Read Biatah Bidayuh LUKE 23 Bible Online

LUKE 23 - Biatah Bidayuh bible

LUKE 23

¹Ndi tibaran anŭ makat ka taban Jesus ka yŭn Pilate;

²diginŭ ngara piguru nyarah Ayŭh: “Kieh mbŭh dapŭd daya ati kinanyap bangsa ami ngga ajar-I, nang kieh dŭh siŭn bayar suke ka Caesar, buang-I nang adŭp-I Kristus, adi raja.”

³Pilate siken Ayŭh, “Kuu raja daya Jahudi kah?” “Adŭp mu mbŭh nang” Jesus nam.

⁴Jadi Pilate nang di bara pingubak imam samŭn di bara daya bagŭ, “Mating sarah dapŭd ku di daya ati.”

⁵Pak ngara babŭ gŭh nang, “Ngga ajar-I Ayŭh ngasut daya di ndi tarun tana Judea da ndai pito; Ayŭh piguru-i di Galilee ka madin mbŭh ndŭg abong ati gŭh.”

⁶Kan Pilate dingah sakanŭ, ayŭh siken, “Daya ati daya Galilee kah?”

⁷Jadi kan Pilate dingah Jesus mandŭg so tarun tana adi dog nguasa Herod, ayŭh pait Ayŭh ka Herod, adi agi gŭh di Jerusalem di tika anŭ.

⁸Herod mbŭh raru munos asŭng-i kan ayŭh kiris Jesus, sabab ayŭh taŭn mbŭh dingah pasar Jesus ka mbŭh tian ti gruwŭn an kiris Ayŭh. Ayŭh raru harap adŭp-i tungang kiris Jesus ndai pingandai-nginga.

⁹Jadi Herod nggen bagŭ pinyiken di Ayŭh, pak Jesus dŭh nam.

¹⁰Bara pingubak imam ka bara gurū Ukum-adat Jahudi makat mijog ka bandar nyarah Ayŭh.

¹¹Herod ngga bara soldadu-i napat buang ginaka di tunduh Ayŭh; komŭnŭ ngara bada Ayŭh nēn jipo-ambu adi grua ka pait Ayŭh pari ka Pilate.

¹²Di andu anŭ gŭh Herod ngga Pilate bidamai, amai diŭ so anŭ ngara duwŭh taŭn pinganyu.

¹³Pilate bagan da tikuruk bara pingubak imam, nyamba bangsa Jahudi, samŭn bara daya bagŭ,

¹⁴ka nang di ngara, “Angān mbŭh taban daya ati ka yŭn ku ka nang Ayŭh ngasut daya. Aku muko siken Ayŭh digiti di sirung jawin ngan. Angān nang Ayŭh sarah pak mating sarah-I dapŭd ku.

¹⁵Herod dŭh gŭh tungang dapŭd sarah-I, amai ayŭh pait Ayŭh pari ka kieh. Mating sarah daya ati adi re bada Ayŭh patut dog ukum kabŭs.

¹⁶Aku re bada Ayŭh dog madŭs ka komŭnŭ pirupas Ayŭh.” [

¹⁷Barang Gawai Paska, nanyam kanyet-i, Pilate pirupas ndi naan daya adi dog jer yŭn ngara.][57]

¹⁸Sopŭrŭg daya diginŭ samah nyirais nang, “Siŭ Ayŭh! Pirupas Barabbas yŭn ami!” (

¹⁹Barabbas mbŭh dog jer sabab-i ko ngasut daya da ndai pito darŭm kupo, ka mbŭh siŭ daya.)

²⁰Pilate raan pirupas Jesus, jadi ayŭh mite so bara daya bagŭ dinge.

²¹Pak ngara nyirais nam, “Masak Ayŭh di rigang! Masak Ayŭh di rigang!”

²²Pilate nang dinge, adi pitaruh saba, di ngara, “Pak ani sarah-I? Aku dŭh tungang dapŭd sarah-I adi bisa bada Ayŭh patut dog ukum kabŭs! Aku re bada Ayŭh dog madŭs ka komŭnŭ pirupas ayŭh.”

²³Pak ngara babŭ gŭh nyirais ngga sirŭŭn rabis bana nang Jesus patut dog masak di rigang; ka sikasŭn-i sirŭŭn ngara manang.

²⁴Pilate miratak ukum nanyam pinyiraan ngara.

²⁵Ayŭh piruah sianŭ adi ngara raan, adi mbŭh dog jer sabab-i ko ngasut daya da ndai pito buang mbŭh siŭ daya; ka Jesus, ayŭh nyerah ka darŭm tangan ngara siŭn ngara ndai barang ka mun nanyam suka asŭng ngara.

²⁶Bara soldadu taban Jesus bu, ka darŭm ngara panu, ngara bidapŭd ngga ndi naan daya so Cyrene dŭn Simon adi mandŭg so sapa tarun tana rais re mŭrŭt kupo. Ngara nakap ayŭh, na rigang di kawin-i, ka bada ayŭh gŭrŭng-i tunda Jesus.

²⁷Bara daya bagŭ tunda Ayŭh; dupan ngara anŭ agi kada dayung adi bana sien, muās Ayŭh.

