Read Biatah Bidayuh LUKE 22 Bible Online

LUKE 22 - Biatah Bidayuh bible

LUKE 22

¹ Andu Gawai Ruti Dŭh-Biragi, adi dog kadŭn Paska, mbŭh sindŭk.

²Bara pingubak imam ngga bara gurū Ukum-adat Jahudi taru daya, jadi ngara jiroh aran ngga siŭ Jesus darŭm bisukan.

³Ka Shetan mŭrŭt atin Judas, adi dog kadŭn Iscariot, ndi so ngara adi simŭng-duwŭh naan murid Jesus.

⁴Jadi Judas di bisatur ngga bara pingubak imam samŭn pingubak ngara adi jaga Ramin Tuhan pasar munki ayŭh dapŭd jua Jesus di ngara.

⁵Ngara mbŭh munos asŭng ka situju an nggen duit di ayŭh.

⁶Judas situju gŭh ka rasu jiroh pluang ngga nyerah Jesus ka ngara darŭm bisukan.

⁷Di darŭm Tipuh Gawai Ruti Dŭh-Biragi, andu adi ngga anak biri Paska dog simareh mbŭh mandŭg.

⁸Jesus pait Peter ngga John ngga pinganang sakati: “Panu di sidia man gawai Paska ta.”

⁹“Diki Kaam raan kieh sidia-i?” ngara siken Ayŭh.

¹⁰Ayŭh nam, “Darŭm angān mŭrŭt kupo, ndi naan daya gŭrŭng tipayan piin re bidapŭd ngga angān. Tunda ayŭh ka ramin adi-i mŭrŭt,

¹¹ka nang di daya adi dapu ramin: ‘Gurū siken, Diki birit adi re yŭn Ku ngga bara murid Ku man gawai Paska?’

¹²Ayŭh re kiren di angān ndi birit adi bayah di sambu adi mbŭh dog sidia ngga mija baku. Diginŭ inŭh angān sidia sopŭrŭg kayuh yŭn ta.”

¹³Ngara panu ka dapŭd sopŭrŭg-i nimun adi ko Jesus kidaan di ngara, ka ngara meh sidia man gawai Paska.

¹⁴Kan tika-i mbŭh mandŭg yŭn man gawai Paska, Jesus guru, samah ngga bara pinyuruh-I.

¹⁵Ayŭh nang di ngara, “Aku mbŭh tui kirarŭn an man gawai Paska ati ngga angān diŭ so jera-birasa Ku!

¹⁶Sabah nŭh, Aku dŭh re tia man-i sibayuh-i dapŭd rati-i darŭm Ong Bauh Tapa.”[52]

¹⁷Komŭnŭ Ayŭh mbit makuk, nggen trima kaseh di Tapa, ka nang, “Mbit ati ka kutung-i dupan adŭp ngan.

¹⁸Aku kidaan di angān, so ripas ati Aku dŭh re tia nok wain ati ndŭg ka Tapa mbŭh sawŭ mritah.”[53]

¹⁹Komŭnŭ Ayŭh mbit ndi kiping ruti, nggen trima kaseh di Tapa, mire-i, ka nggen-i di ngara, nang-I, “Ati inŭh pŭrŭng Ku, adi dog nggen yŭn ngan. Ndai simuti jadi pinatŭng Ku.”

²⁰ Simŭnŭ gŭh, Ayŭh nggen makuk anŭ di ngara ripas man, nang-I, “Makuk ati inŭh simanya bauh Tapa adi dog natu ngga deya Ku, adi dog ren yŭn ngan.”[54]

²¹“Pak tingga nŭh! Ayŭh adi jua Aku agi sua guru digiti ngga Aku!

²²Anak Manusia re kabŭs so ka pingatur Tapa, pak raru payah-i di sianŭ adi jua Ayŭh!”

²³Jadi ngara samah siken di dupan adŭp-i, asi so ngara adi re ndai kayuh anŭ.

²⁴ Karit timbur dupan bara murid Jesus pasar asi so ngara adi patut dog nyirundeng bās dŭ.

