Read Biatah Bidayuh LUKE 10 Bible Online

LUKE 10 - Biatah Bidayuh bible

LUKE 10

¹Ripas anŭ Jesus mien ju puru-duwŭh[27] naan ngara adi bŭkŭn ka pait ngara duwŭh duwŭh naan da panu diŭ so adŭp-I ka barang kupo samŭn tarun adi re-I ka.

² Ayŭh nang di ngara, “Buwa pingatŭm mbŭh raru bagŭ, pak daya adi ngatŭm dŭh bagŭ. Bidua ka Ayŭh adi dapu pingatŭm isa Ayŭh pait daya da di ngatŭm.

³ Panu meh! Aku pait angān keya ka anak anak biri di ruang kasong kasong tarun.

⁴ Dŭhnyah taban kambut duit, bait beg, puan kah kasut; dŭhnyah rŭŭ ka tabi daya di aran.

⁵Kan angān mŭrŭt ramin, diŭ nang, ‘Damai ka ramin ati.’

⁶Kambŭi daya adi rindu damai agi rŭŭ diginŭ, isa tabi damai ngan rŭŭ ngga ayŭh; kambŭi dŭh, tambit pari tabi damai ngan.

⁷ Rŭŭ di ramin anŭ, man nok tadŭ kayuh adi ngara nggen di angān, amai daya adi nyiraja patut dog nggen gaji-i. Dŭhnyah mindah so ramin ndi di ka ramin ndi.

⁸Kan angān mŭrŭt kupo ka dog kambat, man anŭ adi daya ngidang di ngan.

⁹Pibua daya adi birandam di kupo anŭ ka nang di ngara, ‘Dŭm dŭh tui Tapa re Mritah.’[28]

¹⁰ Pak kan angān mŭrŭt kupo ka daya dŭh kambat angān, di ka aran raya ka nang,

¹¹‘Dabu kupo ngan adi rakat di kaja ami kieh tapis gŭh pari ka angān. Pak ingat dŭm dŭh tui Tapa re mritah!’

¹² Ingat meh, di Andu Bisara Tapa re masi dŭ di daya di kupo Sodom so di daya di kupo anŭ!

¹³ “Mbŭh raru payah-i re di kuu, Chorazin! Mbŭh raru payah gŭh di kuu, Bethsaida! Kambŭi pingandai-nginga anŭ adi ko dog ndai darŭm angān dog ndai darŭm Tyre ngga Sodom, daya diginŭ mbŭh tui ko guru, nēn piraka guni, ka ngabu apŭk di adŭp-i, ngga kiren adŭp-i mbŭh marik pimudip-i pari ka Tapa!

¹⁴Di Andu Bisara, Tapa re masi dŭ di daya di kupo Tyre ngga di daya di kupo Sidon so di angān.

¹⁵ Ka kuu, Capernaum! Dŭh kah kuu ko an katuh adŭp mu ndŭg shorga? Kuu re dog taran ka neraka!”

¹⁶ Jesus nang di bara murid-I, “Daya adi dingah pinganang ngan dingah pinganang Ku; daya adi tirawan angān tirawan Aku; daya adi tirawan Aku tirawan Ayŭh adi bada Aku mandŭg.”

¹⁷Ngara adi ju puru-duwŭh[29] naan pari ngga gaŭn. “Tuhan,” ngara nang, “ndŭg ka bara umot nundok gŭh di kieh kan kieh mritah ngara da bu ngga adŭn Mai!”

¹⁸Jesus nam ngara, “Aku kiris Shetan rabu mun kijat so rangit.

¹⁹ Dingah nŭh! Aku mbŭh nggen di angān kuasa, isa angān tungang panu tunduh jippŭh ka rikara, ka ngarah sopŭrŭg kuasa Pinganyu, ka mating ani ani re bisa bada angān kinaman.

²⁰Dŭhnyah gaŭn sabab roh arap nundok di angān, pak gaŭn sabab dŭn ngan mbŭh dog nuris di shorga.”

²¹Di tika anŭ Jesus gaŭn amai brisi ngga Roh Kudus,[30] ka nang, “Sama, adi nguasa rangit ngga ong! Aku nggen trima kaseh di Kaam sabab Kaam mbŭh kiren di ngara adi dŭh pitar pandai kayuh adi Kaam sukan so ngara adi bijak ka pitar pandai. Sawŭ, Sama, simŭnŭ inŭh ayŭh patut jadi nanyam ka adi munos di asŭng Mai.”

