Read Biatah Bidayuh LUKE 12 Bible Online

LUKE 12 - Biatah Bidayuh bible

LUKE 12

¹ Darŭm biribu ribu bara daya mbŭh tikuruk, ndŭg ka agi adi digang kaja dingan-i, Jesus diŭ kidaan di bara murid-I, “Jaga adŭp ngan so ragi daya Pharisee, anŭ inŭh pingandai kadong ngara.

² Tadŭ tadŭ kayuh adi dog nutu re dog kiren, ka sopŭrŭg rusia re dog puan.

³Ngapŭi meh, ani ani adi angān nang singarŭm re dog dingah darŭm jawa sandu, ka ani ani adi angān sigayas di kajit dingan ngan darŭm birit re dog piranggah so tibung ramin.”

⁴“Aku kidaan di angān, bara dingan Ku, dŭhnyah taru daya adi siŭ pŭrŭng, pak ripas anŭ dŭh-i biyŭn kuasa re ndai rabis so anŭ.

⁵Aku kidaan di angān asi adi angān patut taru: Taru meh Tapa, Ayŭh, ripas-I ko siŭ, biyŭn kuasa taran daya ka darŭm apui neraka. Sawŭ, Aku nang di angān, Ayŭh inŭh adi angān patut taru!

⁶“Dŭh kah rimŭh manuk piit dog jua ngga rega duwŭh sen? Pak ndi so ngara dŭh gŭh Tapa kambŭt.

⁷Ndŭg ka sirah ubok di ubak ngan mbŭh gŭh dog niap. Ngapŭi dŭhnyah taru, amai angān agi brega dŭ so manuk piit!

⁸“Ingat nŭh, asi asi adi ngaku adŭp-i murid Ku di sirung jawin daya bagŭ, Anak Manusia gŭh re ngaku ayŭh di sirung jawin bara malaikat Tapa.

⁹Pak asi asi adi tirawan Aku di sirung jawin daya bagŭ, Anak Manusia re tirawan gŭh ayŭh di sirung jawin bara malaikat Tapa.

¹⁰ “Asi asi daya adi minyu rawan Anak Manusia bisa dog apun; pak asi asi adi ngujat rawan Roh Kudus dŭh dapŭd dog apun.

¹¹ “Kan angān dog dawa di ramin simayang-Jahudi, puan kah di sirung jawin gabenor puan kah di sirung jawin ngara adi bikuasa, dŭhnyah susah pasar simuki angān re nam puan kah ani re ngan nang.

¹²Amai Roh Kudus re ngajar angān di tika anŭ kayuh adi patut angān nang.”

¹³Ndi naan daya di uruk bara daya bagŭ nang di Jesus, “Gurū, kidaan di jurud ku da kutung buat-rata adi sama ami mbŭh tingge di kieh.”

¹⁴Jesus nam ayŭh, “Dingan, asi nggen kuasa di Aku da jadi akim puan kah tukang kutung buat-rata yŭn angān duwŭh?”

¹⁵Ka-I pijuu nang di sopŭrŭg ngara, “Jaga meh ka kingat adŭp ngan so barang masam pinyiripong; sabab udip ngan adi sawŭ dŭh-i so ka buat-rata adi angān biyŭn, kaya bait kani angān.”

¹⁶Komŭnŭ Jesus nang upama ati di ngara: “Agi ndi naan daya kaya adi biyŭn tana adi pijadi bagŭ buwa.

¹⁷Ayŭh piguru bipikir nang darŭm asŭng-i, ‘Aku dŭh biyŭn tarun yŭn nyikŭn buwa. Ani meh patut ku ndai?

¹⁸Ati inŭh kayuh re ku ndai,’ ayŭh nang di adŭp-i; ‘Aku re natas sigara panggau ku ka pijog adi rabis bās, di yŭn ku bisa nyikŭn gandom samŭn sopŭrŭg buat-rata ku.

¹⁹Ripas anŭ aku re nang di adŭp ku, kuu bituah! Kuu mbŭh biyŭn sopŭrŭg kayuh kana sadang yŭn guna adŭp mu bisawa sawa. Dŭh tia susah, pak man, nok, ka pirami adŭp mu!’

