Read Biatah Bidayuh MARK 2 Bible Online

MARK 2 - Biatah Bidayuh bible

MARK 2

¹Dŭh tui ripas anŭ Jesus pari ka Capernaum, ka agah pasar Ayŭh agi di arŭn-I mbŭh tambus kajit daya bagŭ.

²Jadi sopŭrŭg daya samah samah mandŭg tikuruk ndŭg ka arŭn mbŭh sikidŭn; di sapa di arong tiban mbŭh mating gŭh yŭn. Jesus aŭn nyuse ajar-I di ngara

³kan pat naan daya mandŭg, tawek ndi naan daya naman andam ruku ka yŭn-I.

⁴Batŭn da bara daya, ngara dŭh tungang taban daya anŭ ngga mŭrŭt. Jadi ngara ndai rubang di tibung ramin nyirungan Jesus. Kan ngara muko ndai rubang, ngara bisor daya anŭ ngga ambok-i.

⁵Kiris munki masam bās-i pinyabah ngara, Jesus nang di sianŭ adi naman andam ruku, “Nak, dosa mu mbŭh dog apun.”

⁶Kada gurū Ukum-adat Jahudi adi agi guru diginŭ nang darŭm asŭng ngara,

⁷“Birani raru Ayŭh minyu sakanŭ? Pinganang ujat anŭ! Tapa sadi adŭ bisa apun dosa!”

⁸Jesus puan pikir ngara, jadi Ayŭh nang di ngara, “Mani angān bipikir sakanŭ?

⁹Sanang dŭ kah nŭŭh nang, ‘Dosa mu mbŭh dog apun,’ puan kah nang, ‘Makat, mbit ambok mu, ka panu’?

¹⁰Aku an kiren di angān garang, Anak Manusia biyŭn kuasa di ong ngga apun dosa.” Jadi Ayŭh nang di sianŭ adi naman andam ruku,

¹¹“Aku nang di kuu, makat, mbit ambok mu, ka maad!”

¹²Di sirung jawin bara daya bagŭ, ayŭh makat, mbit ambok-i, ka bigaut bu. Sopŭrŭg daya diginŭ mbŭh inga inga ka muji Tapa, nang, “Gi-bŭn ata kiris kayuh mun ati!”

¹³Jesus pari dinge ka tabing Danu Galilee. Bara daya mandŭg tudu Ayŭh, ka Ayŭh piguru ngajar ngara.

¹⁴Darŭm-I panu, Ayŭh kiris ndi naan pinsuke, Levi anak Alphaeus, guru di yŭn-i nyiraja. Jesus nang di ayŭh, “Tunda Aku.” Levi makat ka tunda Ayŭh.

¹⁵Ripas anŭ Jesus guru man di ramin Levi. [6] Bagŭ pinsuke samŭn daya adi dog tirawan tunda Jesus. Ka bagŭ ngara sua man ngga Ayŭh samah bara murid-I.

¹⁶Agi kada so bara gurū Ukum-adat Jahudi, adi bara Pharisee, kiris Jesus man ngga bara daya adi dog tirawan anŭ samŭn bara pinsuke, ka ngara siken bara murid-I, “Mani Ayŭh biruman ngga bara daya adi mun anŭ?”

¹⁷Jesus dingah ngara ka-I nam, “Daya adi bua dŭh-i biguna di doktor, pak ngara adi birandam inŭh. Aku dŭh mandŭg di bagan daya adi nang adŭp-i kana, pak di bagan ngara adi dog tirawan.”

¹⁸Ko ndi sidah kan bara pinunda John Pembaptisa ka pinunda bara daya Pharisee bipusa, kada daya mandŭg tudu Jesus ka siken Ayŭh, “Mani bara murid John Pembaptisa ka murid daya Pharisee bipusa, ka jamai dŭh?”

¹⁹Jesus nam, “Bisa kah bara pingabang di gawai sawan dŭh man? Manŭn dŭh! Siragi pingaten dari agi ngga ngara, ngara dŭh re ndai simŭnŭ.

²⁰Pak andu-i re mandŭg kan pingaten dari re dog tambit so ngara; nganŭ ngara bisa bipusa.

²¹“Mating daya pakai supek banang adi bauh ngga napung piraka adi amba, sabab supek adi bauh re kŭrŭng ka nyiratak banang adi amba, ka rubang-i re rabis baga.

²²Dŭh gŭh daya ren wain adi bauh darŭm bŭrŭh-kurit adi amba, sabab wain anŭ re mubus kurit anŭ, ka soduwŭh-i wain ngga bŭrŭh-kurit re rusak. Wain adi bauh patut dog ren darŭm bŭrŭh-kurit adi tibŭn.”

²³ Jesus panu mutas teya teya gandom di andu Sabbath. Darŭm ngara panu samah ngga Ayŭh, bara murid-I nyaked tundun gandom.

²⁴Ka bara daya Pharisee nang di Jesus, “Tingga, rawan Ukum-adat ta inŭh bara murid Mai ndai simŭnŭ di andu Sabbath!”

²⁵ Jesus nam, “Bŭn kah angān basa kayuh adi David ndai di andu ayŭh biguna di pinguman? Ayŭh ngga bara dingan-i sibŭrŭk,

²⁶ jadi ayŭh mŭrŭt Bari Tapa ka man ruti adi mbŭh dog jugan ka Tapa. Kayuh anŭ jadi simŭnŭ di jaman Abiathar jadi Imam Bās. Nanyam ka Ukum-adat, kaŭs-i bara imam adŭ adi bisa man ruti anŭ; pak David, dŭh-i man-i adŭ, pak mbŭh kutung-i ngga bara dingan-i.”

²⁷Ngga kubo pinganang-I, Jesus nang, “Andu Sabbath dog ndai yŭn guna manusia; manusia dŭh dog ndai yŭn andu Sabbath.

²⁸Jadi Anak Manusia gŭh biyŭn kuasa di tunduh andu Sabbath.”