²² “Sama Ku mbŭh nggen di Aku sopŭrŭg kayuh. Mating daya puan asi Anak adŭ-i Sama, ka mating daya puan asi Sama adŭ-i Anak samŭn ngara adi yŭn Anak ko kidaan pasar Ayŭh.”

²³Ka Jesus bigiring nura murid murid-I ka nang di ngara sadi adŭ, “Mbŭh raru binasip angān tungang kiris kayuh adi angān kiris!

²⁴Aku kidaan di angān mbŭh bagŭ nabi ka raja raja raan kiris kayuh adi angān kiris, pak ngara dŭh tungang, ka raan dingah kayuh adi angān dingah, pak dŭh dingah.”

²⁵ Ndi naan gurū Ukum-adat Jahudi mandŭg ka suba an kudog Jesus. “Gurū,” ayŭh nang, “Ani patut aku ndai ngga dapŭd udip adi sawŭ adi tan adu adu?”

²⁶Jesus nam ayŭh, “Ani dog nuris darŭm Surat-kudus? Ani pinyidapŭd mu?”

²⁷ Daya anŭ nam, “ ‘Rindu Tuhan adi Tapa mu ngga siabo abo atin mu, ngga siabo abo simangi mu, ngga siabo abo asŭng mu, ka ngga siabo abo pikir mu’; ka ‘Rindu dingan mu nimun kuu rindu adŭp mu.’ ”

²⁸ “Pinyinam mu anŭ batur,” Jesus nam; “ka ndai meh simŭnŭ ka kuu re dapŭd udip adi sawŭ adi tan adu adu.”

²⁹Pak gurū Ukum-adat Jahudi anŭ raan nyibandar adŭp-i, ayŭh siken, “Asi dingan ku?”

³⁰Jesus nam, “Agi ndi naan daya matak so Jerusalem ka Jericho; ayŭh dog nyerang pirupak, adi sirapas sopŭrŭg kayuh-i, mukong ayŭh, ka tingge ayŭh sitangah kabŭs.

³¹Agi ndi naan imam panu kadŭg aran anŭ; pak kan-i kiris ayŭh, ayŭh radus panu so parad mandi.

³²Simŭnŭ gŭh ndi naan daya Levi kan ayŭh mandŭg ka yŭn anŭ, ayŭh kiris pak radus panu so parad mandi.

³³ Pak ndi naan daya Samaria, adi panu kadŭg aran anŭ, dapŭd ayŭh; ka kan-i kiris ayŭh, ayŭh masi.

³⁴Ayŭh di tudu ayŭh, susen inyo ngga wain di tawan-i ka marut-i. Komŭnŭ ayŭh na ayŭh di tunduh dāng adŭp-i ka taban ayŭh ka ramin nupang, di yŭn-i sita ayŭh.

³⁵Andu anŭ ndi ayŭh taban duwŭh kiping duit pirak ka nggen-i di sianŭ adi dapu ramin nupang anŭ. ‘Nakit sita daya ati,’ ayŭh nang, ‘ka kambŭi duit ati dŭh sadang, aku re bayar kuu dinge kan aku pari kadŭg aran ati.’ ”

³⁶Jesus nang, “Aki so ngara taruh anŭ, di pikir mu, mbŭh jadi dingan sianŭ adi dog nyerang pirupak?”

³⁷Gurū Ukum-adat Jahudi anŭ nam, “Sianŭ adi ndai kana di ayŭh.” Ka Jesus nang, “Panu kuu ka ndai simŭnŭ gŭh.”

³⁸ Ripas anŭ Jesus ngga bara murid-I pijuu pimanu ngara, ka mandŭg ka ndi kupo di yŭn ndi naan dayung dŭn Martha kambat Ayŭh ka ramin-i.

³⁹Martha biyŭn jurud dayung dŭn Mary. Mary guru sindŭk kaja Jesus, dingah ajar-I.

⁴⁰Martha mbŭh raru sirŭbŭt ngga kraja-i, jadi ayŭh tudu Jesus ka nang, “Tuhan, piduri Mai kah dŭh urah sude ku; ayŭh tingge aku ndai sopŭrŭg kayuh sadi adŭp ku? Turung bada ayŭh kamati turung aku!”

⁴¹Tuhan nam ayŭh, “Martha, Martha! Kuu susah ka bipito di bagŭ masam kayuh.

⁴²Ndi adŭ kayuh adi tatu biguna. Mary mbŭh mien kayuh adi batur, ka-i dŭh re dog tambit so ayŭh.”