²⁰Pak Tapa nang di ayŭh, ‘Kuu budo! Ngarŭm ati simangi mu re tingge kuu; ka asi meh re dapu kayuh kayuh anŭ adi kuu ko nyikŭn yŭn adŭp mu?’ ”

²¹Ngga kubo dundan-I, Jesus nang, “Simŭnŭ inŭh kayuh di daya adi nugung buat-rata yŭn adŭp-i, pak dŭh-i kaya di batŭh Tapa.”

²²Jadi Jesus nang di bara murid-I, “Ngapŭi Aku nang di angān, dŭhnyah gapang jeja ka pinguman adi ngga angān udip puan kah piraka adi angān biguna yŭn pŭrŭng ngan.

²³Udip inŭh adi rabis biguna so pinguman, ka pŭrŭng rabis biguna so piraka.

²⁴Tingga manuk kak: dŭh ngara nyipurun, bait ngatŭm; ngara dŭh biyŭn birit pinyirikŭn, bait panggau; Tapa sita ngara! Angān agi rabis brega dŭ so sigara manuk!

²⁵Tungang kah angān nambah umbur ngan da ambu, biar-i ambu nisit,[33] so ka atin ngingen?

²⁶Kambŭi angān dŭh gŭh tungang ngatur kayuh adi siit, mani sah gapang pasar kayuh adi bŭkŭn?

²⁷ Bah kira munki bunga tarun udip: ngara dŭh nyiraja bait ndai piraka yŭn adŭp-i. Pak Aku kidaan di angān, adŭp Raja Solomon ngga sopŭrŭg pinyikaya-i dŭh gŭh biyŭn piraka adi brimun ramus-i ngga ndi so dudu bunga anŭ.

²⁸Adŭp Tapa inŭh adi sita kupai tarun adi agi digiti andu ati, ka mating sipagi, dog badang di apui. Dŭh kah Ayŭh rabis dŭ an sita angān? Pinyabah ngan raru kurang!

²⁹“Dŭhnyah meh nyusah adŭp ngan, marar bipikir pasar kayuh adi re ngan man puan kah kayuh adi re ngan nok.

³⁰(Amai daya adi dŭh puan Tapa inŭh marar bipikir di kayuh adi mun anŭ.) Sama ngan puan angān biguna di sopŭrŭg kayuh anŭ.

³¹Ngapŭi meh mbit bat di Pinyipritah Tapa, ka Ayŭh re nggen di angān sopŭrŭg kayuh anŭ.

³²“Dŭhnyah taru, angān tibaran adi siit, amai Sama ngan ngga munos asŭng-I mbŭh nyibandar angān kinyam Pinyipritah-I.

³³Jua sopŭrŭg kayuh adi angān biyŭn ka nggen duit anŭ di daya sirata. Ndai yŭn adŭp ngan kambut duit adi dŭh bisa rusak, ka nyikŭn buat-rata ngan di shorga. Diginŭ rata ngan dŭh bisa kurang, amai pinaku dŭh dapŭd nyindŭk-i ka gŭgŭt dŭh dapŭd pirusak-i.

³⁴Amai atin ngan taŭn siraru re agi di yŭn buat-rata ngan.

³⁵ “An ari sidia adŭp ngan yŭn tadŭ masam kayuh. Angān dŭh siŭn dŭh an sukup sidia ngga prita adi dog tung.

³⁶ Bada adŭp ngan mun bara daya-gaji adi kajŭn tuan-i mari so gawai sawan. Kan tuan mandŭg ka gutog tiban, ngara re kuka tiban yŭn-i ngga sirikas-i.

³⁷Ruai nang utung-i bara daya-gaji anŭ kan tuan ngara dapŭd ngara bijaga buang sidia di jam ayŭh maad! Aku kidaan di angān, ayŭh re kadi jipo tabar-i, bada ngara guru, ka rasu ngidang ngara.

³⁸Ruai nang utung-i ngara kambŭi tuan dapŭd ngara sidia, sunggu bait kani ayŭh mandŭg sitŭrŭp ngarŭm puan kah rabis rambat!

