Read Biatah Bidayuh LUKE 17 Bible Online

LUKE 17 - Biatah Bidayuh bible

LUKE 17

¹Jesus nang di bara murid-I, “Kayuh adi bada daya bidosa taŭn-i re agi, pak mbŭh raru payah-i di sianŭ adi bada-i jadi!

²Mbŭh kana dŭ inŭh kambŭi ayŭh dog taran ka darŭm rawŭt ngga tibande batuh kisar dog mŭŭng di tungo-i, so ayŭh bada ndi so ngara adi sŭ ati bidosa.

³ Ingat meh, ani anŭ adi angān ndai! “Kambŭi jurud ngan ndai dosa, nang ayŭh; ka kambŭi ayŭh mite apun, apun ayŭh.

⁴Kambŭi ayŭh bidosa di tunduh ngan pikuju kari darŭm ndi andu, ka tiap kari ayŭh mandŭg tudu angān nang, ‘Aku mite apun’, angān dŭh siŭn dŭh apun ayŭh.”

⁵Bara pinyuruh nang di Tuhan, “Bada pinyabah ami tagap.”

⁶Tuhan nam, “Kambŭi angān biyŭn pinyabah mati ndi sirah ruwang sabi, angān tungang nang di tŭngŭn ara ati, ‘Dimbut ka purun adŭp mu di rawŭt!’ ayŭh re tunda pinganang ngan.

⁷“Nyamtadar-i ndi so angān biyŭn daya-gaji adi majak puan kah kingat biri. Kan ayŭh maad so ŭmŭh, agi kah angān bada ayŭh rikas mandŭg ka guru man?

⁸Taŭn dŭh! Angān nang, ‘Sidia pinguman ku,’ kidŭ-i; ‘nēn piraka mu adi bisig ka nguan aku man; ripas anŭ kuu bisa man.’

⁹Daya-gaji dŭh-i biguna di puji darŭm-i tunda pritah, dŭh kah?

¹⁰Simŭnŭ gŭh angān, kan angān ko ndai sopŭrŭg kayuh adi patut angān ndai, nang, ‘Ata daya-gaji adŭ; ata batur ndai kraja ta.’ ”

¹¹Darŭm Jesus panu nuju Jerusalem, Ayŭh panu kadŭg baat tana Samaria ngga Galilee.

¹²Ayŭh aŭn mŭrŭt ndi anak kupo kan-I bidapŭd ngga simŭng naan daya adi naman andam kurit adi bisā. Ngara mijog so jo

¹³ka nyirais bagan, “Jesus! Tuan! Masi di kieh!”

¹⁴ Jesus kiris ngara ka nang, “Panu di ka bara imam ka bada ngara natu pinyibua ngan.” Darŭm ngara panu, ngara bua.[41]

¹⁵Kan ndi so ngara kinyam adŭp-i mbŭh bua, ayŭh pari buang kibās Tapa ngga sirŭŭn bana.

¹⁶Ayŭh sidikang buang mutu di kaja Jesus, buang-i nggen trima kaseh di Ayŭh. Daya anŭ daya Samaria.

¹⁷Jesus minyu, nang-I, “Agi simŭng naan daya dog pibua; kamaki adi prii naan?

¹⁸Mani siati adi daya bangsa bŭkŭn, ayŭh sadi adŭ adi pari di nggen trima kaseh di Tapa?”

¹⁹Ka Jesus nang di ayŭh, “Makat ka panu meh; kuu mbŭh bua sabab kuu sabah di Aku.”

²⁰Kada daya Pharisee siken Jesus, “Sinde Tapa mandŭg di mritah?”[42] Pinyinam-I inŭh, “Pinyipritah Tapa[43] dŭh-i piguru ngga tandā tandā adi tungang dog kiris.

²¹Mating daya re bisa nang, ‘Tingga, ta rah-i’ puan kah, ‘Jeh rah-i no’; sabab Tapa mbŭh piguru mritah[44] di ruang ngan”[45]

²²Ka-I nang di bara murid-I, “Tipuh-i re mandŭg kan angān gruwŭn adŭp ngan tungang kiris ndi so andu Anak Manusia, pak angān dŭh re kiris-i.

²³Re agi daya nang di angān, ‘Tingga no, dijeh!’ puan kah, ‘Tingga ta, digiti!’ Dŭhnyah angān ruah di jiroh-i.

²⁴Nimun kijat mikirab di rangit, ka nyekar so ndi parad rangit ndŭg parad mandi rangit, simŭnŭ gŭh Anak Manusia re di tipuh-I.

²⁵Pak Ayŭh dŭh siŭn dŭh an diŭ kinyam pinyusah bās ka dog tirawan daya di jaman ati.

²⁶ Nimun adi mbŭh jadi di jaman Noah, simŭnŭ gŭh re di tipuh Anak Manusia.

²⁷ Sopŭrŭg daya man nok, ka dari dayung banan sawan, ndŭg ka andu anŭ adi ngga Noah mŭrŭt ka darŭm batra; ka uba mandŭg, pirŭnggŭd sopŭrŭg ngara.

²⁸ Ayŭh re mun di jaman Lot. Sopŭrŭg daya man nok, bidagang, nyipurun ka piramin.

²⁹Di andu Lot bu so Sodom, apui ngga mirirang mūn so rangit ka siŭ sopŭrŭg ngara.

³⁰Simŭnŭ inŭh kayuh re di andu Anak Manusia dog pinandŭng.

³¹ “Di andu anŭ, daya adi di tibung ramin dŭh siŭn mūn ka darŭm ramin di tambit kayuh-i; simŭnŭ gŭh daya adi di ŭmŭh dŭh siŭn pari ka ramin.

³² Ingat, ani adi mbŭh jadi di sawŭn Lot!

³³ Asi asi adi suba an nyiramat asŭng-i re kinanyap-i; asi asi adi kinanyap asŭng-i re dapŭd asŭng-i siramat.

³⁴Di ngarŭm anŭ, Aku kidaan di angān, agi duwŭh naan daya samah bŭŭs di ndi pangō: ndi naan re dog tambit, sianŭ ndi re dog tingge.

³⁵Duwŭh naan dayung ngisar gandom: ndi naan re dog tambit, sianŭ ndi re dog tingge. [

³⁶Duwŭh naan dari re nyiraja di teya: ndi naan re dog tambit, ndi naan re dog tingge.]”[46]

³⁷Murid murid Jesus siken Ayŭh, “Diki, Tuhan?” Jesus nam, “Di barang yŭn agi tadang, diginŭ manuk volcha agi mupuh.”