²⁸Jesus bigiring nura ngara ka nang, “Dayung Jerusalem! Dŭhnyah muās Aku, pak muās adŭp ngan samŭn bara anak ngan.

²⁹Amai tipuh-i re mandŭg adi ngga daya re nang, ‘Mbŭh raru binasip dayung adi bŭn bite, adi bŭn biranak, ka adi bŭn nyisuh anak!’

³⁰ Anŭ inŭh tipuh adi ngga daya re nang di darŭd, ‘Nyatŭk kieh!’ ka di tirunduk, ‘Sukan kieh!’

³¹Kambŭi kayuh adi mun anŭ dog ndai di tŭngŭn kayuh darŭm-i gibabŭ barŭm, ani meh re dog ndai dieh kan-i mbŭh rayu?”

³²Agi duwŭh naan daya arap, sua ngga Jesus re dog ukum kabŭs.

³³Kan ngara mbŭh ndŭg tarun adi dog kadŭn “Tikurok,” ngara masak Ayŭh di rigang diginŭ, samŭn duwŭh naan daya arap anŭ, ndi tura ka tauh ndi tura ka bait-I.

³⁴ Jesus nang, “Sama, apun ngara! Ngara dŭh puan kayuh adi ndai-i.”[58] Ngara kutung piraka-I dupan adŭp ngara, pakai dadu.

³⁵ Bara daya mijog diginŭ tingga, darŭm bara pingibās bangsa Jahudi napat Ayŭh: “Ayŭh nyiramat daya; tandah Ayŭh nyiramat adŭp-I kambŭi Ayŭh sawŭ Kristus adi Tapa mbŭh mien!”

³⁶ Bara soldadu gŭh napat Ayŭh: ngara tudu Ayŭh ka jugan wain adi kurang brega ka Ayŭh,

³⁷ka nang, “Nyiramat adŭp Mu kambŭi Kuu raja daya Jahudi!”

³⁸Nyirungan ubak-I agi dog nuris sakati: “Ati inŭh Raja daya Jahudi”

³⁹Ndi naan so daya arap anŭ adi dog masak, bakit Ayŭh: “Dŭh kah Kuu Kristus? Nyiramat adŭp Mu samŭn kieh!”

⁴⁰Pak sianŭ ndi nang ayŭh, nang-i, “Dŭh kah kuu taru Tapa? Kuu kambat ukum brimun ngga jangi.

⁴¹Jata ukum taŭn patut, sabab ata kambat baras pingandai adŭp ta; pak Ayŭh, mating-I ndai sarah.”

⁴²Ka ayŭh nang, “Jesus, ingat aku kan Kaam mbŭh jadi Raja!”

⁴³Jesus nang di ayŭh, “Sabah meh, di andu ati kuu re agi ngga Aku di Paradise.”

⁴⁴Kan-i mbŭh arong pukor simŭng-duwŭh, batŭh andu mbŭh dŭh nyekar ka ndi tarun tarun tana mbŭh karŭm ndŭg pukor taruh;

⁴⁵ ka banang tabir, di yŭn-i dog tangid di Ramin Tuhan, mbŭh tiratak nyinuwŭh.

⁴⁶ Jesus nyirais ngga sirŭŭn bana, nang-I, “Sama! Aku nyerah adŭp Ku ka darŭm tangan Mai!” Ko-I nang sakanŭ, Ayŭh kabŭs.

⁴⁷Pingubak soldadu kiris kayuh adi mbŭh jadi, ayŭh muji Tapa, “Tŭk sawŭ daya ati dŭh biyŭn sarah!”

⁴⁸Bara daya adi agi tikuruk diginŭ kiris kayuh adi mbŭh jadi; sopŭrŭg ngara maad ka ramin adŭp ngara, nupap sudo buang susah.

⁴⁹ Sopŭrŭg dingan Jesus, samŭn bara dayung adi tunda Ayŭh so Galilee, mijog so jo ka kiris sopŭrŭg kayuh anŭ.

⁵⁰Agi ndi naan daya dŭn Joseph so kupo Arimathea di tarun tana Judea. Ayŭh daya adi kana adi dog stabi daya, adi kajŭn andu adi ngga Tapa piguru mritah.[59] Sunggu ayŭh ndi naan so daya Kunsil, ayŭh dŭh situju ngga itong ka di pingandai ngara.

⁵¹

⁵²Ayŭh di tudu Pilate ka mite tadang Jesus.

⁵³Komŭnŭ ayŭh bisor-I so rigang, marut-I ngga banang linen, ka na-I darŭm kubur batuh adi ko dog mubo ka adi bŭn dog pakai.

⁵⁴Andu anŭ mbŭh andu rimŭh, buang andu Sabbath mbŭh re piguru.

⁵⁵Bara dayung adi tunda Jesus so Galilee sua ngga Joseph. Ngara kiris kubur ka simuki tadang Jesus dog na dieh.

⁵⁶ Komŭnŭ ngara maad ka sidia rapah samŭn wangi yŭn tadang Jesus. Di andu Sabbath ngara rŭŭ so kraja, nimun adi dog pesan Ukum-adat.