Read Biatah Bidayuh LUKE 11 Bible Online

LUKE 11 - Biatah Bidayuh bible

LUKE 11

¹Agi ndi sidah, Jesus simayang di ndi yŭn. Kan-I muko simayang, ndi so bara murid-I nang di Ayŭh, “Tuhan, ngajar kieh bidua, nimun John ngajar jangi murid.”

²Jesus nang di ngara, “Kan angān bidua, nang sakati: ‘Sama: Isa-i adŭn kudus Mai dog kibās. Kaam inŭh adi raja ami. Isa-i Kaam mritah di ong.

³Nggen di kieh barang andu pinguman ami.

⁴Apun dosa ami, nimun kieh apun sarah daya di kieh. Ka dŭhnyah tandah kieh ramah darŭm pinyabah di tika kieh dog pisuba.’ ”

⁵Ka Jesus nang di bara murid-I, “Nyamtadar-i ndi so angān di ka ramin dingan ngan arong sitŭrŭp ngarŭm ka nang di ayŭh, ‘O dingan, aku an nginjam taruh baru ruti.

⁶Dingan ku darŭm pimanu-i agi bauh mandŭg ka ramin ku, ka aku meh dŭh biyŭn pinguman yŭn-i!’

⁷Ka nyamtadar-i dingan ngan nam so darŭm ramin, ‘Dŭhnyah mito aku! Tiban muko dog ngusi, ka aku ngga bara anak ku mbŭh di ambok. Dŭh aku bisa makat ka nggen kayuh di kuu.’

⁸Ani meh? Aku kidaan di angān, sunggu dŭh an makat bait kani ayŭh di nggen ruti di kuu adi dingan-i, ayŭh babŭ gŭh re makat ka nggen di kuu sikiang pinyiraan mu sabab kuu dŭh mangŭh darah mite.

⁹“Ngapŭi Aku nang: Mite, ka angān re kambat; jiroh, ka angān re dapŭd; gutog, ka tiban re tikuka yŭn ngan.

¹⁰Amai barang naan adi mite re kambat, ka ayŭh adi jiroh re dapŭd, ka tiban re tikuka yŭn tadŭ daya adi gutog.

¹¹An kah angān adi sama nggen di anak ngan jippŭh kan-i mite iken?

¹²Puan kah angān nggen rikara kan-i mite turoh?

¹³Sunggu angān arap, angān puan adŭp ngan nggen kayuh kana di anak ngan. Dŭh kah meh Sama ngan adi di shorga rabis an nggen Roh Kudus di ngara adi mite so Ayŭh!”

¹⁴Jesus pibu umot so daya adi bawa. Kan umot mbŭh ruah, daya anŭ piguru minyu. Bara daya bagŭ mbŭh inga inga,

¹⁵ pak kada daya nang, “Beelzebul, adi pingubak umot, inŭh adi nggen di Ayŭh kuasa ngga pibu umot.”

¹⁶ Adi bŭkŭn, an kudog Jesus di pinganang-I, mite Ayŭh ndai pingandai-nginga ngga kiren sawŭ kah dŭh Ayŭh mandŭg so Tapa.

¹⁷Pak Jesus puan pikir ngara, ka nang di ngara, “Rais adi bikaii ka nimbur bagŭ tibaran adi birawan dupan adŭp-i dŭh re tan tui. Ka rawang adi bikaii dupan adŭp-i re pape.

¹⁸Jadi kambŭi pritah Shetan biyŭn bara tibaran adi birawan dupan adŭp-i, simuki meh ayŭh re tan tui? Angān nang Aku pibu umot sabab Beelzebul nggen di Aku kuasa ngga ndai simŭnŭ.

¹⁹Kambŭi Aku sawŭ pibu umot ngga kuasa Beelzebul, simuki meh garang bara pinunda ngan pibu umot? Bara pinunda adŭp ngan mbŭh kiren angān sarah!

²⁰Sibandar-i, Aku pibu umot ngga kuasa Tapa, ka ati mbŭh kiren di angān nang Tapa mbŭh piguru mritah.[31]

²¹“Kan daya bake, sidia ngga sopŭrŭg sinyata-i, jaga ramin-i, sopŭrŭg buat rata-i agi pagŭng.

²²Pak kan daya adi rabis bake nyerang ka ngarah ayŭh, sopŭrŭg sinyata adi yŭn-i bisangan daya anŭ taban ngga bu. Ka buat rata-i daya anŭ tambit ka kutung dupan adŭp-i.

²³ “Ayŭh adi dŭh ngga Aku taŭn-i rawan Aku; ayŭh adi dŭh turung Aku nguruk taŭn-i ngare.

²⁴“Kan roh arap ruah so daya, ayŭh bigandon di ndi abong tarun badŭh jiroh tarun yŭn rŭŭ. Kan-i dŭh dapŭd, ayŭh nang di adŭp-i, ‘Aku re pari ka ramin ku.’

²⁵Jadi ayŭh pari ka dapŭd ramin-i bisig buang mbŭh dog ngamas.

²⁶Komŭnŭ ayŭh ruah ka taban ju naan roh adi bŭkŭn adi rabis arap so adŭp-i, ka ngara mŭrŭt ka rŭŭ diginŭ. Sikasŭn-i, pimudip daya anŭ mbŭh jadi rabis arap so adi sibungas-i.”

²⁷Kan Jesus ko nang sakanŭ, ndi naan dayung nyirais so dupan bara daya bagŭ, ka nang di Ayŭh, “Bituah inŭh dayung adi ruwan ka mira Kaam!”

²⁸Pak Jesus nam, “Rabis bituah inŭh ngara adi dingah pinganang Tapa ka tunda-i!”

