Read Biatah Bidayuh MARK 4 Bible Online

MARK 4 - Biatah Bidayuh bible

MARK 4

¹ Jesus piguru ngajar dinge di bŭngŭn Danu Galilee. Bara daya adi tikuruk maning Ayŭh mbŭh raru bagŭ ndŭg ka Ayŭh mindah ka guru darŭm arud. Arud anŭ di piin, ka bara daya mijog di tabing sindŭk piin.

²Ayŭh pakai upama ngga ngajar ngara pasar bagŭ masam kayuh; Ayŭh nang di ngara:

³“Dingah ati! Agi ndi sidah, ndi naan daya matak di nabur bine.

⁴Darŭm ayŭh nabur bine, kada bine rabu di aran, ka manuk mandŭg di man-i.

⁵Kada rabu di tana pibatuh, di yŭn kurang tana. Bine anŭ timbu, sabab tana anŭ dŭh tŭrŭp.

⁶Jadi, kan batŭh andu makat, ayŭh dog paras sura; ka sabab uat-i dŭh tŭrŭp, ayŭh rayu.

⁷Kada bine rabu di ruang reja, adi timbu ka piaka ayŭh ndŭg ka-i dŭh buān.

⁸Pak kada bine rabu di tana mandis, ayŭh timbu, jadi, ka piruah bagŭ buwa: agi adi taruh puru rupet, agi adi nŭm puru, ka agi adi siratus.”

⁹Ka Jesus nang, “Dingah meh garang, kambŭi angān biyŭn kajit!”

¹⁰Kan Jesus mbŭh sadi, kada ngara adi ko dingah Ayŭh mandŭg tudu Ayŭh ngga ngara adi simŭng-duwŭh naan murid-I ka mite Ayŭh kidaan rati upama anŭ.

¹¹“Angān dog nggen kuasa ngga mirati rusia pasar munki Tapa mritah,”[8] Jesus nam ngara. “Pak ngara adi bŭkŭn, adi dŭh so tibaran ngan, dingah sopŭrŭg kayuh pakai upama,

¹² isa, ‘Ngara bisa tingga ka tingga, pak dŭh kiris; ngara bisa dingah ka dingah, pak dŭh mirati. Amai kambŭi dŭh, ngara an pari ka Tapa, ka Tapa apun ngara.’ ”

¹³Jadi Jesus siken ngara, “Angān dŭh mirati upama ati? Simuki meh garang angān re mirati upama adi bŭkŭn?

¹⁴Ayŭh adi nabur bine nabur agah Tapa.

¹⁵Agi kada daya mbŭh keya ka bine adi rabu di aran; darŭm ngara dingah agah Tapa, Shetan mandŭg ka rasu sirapas-i.

¹⁶Adi bŭkŭn mbŭh keya ka bine adi rabu di tana pibatuh. Kan ngara dingah agah anŭ, ngara rasu kambat-i ngga gaŭn.

¹⁷Pak-i dŭh mŭrŭt tŭrŭp ka darŭm ngara, ka ngara dŭh tan tui. Jadi kan pinyusah ngga pinyikisiis mandŭg sitagar agah anŭ, ngara jimŭ ka dŭh tia sabah dieh.

¹⁸Adi bŭkŭn mbŭh keya ka bine adi dog nabur di ruang reja. Ngara inŭh adi dingah agah anŭ,

¹⁹pak pinyusah pasar pimudip, pinyiawang di pinyikaya, ngga sopŭrŭg pinyiripong adi bŭkŭn mbŭh piaka agah anŭ da-i dŭh buān buwa.

²⁰Pak adi bŭkŭn mbŭh keya ka bine adi dog nabur di tana adi mandis. Ngara dingah agah anŭ, trima-i, ka buān bagŭ buwa: agi taruh puru rupet, agi nŭm puru, ka agi adi siratus.”

²¹ Jesus pijuu minyu, “Agi kah daya taban prita mŭrŭt ka na-i di ribo sambong, puan kah na-i di ribo pangō? Dŭh kah ayŭh na-i di tunduh rika prita?

²² Tadŭ tadŭ kayuh adi dog sukan re dog taban ka sapa, ka tadŭ tadŭ rusia re dog kidaan di daya.

²³Dingah garang, kambŭi angān biyŭn kajit!”

²⁴ Ayŭh nang gŭh di ngara, “Nakit ngatin kayuh adi angān dingah! Atur adi angān pakai ngga tingga arap kana daya re Tapa pakai ngga tingga arap kana adŭp ngan; pak jangān re rabis bat.

²⁵ Daya adi biyŭn re dog nggen tambah-i, ka daya adi dŭh biyŭn ani ani rapuh kayuh adi-i biyŭn re dog tambit gŭh so ayŭh.”

²⁶Jesus pijuu nang, “Kan Tapa mritah kayuh re keya ka ndi naan daya adi nabur bine di ŭmŭh-i.

²⁷Sitadŭn ayŭh bŭŭs singarŭm ka burah sandu ndai kraja-i, bine anŭ timbu. Pak ayŭh dŭh puan munki-i timbu.

²⁸Adŭp tana inŭh adi bada-i timbu ka buān buwa; sibungas-i ayŭh prisok, komŭnŭ ayŭh bitundun, sikasŭn-i tundun anŭ puno ngga buwa.

²⁹ Kan buwa mbŭh masak, daya sun buwa-i amai-i mbŭh tipuh ngatŭm.

³⁰[9] “Munki gaya kayuh kan Tapa mritah?” Jesus siken. “Upama ani re ta pakai ngga kidaan rati-I?

³¹Ayŭh agi simuti. Ndi naan daya taban ndi sirah ruwang sabi, ruwang adi siabo siit di ong, ka purun-i di tana.

³²Kan-i mbŭh timbu, ayŭh jadi bās dŭ so sigara kudos. Ayŭh pijadi daan daan adi dang yŭn manuk bisarin di ribo sayung-i.”

³³Jesus nyuse ajar-I pakai bagŭ masam upama adi mun anŭ, yŭn situngang tungang ngara mirati.

³⁴Ayŭh taŭn ari pakai upama kan-I ngajar, pak kan Ayŭh mbŭh sadi ngga bara murid-I, Ayŭh kidaan rati sopŭrŭg-i di ngara.

³⁵Di andu anŭ, ngga arong singumi andu, Jesus nang di bara murid-I, “Ja ata mutas ka pah mandi rawŭt ati.”

³⁶Jadi ngara tingge bara daya; bara murid-I mŭrŭt arud di yŭn Jesus taŭn mbŭh guru, ka matak ayō Ayŭh. Arud arud adi bŭkŭn agi gŭh diginŭ.

³⁷Ka gŭgŭh agi sabak ribut, ka girumbang maka arud ndŭg ka mbŭh re puno da piin.

³⁸Jesus agi di tura ka punok arud, bŭŭs pakai batar. Bara murid-I kies Ayŭh buang nang, “Gurū, dŭh kah Kaam piduri ata ati mbŭh re rŭnggŭd?”

³⁹Jesus makat ka mritah sabak, “Pajam!” ka-I nang di rawŭt, “Pirŭŭ adŭp mu!” Sabak rasu rŭŭ, ka sopŭrŭg-i mbŭh batur tanang.

⁴⁰Ka Jesus nang di bara murid-I, “Mani angān taru? Babŭ kah angān dŭh sabah di Aku?”

⁴¹Pak ngara mbŭh raru taru ka nang dupan adŭp-i, “Asi sawŭ daya ati? Ndŭg ka sabak ngga girumbang tunda pinganang-I!”