Read Biatah Bidayuh LUKE 24 Bible Online

LUKE 24 - Biatah Bidayuh bible

LUKE 24

¹Awar isan isan andu minggu bara dayung anŭ di ka kubur, taban rapah adi ngara ko sidia.

²Ngara kiris batuh mbŭh dog sigen so rubang kubur,

³ka ngara mŭrŭt; pak ngara dŭh dapŭd tadang Tuhan Jesus.

⁴Ngara mijog diginŭ inga inga, simuki-i bisa jadi simŭnŭ, kan gŭgŭh agi duwŭh naan daya nēn piraka bringam mijog sindŭk ngara.

⁵Darŭm taru, bara dayung anŭ mutu ubak-i ka tana, darŭm dari adi duwŭh naan anŭ nang di ngara, “Mani angān jiroh Ayŭh adi udip di dupan adi mbŭh kabŭs?

⁶ Mating Ayŭh digiti; Ayŭh mbŭh makat! Ingat ngan ani nang-I di angān di andu Ayŭh di Galilee:

⁷‘Anak Manusia dŭh siŭn dŭh dog nyerah ka tangan daya bidosa, dog masak di rigang, ka taruh andu ripas anŭ Ayŭh makat udip bauh.’ ”

⁸Nganŭ ngara ingat pinganang-I,

⁹pari so kubur, ka kidaan sopŭrŭg kayuh anŭ di ngara adi simŭng-ndi naan murid Jesus, samŭn di bara adi bŭkŭn.

¹⁰Bara dayung anŭ, inŭh Mary Magdalene, Joanna, ka Mary adi sindŭ James; ngara ngga bara dayung adi bŭkŭn samah kidaan sopŭrŭg kayuh anŭ di bara pinyuruh.

¹¹Pak bara pinyuruh, pikir kayuh adi bara dayung anŭ nang kayuh au-tarun, dŭh-i sabah ngara.

¹²Pak Peter makat ka bikaduh di ka kubur; ayŭh mutu ka kiris banang-tadang adŭ. Ayŭh maad buang inga inga di kayuh adi mbŭh jadi.

¹³Di andu anŭ gŭh duwŭh naan so bara pinunda Jesus, panu ka ndi anak kupo dŭn Emmaus, kira ka simŭng-ndi kilomita jo so Jerusalem.

¹⁴Ngara duwŭh minyu pasar sopŭrŭg kayuh adi mbŭh jadi.

¹⁵Darŭm ngara minyu kirakar, adŭp Jesus nyandat ngara ka samah panu ngga ngara;

¹⁶ngara kiris Ayŭh, pak tipia dŭh natŭng Ayŭh.

¹⁷Jesus nang di ngara, “Ani nang ngan buang ngan panu?” Ngara rŭŭ, buang raŭn ngara tatŭng susah.

¹⁸Ndi so ngara, dŭn Cleopas, siken Ayŭh, “Kaam sadi adŭ kah pinami di Jerusalem adi dŭh puan kayuh adi mbŭh jadi diginŭ kudu kudu andu adi mbŭh ripas?”

¹⁹“Kayuh ani,” Ayŭh siken. “Kayuh adi mbŭh jadi di Jesus so Nazareth,” ngara nam. “Daya anŭ inŭh nabi, adi Tapa samŭn manusia mbŭh nyirundeng biyŭn kuasa darŭm piminyu ngga darŭm pingandai.

²⁰Pingubak pingubak imam ami samŭn bara nyamba bangsa Jahudi nyerah Ayŭh yŭn dog ukum kabŭs, ka masak Ayŭh di atuh rigang.

²¹Kieh pikir buang harap Ayŭh taŭn sianŭ adi re pirupas Israel! Pak-i mbŭh taruh andu madin, ripas kayuh anŭ mbŭh jadi.

²²Agi kada dayung so tibaran ami bada kieh inga inga; ngara di ka kubur awar isan isan,

²³pak ngara dŭh dapŭd tadang-I. Ngara maad ka kidaan adŭp-i kiris malaikat malaikat adi kidaan di ngara nang Ayŭh udip.

²⁴Ka kada so tibaran ami di ka kubur ka dapŭd kayuh nimun adi bara dayung ko kidaan, pak ngara mating kiris Ayŭh.”

²⁵Komŭnŭ Jesus nang di ngara, “Ruai nang budo-i angān, paŭh sais sabah di sopŭrŭg kayuh anŭ adi bara nabi ko nang!

²⁶Dŭh kah-i patut Kristus kinyam jera-birasa anŭ, ka komŭnŭ mŭrŭt ka darŭm bragah-I?”