²⁹ Darŭm bara daya bagŭ tikuruk maning Jesus, Ayŭh pijuu minyu nang-I, “Mbŭh raru arap-i daya jaman ati! Ngara mite pingandai-nginga, pak mating re dog nggen adŭ-i pingandai-nginga Jonah.

³⁰ Nimun nabi Jonah mbŭh jadi tandā di daya Nineveh, simŭnŭ gŭh Anak Manusia re jadi tandā di daya jaman ati.

³¹ Di Andu Bisara Rani so Sheba re makat ka nyarah daya jaman ati, sabab ayŭh mbŭh mandŭg jeh so rais adŭp-i adi jo, an dingah ajar adi puno ngga pinyibijak so Raja Solomon. Ka digiti agi, Aku kidaan di angān, adi rabis bās so Raja Solomon.

³² Di Andu Bisara daya so Nineveh re makat ka nyarah angān, sabab ngara mbŭh marik pimudip ngara pari ka Tapa kan ngara dingah Jonah ngajar; ka puan meh, digiti agi adi rabis bās so Jonah!”

³³ “Mating daya tung prita ka sukan-i, puan kah na-i di ribo sambong,[32] pak na-i di tunduh rika prita, isa daya kiris jawa-i darŭm ngara mŭrŭt.

³⁴Batŭh ngan mbŭh keya ka prita yŭn pŭrŭng. Kan batŭh ngan kana, ndi pŭrŭng ganan ngan mbŭh puno ngga jawa; pak kan batŭh ngan arap, ndi pŭrŭng ganan ngan mbŭh darŭm karŭm.

³⁵Nakit jaga meh, isa jawa darŭm angān dŭh jadi karŭm.

³⁶Kambŭi ndi pŭrŭng ganan ngan agi puno ngga jawa, mating supek karŭm dieh, ayŭh taŭn re abo jawa, nimun prita nyekar angān ngga jawa-i.”

³⁷Kan Jesus muko minyu, ndi naan daya Pharisee mite Ayŭh bisamah ngga adŭp-i. Jesus di mŭrŭt ka guru man.

³⁸Daya Pharisee anŭ gŭgŭh kan-i kiris Jesus dŭh mbe diŭ so man.

³⁹Ka Tuhan nang di ayŭh, “Angān daya Pharisee, pibisig sapa saker ka pinggen, pak di darŭm angān mbŭh puno ngga pinyiganas ngga arap.

⁴⁰Budo! Dŭh kah Tapa adi ndai tura ka sapa ndai gŭh tura ka darŭm?

⁴¹Pak nggen di daya sirata kayuh anŭ adi darŭm saker ka pinggen ngan, ka angān ngga sopŭrŭg adi angān dapu re jadi bisig.

⁴² “Mbŭh payah inŭh angān daya Pharisee! Angān jugan ka Tapa ndi utung darŭm simŭng so rapah rapah, mun silaseh, adar manis, jintan ka rapah rapah adi bŭkŭn, pak angān dŭh rada pinyitŭnggŭn ngga pinyirindu yŭn Tapa. Kayuh anŭ angān patut ndai, buang dŭh kambŭt adi bŭkŭn.

⁴³“Mbŭh payah inŭh angān daya Pharisee! Angān suka baku adi tura ka jawin di ramin simayang-Jahudi ka suka dog tabi di arong passar.

⁴⁴Mbŭh payah inŭh angān! Angān mbŭh keya ka kubur adi dŭh dog nandā adi dŭh daya rada kan daya panu di tunduh-i.”

⁴⁵Ndi naan so ngara adi gurū Ukum-adat Jahudi nang di Ayŭh, “Gurū, darŭm Kaam minyu sakanŭ Kaam mbŭh pimangŭh gŭh kieh!”

⁴⁶Jesus nam, “Mbŭh payah inŭh angān, bara gurū Ukum-adat Jahudi! Angān bada daya kabis pinyirabis adi raru bat, pak adŭp ngan ndi trinju dŭh gŭh angān an pakai ngga turung daya kabis pinyirabis anŭ.

⁴⁷Mbŭh payah inŭh angān! Angān ndai kubur kubur adi kana yŭn bara nabi adi tayung-babuk ngan ko siŭ.

⁴⁸Adŭp ngan meh, garang, ngaku adŭp ngan nyibandar pingandai tayung-babuk ngan; ngara siŭ bara nabi, ka angān ndai kubur-i.

⁴⁹Sabab anŭ meh Pinyibijak Tapa nang, ‘Aku re pait nabi ngga pinyisung ka ngara. Ngara re siŭ kada so ngara ka kisiis adi bŭkŭn.’

⁵⁰Jadi daya di jaman ati re dog ukum amai tanggong deya sopŭrŭg nabi adi dog siŭ so sibungas ong jadi,

⁵¹ so deya Abel ndŭg deya Zechariah, adi dog siŭ di asah mija-sambah ngga Yŭn Kudus. Sawŭ, Aku kidaan di angān, daya di jaman ati re dog ukum sitagar pinyikabŭs sopŭrŭg ngara anŭ!

⁵²“Mbŭh payah inŭh angān bara gurū Ukum-adat Jahudi! Angān mbŭh nyikŭn kusi adi ngga kuka tiban ramin pinyipuan pasar Tapa; adŭp ngan dŭh an mŭrŭt, pak kijaman daya bŭkŭn adi an mŭrŭt!”

⁵³Kan Jesus bu so nŭ, bara gurū Ukum-adat Jahudi ka bara daya Pharisee piguru ngamun Ayŭh. Ngara siken Ayŭh pasar barang masam kayuh,

⁵⁴ngga kudog Ayŭh. Ka ngga situngang tungang ngara jiroh sarah Jesus darŭm-I minyu.