Jesus dŭh an nok-i.

²⁴ Komŭnŭ ngara masak Ayŭh di rigang ka kutung piraka-I dupan adŭp ngara, pakai dadu ngga natu barang utung.

²⁵Ngara masak Ayŭh di rigang kan-i mbŭh pukor prii.

²⁶Nyirungan ubak-I agi turis ngga pinganang adi ngga daya nyarah Ayŭh: “Raja daya Jahudi.”

²⁷Ngara gŭh masak duwŭh naan daya arap samah Jesus, ndi tura ka tauh ka ndi tura ka bait. [

²⁸ Ngga simŭnŭ inŭh pinganang Surat-kudus jadi bitŭtŭk adi nang, “Ayŭh sua trima ukum daya arap.”][32]

²⁹ Bara daya adi murah kuting ubak buang bakit Jesus: “Bah meh! Kuu nang adŭp Mu re nyirubuh Ramin Tuhan ka pijog-i darŭm taruh andu!

³⁰Mūn so rigang anŭ madin ka nyiramat adŭp Mu!”

³¹Simŭnŭ gŭh bara pingubak imam ngga gurū Ukum-adat Jahudi napat Ayŭh, nang dupan adŭp-i, “Ayŭh nyiramat daya bŭkŭn, pak Ayŭh dŭh tungang nyiramat adŭp-I!

³²Ja ata tingga, Kristus adi raja daya Israel, mūn so rigang anŭ siŭn ata sabah di Ayŭh!” Ka ngara duwŭh adi dog masak samah ngga Jesus sua gŭh bakit Ayŭh.

³³Ngga yun kumbeng ndi tarun tarun tana rais anŭ mbŭh karŭm, sitian taruh jam.

³⁴ Ngga arong pukor taruh Jesus nyirais ngga sirŭŭn bana, “Eloi, Eloi, lema sabachthani?” rati-i, “Tapa Ku, Tapa Ku, mani Kaam tagan Aku?”

³⁵Agi kada daya diginŭ dingah Ayŭh sakanŭ, ka nang, “Dingah, Ayŭh bagan Elijah!”

³⁶ Ndi so ngara bikaduh taban rimut karang, misa-i ngga wain adi kurang brega, ka na-i di tŭbŭn sikuwang. Komŭnŭ ayŭh ton-i ka bibis Jesus ka nang, “Kajŭn! Ata tingga kambŭi Elijah sawŭ mandŭg di bisor Ayŭh so rigang!”

³⁷Ka nyirais ngga sirŭŭn bana, Jesus katŭd asŭng-I.

³⁸ Tabir adi dog tangid di Ramin Tuhan tiratak nyinuwŭh, so sambu ndŭg sagān-i.

³⁹Pingubak soldadu adi mijog diginŭ nura rigang kiris munki Jesus kabŭs.[33] “Daya ati sawŭ Anak Tapa!” ayŭh nang.

⁴⁰ Kada bara dayung agi diginŭ, tingga so jo. Di uruk ngara agi Mary Magdalene, Mary adi sindŭ James adi mara ka Joseph, ka Salome.

⁴¹Ngara anŭ pinunda Jesus ka ko turung Jesus di andu Ayŭh di Galilee. Bagŭ bara dayung adi bŭkŭn adi tunda Ayŭh mandŭg ka Jerusalem agi gŭh diginŭ.

⁴²Kan-I mbŭh singumi andu, Joseph so Arimathea mandŭg. Ayŭh inŭh daya Kunsil adi dog stabi daya bagŭ, adi kajŭn tipuh Tapa mritah.[34] Andu anŭ mbŭh andu Pinyidia (anŭ inŭh, andu adi diŭ so andu Sabbath), jadi Joseph ngga atin birani mandŭg ka yŭn Pilate ka mite tadang Jesus so ayŭh.

⁴³

⁴⁴Pilate mbŭh inga inga kan-i dingah Jesus mbŭh kabŭs. Ayŭh bagan pingubak soldadu anŭ tejah ka siken tian-ki Jesus mbŭh kabŭs.

⁴⁵Ko-i dingah pinyiripot pingubak soldadu anŭ, Pilate nyibandar Joseph tambit tadang Jesus.

⁴⁶Joseph miris banang linen, bisor tadang Jesus so rigang, marut-I ngga banang anŭ, ka na-I darŭm kubur batuh adi ko dog mubo. Komŭnŭ ayŭh biraring tibande batuh ngga nabat rubang kubur anŭ.

⁴⁷Mary Magdalene ngga Mary adi sindŭ Joseph agi kiris tarun yŭn tadang Jesus dog na.