³⁹ Ka angān tatu puan kambŭi daya adi dapu ramin puan jam adi ngga pinaku mandŭg, ayŭh dŭh re tandah pinaku mŭrŭt ramin-i.

⁴⁰Simŭnŭ gŭh angān, dŭh siŭn dŭh an sidia, sabab Anak Manusia re mandŭg di jam adi angān dŭh puan Ayŭh mandŭg.”

⁴¹Peter nang, “Tuhan, Kaam minyu upama ati yŭn ami kah yŭn sopŭrŭg daya?”

⁴²Ka Tuhan nam, nang-I “Asi meh garang daya-gaji adi tŭtŭd ka adi bijak? Ayŭh inŭh sianŭ adi tuan-i re tijuan da jaga abin ramin-i ka tukang nggen man di daya daya-gaji adi bŭkŭn di jam adi patut.

⁴³Ruai nang bituah-i daya-gaji anŭ kan tuan-i dapŭd ayŭh ndai simŭnŭ di jam-i mari!

⁴⁴Sawŭ, Aku kidaan di angān, tuan anŭ re tijuan daya-gaji anŭ da jaga buat rata-i.

⁴⁵Pak kambŭi daya-gaji anŭ nang darŭm asŭng-i, ‘Gibayuh inŭh tuan ku mari,’ ka piguru mukong daya daya-gaji adi bŭkŭn, dari dayung, ka man nok ndŭg ka mabuk;

⁴⁶komŭnŭ tuan anŭ mari di andu ka di jam daya-gaji anŭ dŭh puan ayŭh mandŭg. Tuan anŭ re nŭtŭb ayŭh,[34] ka bada ayŭh kinyam nasip daya adi dŭh an dingah pinganang Tapa.

⁴⁷“Daya-gaji adi puan kayuh adi raan tuan-i ayŭh ndai, pak dŭh sidia an ndai-i, re bana dog madŭs.

⁴⁸Pak daya-gaji adi dŭh puan kayuh adi tuan-i raan, ka ndai anŭ adi bada ayŭh patut dog madŭs, re dŭh bana dog madŭs. Bagŭ re dog mite so daya adi dog nggen bagŭ; rabis bagŭ re dog mite so daya adi dog nggen rabis bagŭ.

⁴⁹“Aku mbŭh mandŭg an taran apui di ong; taŭn-i kana raru kambŭi-i mbŭh sakŭt!

⁵⁰ Agi jaku baptisa adi re Ku kambat, ka mbŭh raru susah inŭh Aku siragi-i bayuh ripas!

⁵¹Angān pikir Aku mandŭg taban damai ka ong? Dŭh, dŭh-i damai, pak di nyibarai daya kidŭ-i.

⁵²So madin rawang adi biyŭn rimŭh naan daya re pape, taruh rawan duwŭh, ka duwŭh rawan taruh.

⁵³ Sama re rawan anak dari, ka anak dari rawan sama; sindŭ re rawan anak dayung, ka anak dayung rawan sindŭ. Dinŭh re rawan iban-dayung, ka iban-dayung rawan dinŭh.”

⁵⁴Jesus nang gŭh di bara daya, “Kan angān kiris abun makat so barat, angān rasu nang andu re ujen, ka-i sawŭ ujen.

⁵⁵Ka kan angān kinyam sabak poh so siratan, angān nang andu re paras, ka-i sawŭ paras.

⁵⁶Angān pingadong! Angān pandai tingga tana ngga rangit ka ninjau re ujen kah dŭh andu; mani meh angān dŭh puan rati kayuh adi aŭn jadi madin?

⁵⁷“Mani meh adŭp ngan dŭh ndai pikir ngan pasar kayuh adi sawŭ?

⁵⁸Kambŭi daya dawa angān ka taban angān ka yŭn bisara, suba ngga situngang ngan bisatur ka bidamai ngga ayŭh sibayuh angān ndŭg yŭn bisara. Kambŭi angān dŭh ndai simŭnŭ, ayŭh re taban angān ka akim, adi re nggen angān ka daya adi tukang jaga ramin jer, ka angān meh re mŭrŭt jer.

⁵⁹Aku kidaan di angān, angān re rŭŭ diginŭ ndŭg ka angān mbŭh kubo bayar ukum ngan.”