²⁷Jadi Jesus kidaan di ngara rati kayuh adi mbŭh dog nuris pasar adŭp-I di Surat-kudus, piguru so surat surat Moses samŭn so surat surat bara nabi.

²⁸Darŭm ngara mbŭh sindŭk anak kupo anŭ adi re ngara ka, Jesus panu mun adi re an radus;

²⁹pak ngara bitan Ayŭh, nang, “Nyirŭmŭn di yŭn ami; andu mbŭh rambat ka mbŭh sindŭk karŭm.” Ka-I mŭrŭt ka nyirŭmŭn di yŭn ngara.

³⁰Ayŭh guru man ngga ngara, mbit ruti ka nyiberkat; komŭnŭ Ayŭh mire ruti anŭ ka nggen-i di ngara.

³¹Nganŭ ngara rada ka natŭng Ayŭh, pak Ayŭh miyap so batŭh ngara.

³²Dupan adŭp-i ngara nang, “Dŭh kah agi nyam gangam-i atin ta darŭm Ayŭh minyu ngga ata di aran buang-I kidaan rati pinganang Surat-kudus di ata?”

³³Ngara rasu makat ka pari ka Jerusalem, di yŭn ngara dapŭd simŭng-ndi naan murid tikuruk ngga bara adi bŭkŭn

³⁴adi nang, “Tuhan sawŭ mbŭh makat! Ayŭh agi nandŭng di Simon!”

³⁵Ngara duwŭh meh kidaan di ngara kayuh adi mbŭh jadi di aran, ka simuki ngara natŭng Tuhan kan Ayŭh mire ruti.

³⁶Darŭm ngara duwŭh kidaan kayuh anŭ, tapŭ ka Jesus agi mijog di ruang ngara, ka nang di ngara, “Damai ka angān.”[60]

³⁷Ngara gŭgŭh buang taru, pikir adŭp-i kiris mindo.

³⁸Pak Ayŭh nang di ngara, “Mani angān taru? Mani angān kurang sabah?

³⁹Tingga kaja tangan Ku; adŭp Ku inŭh ati. Kinyam Aku, ka puan meh, mindo dŭh-i biyŭn isin ngga turang, mun adi kiris ngan Aku biyŭn.”

⁴⁰Ayŭh nang sakanŭ buang kiren kaja ngga tangan-I di ngara.[61]

⁴¹Ngara gibabŭ dŭh tungang sabah, sabab ruai gaŭn buang inga inga. Ka Jesus siken ngara, “Agi kah kayuh man digiti?”

⁴²Ngara nggen di Ayŭh ndi apŭg iken adi mbŭh dog tanŭk.

⁴³Jesus mbit-i ka man di sirung jawin ngara.

⁴⁴Komŭnŭ Ayŭh nang di ngara, “Ati inŭh kayuh adi Aku ko kidaan di angān sitadŭn Aku gibabŭ ngga angān: sopŭrŭg kayuh adi dog nuris pasar Aku di Ukum-adat Moses, di surat surat nabi, ka di Mazmur, dŭh siŭn dŭh jadi bitŭtŭk.”

⁴⁵Komŭnŭ Jesus kuka pikir ngara da mirati pinganang Surat-kudus,

⁴⁶ka nang di ngara, “Sakati dog nuris: Kristus dŭh siŭn dŭh kinyam jera-birasa ka dŭh siŭn dŭh makat so kabŭs taruh andu ripas anŭ.

⁴⁷Ka ngga adŭn-I, agah pasar daya patut marik pimudip-i pari ka Tapa siŭn dapŭd pingapun dosa, dŭh siŭn dŭh dog nyuse di sopŭrŭg bangsa, piguru so Jerusalem.

⁴⁸Angān mbŭh jadi saksi yŭn sopŭrŭg kayuh ati.

⁴⁹ Ka adŭp Ku re pait ka angān kayuh adi Sama Ku mbŭh bijanji an nggen di angān. Pak angān dŭh siŭn dŭh an kajŭn di kupo ndŭg ka kuasa so sambu mūn ka tunduh ngan.”

⁵⁰ Komŭnŭ Ayŭh taban ngara ruah so kupo ka Bethany; diginŭ Ayŭh pakat tangan-I ka nyiberkat ngara.

⁵¹Darŭm-I nyiberkat ngara, Ayŭh birakang ngga ngara ka dog paad ka shorga.[62]

⁵²Ngara nyambah Ayŭh, ka komŭnŭ pari ka Jerusalem ngga gaŭn ginanyŭn.

⁵³Ngara siraru agi di Ramin Tuhan, nggen puji di Tapa.