Read Biatah Bidayuh MARK 6 Bible Online

MARK 6 - Biatah Bidayuh bible

MARK 6

¹Jesus bu so nŭ di ka kupo adŭp-I, dog tunda bara murid-I.

²Di andu Sabbath Ayŭh piguru ngajar di ramin simayang-Jahudi. Diginŭ agi bagŭ daya; ka kan ngara dingah ajar-I, ngara mbŭh inga inga. “So ki ayŭh dapŭd sopŭrŭg kayuh ati?” ngara siken. “Pinyibijak ani ati adi mbŭh dog nggen di Ayŭh? Simuki Ayŭh ndai pingandai-nginga?

³Dŭh kah Ayŭh tukang-kayuh, anak Mary, jurud James, Joseph, Judas, ka Simon? Dŭh kah bara jurud dayung-I rŭŭ digiti?” Ka ngara meh tirawan Ayŭh.

⁴ Jesus nang di ngara, “Nabi dog stabi di barang yŭn, adŭ-i di kupo adŭp-i ka di dupan bara madis-i ka rawang-i.”

⁵Dŭh Ayŭh tungang ndai pingandai-nginga diginŭ, adŭ-I tungang na tangan-I di tunduh kada daya adi birandam ka pibua ngara.

⁶Ayŭh mbŭh ruai nginga kan-I kiris daya dŭh sabah di adŭp-I. Komŭnŭ Jesus di ka anak anak kupo di arong anŭ, ngajar daya.

⁷Ayŭh bagan ngara adi simŭng-duwŭh naan da tikuruk ka pait ngara duwŭh duwŭh naan. Ayŭh nggen di ngara kuasa ngga pibu roh arap

⁸ ka pesan ngara, “Dŭhnyah taban ani ani di pimanu ngan, adŭ-i sikud; dŭhnyah taban ruti, dŭhnyah taban beg, dŭhnyah taban duit di krape ngan.

⁹Pakai kasut, pak dŭhnyah taban rabis jipo.”

¹⁰Ayŭh nang gŭh di ngara, “Di tadŭ yŭn ngan dog trima, rŭŭ di ramin anŭ ndŭg ka angān bu so kupo anŭ.

¹¹ Kambŭi angān mandŭg ka kupo di yŭn daya dŭh trima angān puan kah abah dingah pinganang ngan, bu so nŭ ka gutog dabu so kaja ngan. Anŭ jadi pinyibakan di ngara!”

¹²Jadi ngara ruah ka ngajar daya da marik pimudip ngara pari ka Tapa.

¹³ Ngara pibu bagŭ umot, ka susen inyo kanā di bagŭ daya adi birandam ka pibua ngara.

¹⁴ Raja Herod[11] dingah sopŭrŭg kayuh anŭ, sabab adŭn Jesus mbŭh kambang di barang yŭn. Kada daya nang, “John Pembaptisa mbŭh pari udip dinge! Ngapŭi ayŭh biyŭn kuasa ngga ndai pingandai-nginga.”

¹⁵Pak agi adi bŭkŭn nang, “Ayŭh inŭh Elijah.” Adi bŭkŭn nang, “Ayŭh inŭh nabi, mun ndi so bara nabi ndun jah.”

¹⁶Kan Herod dingah, ayŭh nang, “Ayŭh John Pembaptisa! Ubak-i aku ko kapŭg, pak ayŭh mbŭh pari udip dinge!”

¹⁷ Adŭp Herod ko nggen ukum bada John dog nakap, ka ayŭh gŭh adi bada ayŭh dog muak ka dog na darŭm jer. Herod ndai simŭnŭ sitagar Herodias, adi-i tambit ndu sawŭn, adi taŭn mbŭh sawŭn jurud-i Philip.

¹⁸John Pembaptisa agi marar kidaan di Herod, “Dŭh-i batur kuu tambit sawŭn jurud mu ndu sawŭn!”

¹⁹Jadi Herodias mandam atin-i di John ka raan siŭ ayŭh, pak ayŭh dŭh tungang sabab Herod abah bada.

²⁰Herod taru John sabab ayŭh puan John daya adi kana buang kudus, jadi ayŭh nakit ngga ayŭh. Ayŭh suka dingah John minyu, sunggu ayŭh dŭh gimanyam dingah piminyu-i.

²¹Sikasŭn-i Herodias dapŭd pluang-i. Anŭ inŭh di andu pinyibranak Herod, kan ayŭh kuka gawai yŭn sopŭrŭg daya adi bās darŭm pritah-i, pingibās pingibās soldadu, ka sopŭrŭg daya adi bās di Galilee.

²²Anak dayung Herodias[12] mŭrŭt ka bitanda, ka pimunos asŭng Herod samŭn bara pingabang-i. Jadi raja nang di dayung anŭ, “Ani an mu biyŭn? Aku bisa nggen tadŭ tadŭ kayuh adi kuu raan.”

²³Ayŭh nang di dayung anŭ ngga payu, “Aku bipayu aku an nggen tadŭ tadŭ kayuh di kuu, bait-i sitangah rais adi aku mritah!”

²⁴Jadi dayung anŭ di ruah ka siken di sindŭ-i, “Ani re ku mite?” “Ubak John Pembaptisa,” ayŭh nam.

²⁵Dayung anŭ bigaut pari ka raja ka mite, “Aku raan kaam nggen madin di pinggen ubak John Pembaptisa!”

²⁶Pimite anŭ bada raja susah, pak ayŭh dŭh tungang nyipunok pimite anŭ sabab ayŭh ko bipayu di sirung jawin sopŭrŭg pingabang.

