Read Biatah Bidayuh MARK 3 Bible Online

MARK 3 - Biatah Bidayuh bible

MARK 3

¹Komŭnŭ Jesus pari ka ramin simayang-Jahudi, di yŭn agi ndi naan daya adi tangan-i mabŭs ndi.

²Agi kada daya diginŭ adi raan jiroh arap Jesus; jadi ngara nakit ngatin Ayŭh, an puan re-I pibua kah dŭh daya di andu Sabbath.

³Jesus nang di daya anŭ, “Mandŭg kamati ka jawin.”

⁴Jadi Ayŭh siken bara daya, “Kayuh ani adi Ukum-adat bada ata ndai di andu Sabbath? Turung daya kah kandam daya? Nyiramat asŭng daya kah kinanyap asŭng daya?” Pak ngara dŭh nang ani ani.

⁵Jesus tuas buang-I tingga ngara bait tauh-I, pak masi di ngara, sabab ngara paŭh baking buang sarah. Jadi Ayŭh nang di daya anŭ, “Ton tangan mu.” Ayŭh ton tangan-i, ka-i pari bua.

⁶Ka bara daya Pharisee bu so ramin simayang-Jahudi anŭ ka rasu tikuruk ngga tibaran daya Herod, ka bisatur an siŭ Jesus.

⁷Jesus ngga bara murid-I bu ka Danu Galilee, ka bara bara daya tunda Ayŭh. Ngara mandŭg so Galilee, so Judea,

⁸so Jerusalem, so tarun tana Idumea, so tarun tana Jordan tura ka timor, ka so abong tarun tana maning kupo kupo Tyre ngga Sidon. Sopŭrŭg ngara anŭ mandŭg ka yŭn Jesus sabab ngara mbŭh dingah kayuh adi-I ndai.

⁹ Bara daya mbŭh raru bagŭ, ka Jesus bada bara murid-I sidia arud yŭn-I, isa daya dŭh nyikidŭn Ayŭh.

¹⁰Ayŭh ko pibua bagŭ daya, ngapŭi sopŭrŭg ngara adi birandam mbŭh samah birabut an tama Ayŭh.

¹¹Ka tiap kari daya adi dog mŭrŭt roh arap kiris Ayŭh, ngara sidikang di kaja Jesus ka nyirais nang, “Kaam Anak Tapa!”

¹²Jesus mritah roh arap anŭ da dŭh kidaan di tadŭ tadŭ daya asi Ayŭh.

¹³Komŭnŭ Jesus maad ndi sandah ka bagan sopŭrŭg daya adi-I raan. Ngara mandŭg tudu Ayŭh,

¹⁴ka Ayŭh mien simŭng-duwŭh naan, adi-I kadŭn pinyuruh. “Aku mbŭh mien angān da agi ngga adŭp Ku,” Ayŭh nang di ngara. “Aku gŭh re pait angān da ngajar,

¹⁵ka angān gŭh re biyŭn kuasa ngga pibu umot.”

¹⁶Ati inŭh ngara adi simŭng-duwŭh naan adi-I mbŭh mien: Simon (Jesus kadŭn ayŭh Peter);

¹⁷James ngga jurud-i John, anak Zebedee (Jesus kadŭn ngara Boanerges, rati-i “Daya Dudū”);

¹⁸Andrew, Philip, Bartholomew, Matthew, Thomas, James anak Alphaeus, Thaddaeus, Simon adi Patriotik,

¹⁹ka Judas Iscariot, adi jua Jesus.

²⁰Komŭnŭ Jesus maad. Babŭ gŭh bara daya mandŭg tikuruk ndŭg ka Jesus ngga bara murid-I dŭh tungang man.

²¹Rawang Jesus mandŭg re di tambit Ayŭh kan ngara dingah daya nang, “Ayŭh mbŭh gira!”

²² Agi kada gurū Ukum-adat Jahudi adi mandŭg so Jerusalem nang, “Ayŭh dog mŭrŭt Beelzebul! Pingubak umot inŭh adi nggen di Ayŭh kuasa ngga pibu umot.”

²³Jadi Jesus bagan ngara ka minyu di ngara pakai upama: “Simuki Shetan bisa taran Shetan?

²⁴Kambŭi ndi rais bikaii ka nimbur bagŭ tibaran adi biperang dupan adŭp-i, rais anŭ taŭn re pape.

²⁵Kambŭi ndi rawang bikaii ka nimbur bagŭ tibaran adi biperang dupan adŭp-i, rawang anŭ re pape.

²⁶Jadi kambŭi pritah Shetan biperang dupan adŭp-i, ayŭh dŭh re tan tui, pak re pape ka mating tia.

²⁷“Mating daya tungang mŭrŭt ramin daya bake ka taban barang-i ngga bu, kambŭi-i dŭh diŭ mŭŭng daya bake anŭ; ko ndai simŭnŭ ka ayŭh tungang gruga ramin-i.

²⁸“Ingat nŭh! daya bisa dog apun so sopŭrŭg dosa-i ka so sopŭrŭg kayuh arap adi-i nang.[7]

²⁹ Pak asi asi adi nang kayuh arap rawan Roh Kudus re dŭh dog apun, sabab ayŭh mbŭh ndai dosa ruro.” (

³⁰Jesus nang sakanŭ amai agi kada daya nang, “Ayŭh dog mŭrŭt roh arap.”)

³¹Komŭnŭ sindŭ Jesus ngga bara jurud-I mandŭg. Ngara mijog di sapa ramin ka pait pinganang, mite Ayŭh bidapŭd ngga ngara.

³²Bara daya guru maning Jesus, ka ngara nang di Ayŭh, “Tingga, sindŭ Mai ngga bara jurud Mai agi di sapa, bagan Kaam.”

³³Jesus nam, “Asi sindŭ Ku? Asi bara jurud Ku?”

³⁴Ayŭh tingga sopŭrŭg daya adi guru maning adŭp-I ka nang, “Tingga! digiti inŭh sindŭ Ku ka bara jurud Ku!

³⁵Asi asi adi ndai kayuh adi Tapa bada ayŭh ndai inŭh jurud dari Ku, jurud dayung Ku, sindŭ Ku.”