²⁵ Jesus nang di ngara, “Bara raja bangsa adi dŭh puan Tapa piurun daya-i, ka ngara adi bikuasa kadŭn adŭp-i ‘Pinurung Daya.’

²⁶ Pak angān dŭh patut mun anŭ. Adi rabis bās dupan ngan patut jadi mun sianŭ adi siabo mara, ka adi pinguru patut jadi mun urun.

²⁷ Asi adi bās dŭ, ayŭh adi guru man kah ayŭh adi ngidang? Ayŭh adi guru man, taŭn-i bās dŭ. Pak Aku ati di dupan ngan agi keya ka daya adi ngidang.

²⁸“Angān agi ngga Aku darŭm sopŭrŭg pinyusah Ku;

²⁹ka nimun Sama Ku mbŭh nggen di Aku hak ngga mritah, simŭnŭ gŭh Aku re nggen-i di angān.

³⁰ Angān re man nok ngga Aku ka mritah samah ngga Aku kan Aku mbŭh jadi raja. Angān re guru di takta mritah simŭng-duwŭh tibaran-asar Israel.

³¹“Simon, Simon, Dingah! Shetan mbŭh dapŭd pinyibandar ngga-i suba sopŭrŭg ngan, yŭn nyidŭrŭ adi kana so adi arap, nimun tukang-teya nyidŭrŭ gandom so aping.

³²Pak Aku mbŭh simayang yŭn mu, Simon, siŭn pinyabah mu dŭh ramah. Ka kan kuu pari ka Aku, kuu dŭh siŭn dŭh nagap bara dingan mu.”

³³Peter nam, “Tuhan, aku mbŭh sidia an mŭrŭt jer ngga Kaam ka samah kabŭs ngga Kaam!”

³⁴“Aku kidaan di kuu, Peter,” Jesus nang, “Babang dŭh re kukok sikambŭh sibayuh kuu pitaruh kari nang adŭp mu dŭh puan Aku.”

³⁵ Komŭnŭ Jesus nang di bara murid-I, “Di andu Aku pait angān bŭrŭh prajah dŭh taban kambut duit, beg, puan kah kasut, agi kah angān sutok kayuh?” “Mating,” ngara nam.

³⁶“Pak madin,” Jesus nang, “Ayŭh adi biyŭn kambut duit puan kah beg, dŭh siŭn dŭh taban-i; ka ayŭh adi dŭh biyŭn pedang dŭh siŭn dŭh jua jipo tabar-i ngga miris pedang.

³⁷ Ingat meh, pinganang Surat-kudus ati dŭh siŭn dŭh jadi bitŭtŭk di Aku: ‘Ayŭh sua trima ukum daya arap.’ Kayuh ati adi dog nuris pasar Aku mbŭh re an jadi bitŭtŭk.”

³⁸Bara murid nang, “Tingga Tuhan! Digiti agi duwŭh pedang!” “Anŭ mbŭh sadang!”[55] Ayŭh nam.

³⁹Jesus ruah so kupo ka matak nimun kanyet-I ka Sandah Kanā; ka bara murid-I agi samah ngga Ayŭh.

⁴⁰Kan Ayŭh mbŭh ndŭg nŭ, Ayŭh nang di ngara, “Simayang isa angān dŭh rabu darŭm pinyisuba.”

⁴¹Komŭnŭ Ayŭh panu jo so ngara dang ndi pinyijakad batuh, ka-I sidikang ka bidua.

⁴²“Sama,” Ayŭh nang, “kambŭi Kaam raan, tambit makuk jera-birasa ati so Aku. Sunggu mŭnŭ dŭhnyah nurut pinyiraan Ku, pak ndai adŭ pinyiraan Mai.”

⁴³Ka agi malaikat so shorga nandŭng di Ayŭh, ka nagap Ayŭh.

⁴⁴Darŭm susah payah Ayŭh bandar simayang ndŭg ka udas-I bititeg mun deya di tana.[56]

⁴⁵Ripas simayang, Ayŭh pari ka yŭn murid murid-I ka dapŭd ngara bŭŭs, adi mbŭh raru jera buang raru susah.

⁴⁶Ayŭh nang di ngara, “Mani angān bŭŭs? Makat ka simayang isa angān dŭh rabu darŭm pinyisuba.”

