Read Biatah Bidayuh MARK 7 Bible Online

MARK 7 - Biatah Bidayuh bible

MARK 7

¹Agi kada daya Pharisee ngga gurū Ukum-adat Jahudi adi mandŭg so Jerusalem, tikuruk maning Jesus.

²Ngara kiris kada so bara murid Jesus man ngga tangan kais, anŭ inŭh dŭh mbe nunda atur adat adi daya Pharisee ko nggen di ngara. (

³Amai daya Pharisee, ka simŭnŭ gŭh daya Jahudi adi bŭkŭn, tunda ajar adi ngara trima so tayung-babuk ngara: ngara dŭh man kambŭi dŭh mbe nanyam ka gaya adi mbŭh dog nggen;

⁴dŭh gŭh ngara man tadŭ tadŭ kayuh so passar kambŭi bayuh dog ngu.[14] Bagŭ gŭh atur adi bŭkŭn adi ngara ko trima, mun gaya ngu saker, priok, makuk timaga, ka pangō.[15])

⁵Jadi bara daya Pharisee ka gurū Ukum-adat Jahudi siken Jesus, “Mani bara murid Mai man dŭh mbe, dŭh tunda ajar so tayung-babuk ta?”

⁶ Jesus nam ngara, “Batur pinganang nabi Isaiah kan ayŭh minyu-binabi pasar angān! Nimun adi nuris-i, angān pingadong: ‘Daya ati, Tapa nang, stabi di Aku ngga baba-i, pak atin ngara mbŭh sawŭ jo so Aku.

⁷Mating guna-i ngara nyambah Aku, sabab ngara ngajar atur adi manusia ndai ka bada-i mun ukum-adat Ku!’

⁸“Angān sān ka bŭngŭn pinyipesan Tapa, ka tunda ajar manusia.”

⁹Ka Jesus nang gŭh, “Angān mbŭh biyŭn akar ngga tirawan ukum-adat Tapa siŭn angān bidigŭng di ajar adŭp ngan.

¹⁰ Amai Moses ko pesan, ‘Stabi di sindŭ sama ngan,’ ka, ‘kambŭi angān mangu sindŭ sama ngan, angān dŭh siŭn dŭh dog ukum kabŭs.’

¹¹Pak angān ngajar nang kambŭi daya biyŭn kayuh adi-i bisa pakai ngga turung sindŭ sama-i, pak nang, ‘Ati Korban’ (anŭ inŭh, tung Tapa),

¹²ngara mbŭh dog pirupas so turung sindŭ sama ngara.

¹³Simuti inŭh meh ajar adi angān nggen di daya mbŭh kinating pinganang Tapa. Ka bagŭ gŭh adi bŭkŭn, adi mun ati, adi angān ndai.”

¹⁴Ka Jesus bagan bara daya ka adŭp-I dinge ka nang di ngara, “Dingah pinganang Ku ati, sopŭrŭg ngan, ka mirati meh.

¹⁵Mating kayuh adi so ka sapa adi mŭrŭt daya bisa kinais daya. Pak kayuh adi ruah so daya inŭh adi kinais daya.” [

¹⁶Dingah, garang, kambŭi angān biyŭn kajit!][16]

¹⁷Kan Ayŭh mbŭh tingge bara daya ka mŭrŭt ka darŭm arŭn, bara murid-I mite Ayŭh kidaan rati pinganang anŭ.

¹⁸“Angān taŭn mbŭh dŭh adŭ pandai so ngara adi bŭkŭn,” Jesus nang di ngara. “Angān dŭh mirati kah? Mating kayuh adi mŭrŭt daya so ka sapa bisa kinais daya,

¹⁹sabab kayuh anŭ dŭh mŭrŭt atin-i pak radus ka tain-i ka komŭnŭ ruah so pŭrŭng-i.” (Ngga pinganang ati, Jesus kidaan nang sopŭrŭg pinguman bisa dog man.)

²⁰Ka Ayŭh pijuu nang, “Kayuh adi ruah so daya inŭh adi kinais daya;

²¹amai so tura ka darŭm, so atin daya, sopŭrŭg pikir-kira adi arap mandŭg, adi taban daya ndai pingandai adi dŭh tatu, mirupak, siŭ daya,

²²tanggah, tama, ka sopŭrŭg pingandai arap adi bŭkŭn; kadong, pingandai kais, sina, napŭ daya, sambuh, ka pimudip adi dŭh taru di Tapa.

²³Sopŭrŭg kayuh arap ati mandŭg so tura ka darŭm, ka kinais daya.”

²⁴Jadi Jesus bu so nŭ ka matak ka tarun tana dŭh jo so kupo Tyre. Ayŭh mŭrŭt ndi ramin, ka abah-I bada daya puan adŭp-I agi diginŭ, pak dŭh-I tungang bisukan.

²⁵Ndi naan dayung adi biyŭn ndi anak dayung-i adi dog mŭrŭt roh arap, dingah pasar Jesus ka rasu mandŭg tudu Ayŭh ka sidikang di kaja-I.

²⁶Dayung anŭ dŭh bangsa Jahudi, dog biranak di tarun tana Phoenicia di Syria. Ayŭh mite Jesus pibu umot so anak dayung-i.

²⁷Pak Jesus nam, “Ata nggen man di anak-sŭ diŭ. Dŭh ata patut taran pinguman anak-sŭ ka kasong.”

²⁸“Tuan,” ayŭh nam, “Kasong babŭ gŭh man tatuh pinguman anak-sŭ di ribo mija!”

²⁹Ka Jesus nang di ayŭh, “Sabab pinyinam mu sakanŭ, maad meh, umot anŭ mbŭh ruah so anak dayung mu!”

³⁰Ayŭh maad ka dapŭd anak dayung-i guring di pangō; ka umot anŭ sawŭ mbŭh ruah so ayŭh.

³¹Komŭnŭ Jesus bu so tarun tana maning Tyre, pijuu pimanu-I tambus Sidon ka nuju Danu Galilee, panu so ka tarun tana Kupo-Simŭng.

³²Kada daya taban ndi naan daya adi bangam buang dŭh pandai minyu ka yŭn-I; ngara mite Jesus na tangan-I di tunduh ayŭh.

³³Jesus taban ayŭh bu, jo so daya bagŭ, na trinju-I di kajit-i, nyiruja, ka tama jura-i.

³⁴Komŭnŭ Jesus nyigura ka rangit, ngasŭng, ka nang di daya anŭ, “Ephphatha,” rati-i “Kanga!”

³⁵Jam anŭ gŭh daya anŭ dapŭd minyu dinge, bawa-i mbŭh bu, ka-i piguru minyu ngga tirase.

³⁶Komŭnŭ Jesus pesan daya bagŭ anŭ da dŭh nang ani ani pasar kayuh anŭ di tadŭ tadŭ daya; pak makin-I nagah, makin gŭh ngara pigarau-i.

³⁷Ka sopŭrŭg daya adi dingah kayuh anŭ mbŭh sadi inga inga. “Mbŭh sukup kana pingandai-I!” ngara nang. “Daya adi bangam Ayŭh bada dapŭd dingah, ka daya adi dŭh pandai minyu Ayŭh bada dapŭd minyu!”