²⁷Jadi ayŭh pait soldadu da di tambit ubak John. Soldadu anŭ di ka ramin jer, ka kapŭg ubak John;

²⁸komŭnŭ ayŭh taban-i di pinggen ka nggen-i di dayung anŭ, adi nggen-i di sindŭ-i.

²⁹Kan murid murid John dingah kayuh anŭ, ngara mandŭg ka tambit tadang-i yŭn kubur.

³⁰Bara pinyuruh pari ka tudu Jesus, ka kidaan di Ayŭh sopŭrŭg kayuh adi ngara ko ndai ka ngajar.

³¹Daya mbŭh raru bagŭ, agi adi mandŭg agi adi bu, ndŭg ka Jesus ngga bara murid-I mbŭh dŭh adŭ paya re man. Jadi Ayŭh nang di ngara, “Ja ata di ka tarun adi yŭn ta bisa sadi ka adi yŭn ngan bisa rŭŭ nyitiro so kraja ngan.”

³²Jadi ngara matak pakai arud sadi adŭp ngara ka tarun yŭn adi pajam.

³³Pak bagŭ daya kiris ngara matak ka rasu natŭng ngara; jadi ngara so barang kupo matak gŭh, ka bikaduh diŭ so deyŭh ka mandŭg ka tarun anŭ diŭ so Jesus ngga bara murid-I.

³⁴ Kan Jesus ruah so arud, Ayŭh kiris bara daya, ka mbŭh raru masi di ngara, sabab ngara agi keya ka bara biri adi dŭh biyŭn pingingat. Jadi Ayŭh piguru ngajar bagŭ kayuh di ngara.

³⁵Kan andu mbŭh re karŭm, bara murid-I tudu Ayŭh ka nang, “Andu mbŭh re karŭm, ka tarun ati inŭh tarun pajam.

³⁶Bada maad adŭ bara daya ati, siŭn ngara bisa di ka teya teya ka anak anak kupo dŭh jo so ti di miris kayuh man.”

³⁷“Adŭp ngan nggen kayuh man di ngara,” Jesus nam. Ngara siken, “Agi kah sirati-i pinganang Mai anŭ bada kieh pakai duwŭh ratus kiping duit pirak ngga miris ruti yŭn ngara?”

³⁸Jadi Jesus siken ngara, “Kiang-ki ruti angān biyŭn? Bah tingga.” Kan ngara mbŭh dapŭd, ngara kidaan di ayŭh, “Rimŭh baru ruti ka duwŭh iken.”

³⁹Jesus rasu bada bara murid-I ngatur daya da guru di kupai barŭm darŭm bagŭ tibaran.

⁴⁰Ka bara daya guru bititan, ngga tibaran tibaran adi siratus ka tibaran tibaran adi rimŭh-puru.

⁴¹Komŭnŭ Jesus tambit ruti anŭ adi rimŭh baru samŭn duwŭh iken, nyigura ka rangit, ka nggen trima kaseh di Tapa. Ayŭh mire ruti anŭ ka nggen-i di bara murid-I yŭn kutung di bara daya. Ayŭh kutung gŭh iken anŭ yŭn sopŭrŭg ngara.

⁴²Sopŭrŭg daya man ka mbŭh bisoh.

⁴³Komŭnŭ bara murid nguruk simŭng-duwŭh bakur puno ngga tadŭh ruti ka iken anŭ.

⁴⁴Bara dari adi dog paan diginŭ agi rimŭh ribu naan.

⁴⁵Jesus rasu bada bara murid-I mŭrŭt arud ka matak diŭ so adŭp-I ka Bethsaida, di pah mandi rawŭt anŭ, atan adŭp-I bada bara daya anŭ maad.

⁴⁶Ripas Jesus ko tingga bara daya anŭ panu, Ayŭh di ka ndi sandah di simayang.

⁴⁷Kan-i mbŭh karŭm, arud mbŭh di yun rawŭt, atan Jesus sadi-I di deyŭh.

⁴⁸Ayŭh kiris bara murid-I mbŭh susah payah bikayuh, amai bikayuh rawan sabak; jadi ngga arong pukor taruh ngga pukor nŭm isan isan, Ayŭh mandŭg tudu ngara, panu di tunduh piin. Ayŭh panu re an rewan adŭ ngara,[13]

⁴⁹pak ngara kiris Ayŭh panu di tunduh piin. “Mindo anŭ!” ngara nang buang nyirais taru.

⁵⁰Sopŭrŭg ngara mbŭh tikaran kan ngara kiris Ayŭh. Jesus rasu minyu di ngara, “Nagap yang ngan!” Ayŭh nang. “Aku inŭh ati. Dŭhnyah taru!”

⁵¹Ka Ayŭh mŭrŭt arud ka yŭn ngara, ka sabak ribut gŭh rŭŭ. Bara murid-I mbŭh bana inga inga,

⁵²sabab ngara gi-dŭh puan ani rati paan daya rimŭh ribu naan anŭ; pikir ngara dŭh tungang nakap rati pingandai anŭ.

⁵³Ngara mutas rawŭt anŭ ka mandŭg ka tabing Gennesaret, di yŭn ngara mŭŭng arud ngara ka deyŭh.

⁵⁴Darŭm ngara tingge arud, daya mbŭh rasu natŭng Jesus.

⁵⁵Jadi ngara bikaduh di ndi tarun tana anŭ; ka di barang yŭn ngara dingah Ayŭh agi, ngara taban sinadan daya adi birandam guring di ambok ka yŭn-I.

⁵⁶Ka di barang yŭn Jesus panu, bait-i di kupo puan kah di anak anak kupo, puan kah di teya, daya taban daya adi birandam ka arong passar ka mite Ayŭh nyibandar daya adi birandam tama piji ka tŭbŭn jipo-I. Ka sawŭ, sopŭrŭg adi tama-i mbŭh bua.