Read Biatah Bidayuh LUKE 16 Bible Online

LUKE 16 - Biatah Bidayuh bible

LUKE 16

¹Jesus nang di bara murid-I, “Agi ndi naan daya kaya adi biyŭn daya-gaji adi dog tijuan-i da jadi pingingat buat rata-i. Daya kaya anŭ mbŭh dog kidaan nang pingingat-i anŭ agi nyiraba duit-i,

²jadi ayŭh bagan pingingat-i anŭ da mŭrŭt ka nang, ‘Ani kayuh ati adi aku dingah pasar kuu? Taban kamati surat kira-kira kraja mu, sabab kuu mbŭh dŭh bisa jadi pingingat buat-rata ku tia.’

³Daya-gaji anŭ nang darŭm asŭng-i, ‘Tuan ku re taran aku so kraja ku. Ani meh re ku ndai? Aku dŭh bake nyakor parit, ka aku mangŭh mite sidakah.

⁴Aku puan ani re ku ndai! Isa kan aku mbŭh dŭh nyiraja, bara dingan ku an kambat aku di ramin ngara.’

⁵“Jadi ayŭh bagan da mŭrŭt barang naan daya adi agi birutang di tuan-i. Ayŭh siken di ndi, ‘Kiang-ki utang mu di tuan ku?’

⁶‘Siratus tipayan inyo kanā,’ ayŭh nam. ‘Ta surat kira-kira mu,’ pingingat anŭ nang di ayŭh; ‘guru ka nuris rimŭh-puru.’

⁷Komŭnŭ ayŭh siken sianŭ ndi, ‘Kuu boh, kiang-ki jamu utang?’ ‘Siribu kandi gandom,’ ayŭh nam. ‘Ta surat kira-kira mu,’ pingingat anŭ nang di ayŭh; ‘nuris mai ratus.’

⁸“Sitagar anŭ, tuan anŭ muji pingingat adi dŭh jujur anŭ amai ayŭh birakar di pingandai-i; sabab daya ong ati agi rabis birakar darŭm-i digŭng kraja pingandai-i so daya adi udip darŭm jawa.”

⁹Ka Jesus pijuu minyu, nang-I, “Ngapŭi Aku kidaan di angān: pakai meh pinyikaya ong ati ngga ndai dingan, isa kan-i mbŭh abo, angān re dog kambat ka darŭm arŭn adi tan adu adu.

¹⁰Asi asi adi tŭtŭd di har adi siit re tŭtŭd di har adi baga; asi asi adi dŭh jujur di har adi siit re dŭh jujur di har adi bās.

¹¹Jadi meh, kambŭi angān dŭh tŭtŭd darŭm ngatur kaya ong, simuki meh angān re bisa dog sabah di pinyikaya adi sawŭ?

¹²Ka kambŭi angān dŭh bisa dog sabah di kayuh adi daya bŭkŭn dapu, asi meh re nggen di angān kayuh adi angān dapu?

¹³ “Mating daya-gaji bisa jadi urun duwŭh naan tuan, amai ayŭh re tiru di ndi, ka rindu di sianŭ ndi; puan kah tŭtŭd di siati, ka ngamun sianŭ ndi. Angān dŭh bisa bituan di Tapa buang bituan di duit.”

¹⁴Kan daya Pharisee dingah sopŭrŭg kayuh anŭ, ngara napat Jesus, sabab ngara awang duit.

¹⁵Jesus nang di ngara, “Angān inŭh bara adi ndai adŭp-i mun adi batur di batŭh daya, pak Tapa puan atin ngan. Amai kayuh adi dog nyirundeng raru brega di manusia agi au-tarun di batŭh Tapa.

¹⁶ “Ukum-adat Moses ka surat bara nabi dog sita ndŭg jaman John Pembaptisa; so nganŭ Agah Kana pasar munki Tapa mritah[39] mbŭh dog kidaan, ka barang naan daya mbŭh birabut an mŭrŭt ka dieh.

¹⁷ Pak udah dŭ rangit ngga ong manyap, so ndi sirah batŭh turis Ukum-adat anŭ dog kinanyap.

¹⁸ “Daya adi taran sawŭn-i ka sawan ngga dayung bŭkŭn mbŭh tanggah; ka ayŭh adi sawan ngga sianŭ adi ko dog taran banŭh-i mbŭh tanggah.

¹⁹“Agi ndi naan daya kaya nēn piraka adi raru brega buang udip darŭm sangŭn barang andu.

²⁰Ka agi gŭh ndi naan daya sirata dŭn Lazarus, bigadag ndi pŭrŭng ganan-i, adi siraru dog taban ka tiban ramin daya kaya anŭ,

²¹kirarŭn an man tatuh adi rabu so mija-i. Sawŭ, ndŭg ka kasong mandŭg di nyarek gadag-i.

²²“Daya sirata anŭ kabŭs ka dog taban malaikat da guru ngapid Abraham di shorga. Daya kaya anŭ kabŭs gŭh ka dog kubur,

²³ka di Sibayan,[40] di yŭn-i sangsara, ayŭh nyigura ka kiris Abraham, sadang jo-i, ngga Lazarus ngapid-i.

²⁴Jadi ayŭh bagan, ‘Sama Abraham! Masi di aku, ka pait Lazarus da njug trinju-i di piin ka kadud jura ku, amai aku ati mbŭh sangsara darŭm apui ati!’

²⁵“Pak Abraham nang, ‘Ingat nak, kuu darŭm pimudip ong mu mbŭh dog nggen sopŭrŭg kayuh kana, ka Lazarus kayuh arap. Pak madin ayŭh dog nyaduh digiti, ka kuu mbŭh sangsara.

²⁶Ka dinge, di asah kieh ngga kuu agi au-tŭrŭp, isa daya dŭh tungang mutas so ti di ka yŭn mu, ka daya so yŭn mu dŭh tungang mutas kamati.’

²⁷Daya kaya anŭ nang, ‘Kambŭi sakanŭ, aku mite kaam, sama Abraham, pait Lazarus ka ramin sama ku,

²⁸di yŭn rimŭh naan jurud ku. Bada ayŭh bakan ngara, isa ngara dŭh mandŭg ka yŭn sangsara ati.’

²⁹“Abraham nang, ‘Bara jurud mu biyŭn surat Moses ka surat bara nabi adi bakan ngara; bara jurud mu patut dingah pinyibakan ngara.’

³⁰Daya kaya anŭ nang, ‘Anŭ dŭh-i dang, sama Abraham! Kadŭ-i kambŭi agi daya makat so kabŭs mandŭg tudu ngara, ngara an marik pimudip ngara pari ka Tapa.’

³¹Pak Abraham nang, ‘Kambŭi ngara abah dingah Moses ka nabi nabi, ngara taŭn abah dog ngajar, sunggu makat bait kani daya so kabŭs.’ ”