⁴⁷Jesus gibabŭ minyu kan bara daya mandŭg. Ngara dog nguru Judas, ndi so simŭng-duwŭh naan murid Jesus. Ayŭh tudu Jesus re sium Ayŭh.

⁴⁸Jesus nang di ayŭh, “Judas, ngga sium kah kuu jua Anak Manusia?”

⁴⁹Kan bara murid adi ayō Jesus kiris kayuh adi re jadi, ngara siken, “Tuhan, bisa kah kieh pakai pedang?”

⁵⁰Ndi so ngara japa urun imam bās ngga pedang, nyaper kajit tauh-i.

⁵¹Pak Jesus nang, “Dang inŭh!” Ayŭh tama kajit-i ka pibua ayŭh.

⁵²Komŭnŭ Jesus nang di bara pingubak imam samŭn di pingubak ngara adi jaga Ramin Tuhan ka bara nyamba bangsa Jahudi, adi mandŭg an nakap Ayŭh, “Sah kah angān taban pedang ngga pukong tudu Aku, mun adi re nakap daya arap?

⁵³ Aku agi ngga angān barang andu di Ramin Tuhan, pak mating angān nakap Aku. Pak ati mbŭh tika yŭn angān pimanu pingandai ngan, amai kuasa karŭm mbŭh aŭn mritah.”

⁵⁴Ngara nakap Jesus ka taban Ayŭh bu ka ramin Imam Bās; Peter tunda so jo.

⁵⁵Apui agi dog ndai di badag ramin, ka Peter di sua ngga ngara adi guru maning-i.

⁵⁶Kan ndi so bara daya-gaji, adi dayung, kiris ayŭh guru diginŭ nguan apui, ayŭh tirek ayŭh ka nang, “Daya ati gŭh agi ngga Jesus!”

⁵⁷Pak Peter miman, “Dayung, aku dŭh puan Ayŭh!”

⁵⁸Dŭh tui ripas anŭ, ndi naan dinge daya kiris Peter ka nang, “Kuu ati gŭh ndi naan so ngara!” Pak Peter nam, “Dŭh!”

⁵⁹Kira ka ndi jam ripas anŭ ndi naan dinge nang, “Taŭn-i sawŭ daya ati agi ngga Jesus, sabab ayŭh daya Galilee!”

⁶⁰Pak Peter nam, “Aku dŭh puan kayuh nang mu!” Nganŭ gŭh, darŭm ayŭh babŭ minyu, babang kukok.

⁶¹Tuhan kimat ka tirek Peter, ka Peter ingat Tuhan ko nang di ayŭh, “Sibayuh babang kukok sikambŭh, kuu re pitaruh kari nang adŭp mu dŭh puan Aku.”

⁶²Peter ruah so nŭ ka nyisakuk sien.

⁶³Ngara adi nguan jaga Jesus napat Ayŭh buang mukong Ayŭh.

⁶⁴Ngara nutu batŭh-I ka siken, “Asi mukong Kuu? Suba kidaan!”

⁶⁵Ka bagŭ dinge kayuh bŭkŭn adi ngara nang ngga pimangŭh Ayŭh.

⁶⁶Kan andu mbŭh jawa, bara nyamba bangsa Jahudi, bara pingubak imam, ka bara gurū Ukum-adat Jahudi mandŭg tikuruk; ka Jesus meh dog taban ka Kunsil.

⁶⁷“Kidaan di kieh,” ngara nang, “Kuu kah Kristus?” Ayŭh nam, “Kambŭi Aku kidaan di angān, angān dŭh sabah Aku;

⁶⁸Ka kambŭi Aku siken kayuh di angān, angān abah nam.

⁶⁹Pak so madin Anak Manusia re guru tura ka tauh Tapa Bisa-pŭrŭg.”

⁷⁰Ngara sopŭrŭg nang, “Jadi Kuu ati meh Anak Tapa?” Ayŭh nam ngara, “Sak adi nang ngan.”

⁷¹Ka ngara nang, “Ata dŭhsah tia biguna di saksi! Adŭp ta mbŭh dingah kayuh adi nang-I!”