Read Biatah Bidayuh LUKE 15 Bible Online

LUKE 15 - Biatah Bidayuh bible

LUKE 15

¹ Ndi andu, kan bagŭ daya pinsuke ka daya adi dog tirawan mandŭg an dingah Jesus,

²bara daya Pharisee ka bara gurū Ukum-adat Jahudi mingungut, nang, “Daya ati kambat daya adi dog tirawan ndŭg ka mbŭh man ayō ngara ani!”

³Jadi Ayŭh nyidundan upama ati di ngara:

⁴“Nyamtadar-i ndi so angān biyŭn siratus biri ka ndi so-i manyap, ani re-i ndai? Ayŭh tingge anŭ adi prii puru-prii di tarun tana kupai ka di jiroh anŭ adi manyap ndŭg dapŭd.

⁵Kan ayŭh mbŭh dapŭd, ayŭh raru gaŭn ka na-i di tunduh kawin-i,

⁶ka taban-i mari. Komŭnŭ ayŭh bagan bara dingan-i samŭn rasū-i, nang-i di ngara, ‘Aku raru gaŭn aku mbŭh dapŭd biri ku adi manyap. Ja bigawai man siramat ngga aku!’

⁷Simŭnŭ gŭh, Aku kidaan di angān, re agi rabis bās pinyigaŭn di shorga sabab ndi naan daya bidosa adi mbŭh marik pimudip-i pari ka Tapa, so pinyigaŭn sabab prii puru-prii naan daya adi dog stabi adi pikir adŭp-i dŭhsah ndai simŭnŭ.”

⁸“Bait kah nyamtadar-i ndi naan dayung biyŭn simŭng kiping duit pirak ka ndi manyap, ani re-i ndai? Ayŭh tung prita, pisen arŭn, ka nakit jiroh ndi arŭn arŭn ndŭg ka dapŭd.

⁹Kan-i mbŭh dapŭd, ayŭh bagan bara dingan samŭn rasū-i, nang-i di ngara, ‘Aku raru gaŭn aku mbŭh dapŭd ndi kiping duit ku anŭ adi manyap. Ja bigawai man siramat ngga aku!’

¹⁰Simŭnŭ gŭh, Aku kidaan di angān, malaikat malaikat Tapa re gaŭn amai ndi naan daya bidosa adi mbŭh marik pimudip-i pari ka Ayŭh.”

¹¹Jesus pijuu minyu, nang-I, “Agi ndi naan daya adi biyŭn duwŭh madis anak dari.

¹²Adi mara nang di ayŭh, ‘Sama, nggen meh di aku madin jaku utung so buat-rata mai.’ Ka sama-i kutung buat rata-i di ngara duwŭh madis.

¹³Kudu kudu andu ripas anŭ, adi mara jua jangi utung so buat-rata anŭ ka bu tingge arŭn taban duit anŭ. Ayŭh di ka rais adi jo, di yŭn-i nyiraba duit anŭ ngga pimudip adi dŭh tatu.

¹⁴Ayŭh nyiraba sopŭrŭg kayuh-i. Ka komŭnŭ apag adi bisā nyatŭk ndi tarun tana anŭ, ka ayŭh mbŭh dŭh adŭ biyŭn ani ani.

¹⁵Jadi ayŭh di nyiraja yŭn ndi naan daya di rais anŭ, adi pait ayŭh ka teya-i da jaga ayo.

¹⁶Diginŭ ayŭh mbŭh raru kirarŭn an ngisi tain-i ngga pinguman ayo, pak mating daya nggen ani ani di ayŭh da man.

¹⁷Tŭbŭn tŭbŭn-i ayŭh ngŭ adŭp-i ka nang, ‘Sopŭrŭg daya kuri sama ku biyŭn pinguman rabis so adi tungang ngara man, ka aku digiti mbŭh re kabŭs sikirau!

¹⁸Kiang ku matak adŭ ka yŭn sama ku ka nang, “Sama, aku mbŭh bidosa rawan Tapa ka rawan kaam.

¹⁹Aku mbŭh dŭh patut dog kadŭn anak mai tia; bada aku jadi nimun kuri mai.” ’

²⁰Jadi ayŭh makat ka pari ka yŭn sama-i. “Ayŭh gibabŭ jo so arŭn kan sama-i kiris ayŭh; ngga atin masi, sama-i bikaduh tudu ayŭh, rasu dakŭp ka sium ayŭh.

²¹‘Sama,’ anak anŭ nang, ‘Aku mbŭh bidosa rawan Tapa ka rawan kaam. Aku mbŭh dŭh patut dog kadŭn anak mai tia.’

²²Pak sama-i nang di daya daya gaji-i, ‘Rikas! Taban jipo-ambu adi rabis kana ka kasŭk-i di ayŭh. Na sisin di trinju-i, ka kasŭk kasut di kaja-i.

²³Komŭnŭ di tambit anak sapi adi gamu ka siŭ. Ja ata bigawai man siramat!

²⁴Amai anak ku ati mbŭh kabŭs, pak madin ayŭh udip; ayŭh mbŭh manyap, pak madin ayŭh dog dapŭd.’ Ka gawai ngara piguru.

²⁵“Sitadŭn anŭ, anak adi pinuai jeh di teya. Darŭm ayŭh maad, ka mbŭh re sindŭk arŭn, ayŭh dingah daya biragong ka birajang.

²⁶Jadi ayŭh bagan ndi naan daya-gaji ka siken, ‘Ani anŭ?’

²⁷‘Sude mu mbŭh mari,’ daya-gaji anŭ nam, ‘ka sama mu mbŭh siŭ anak sapi adi gamu, sabab-i mbŭh dapŭd ayŭh pari darŭm siramat.’

²⁸“Pinuai anŭ mbŭh raru baji ndŭg ka-i abah mŭrŭt arŭn. Jadi sama-i ruah ka bandar nutut ayŭh da mŭrŭt.

²⁹Pak ayŭh nam sama-i, ‘Tingga, bisawa sawa aku nyiraja yŭn mai keya ka urun, ka bŭn aku nyibireu pritah mai. Ani mbŭh mai nggen di aku? Ndi pŭrŭng kambing mating gŭh kaam nggen di aku ngga ku biruman ngga bara jerā ku!

³⁰Pak anak mai ati mbŭh nyiraba buat-rata mai ngga dayung sundar, ka kan ayŭh mari, kaam siŭ anak sapi adi gamu yŭn-i!’

³¹‘Nak,’ sama-i nam, ‘kuu siraru agi ngga aku digiti, ka sopŭrŭg kayuh ku inŭh tung jamu.

³²Ata patut bigawai man siramat ka pawŭn, sabab sude mu mbŭh kabŭs, pak madin ayŭh udip; ayŭh mbŭh manyap, pak madin ayŭh dog dapŭd.’ ”