Read Biatah Bidayuh LUKE 3 Bible Online

LUKE 3 - Biatah Bidayuh bible

LUKE 3

¹Di Sawa adi simŭng-rimŭh pinyipritah Caesar Tiberius, Pontius Pilate jadi gabenor di Judea, Herod jadi raja di Galilee, ka jurud-i Philip jadi raja di tarun tana Iturea ngga Trachonitis; Lysanias jadi raja di Abilene,

²ka Annas ngga Caiaphas jadi imam bās. Di tika anŭ Tapa minyu di John anak Zechariah di tarun tana-pajam.

³Jadi John panu di ndi tarun tana maning Yang Jordan, ngajar, “Marik pimudip ngan pari ka Tapa ka kambat baptisa meh angān, isa Tapa apun dosa ngan.”

⁴ Nimun adi dog nuris darŭm surat nabi Isaiah: “Agi daya nyirais nang di tarun tana-pajam: ‘Sidia aran yŭn Tuhan; bada tŭnggŭn aran yŭn Tuhan panu!

⁵Tiap dau an dog ngisi, tiap sandah ngga darŭd an dog pirapat. Aran adi bidikok an dog nŭnggŭn, ka aran adi nyurok mugu an dog pirata.

⁶Sopŭrŭg daya re kiris Tapa nyiramat manusia!’ ”

⁷ Bara bara daya mandŭg tudu John an kambat baptisa so ayŭh. “Angān bara jippŭh!” ayŭh nang di ngara. “Asi kidaan di angān nang angān bisa bu mangān ukum adi Tapa re pait?

⁸ Ndai pingandai adi kiren angān mbŭh dŭh tia bidosa adi kiren angān mbŭh marik pimudip ngan pari ka Tapa. Ka dŭhnyah nang dupan adŭp ngan, Abraham mbŭh babuk ngan. Aku kidaan di angān, Tapa bisa ndai so dudu batuh ati bara sesang yŭn Abraham!

⁹ Kapak mbŭh dog sidia ngga tabŭng tŭngŭn kayuh di uat-i; tiap tŭngŭn adi dŭh buān buwa adi kana re dog tabŭng ka dog taran di apui.”

¹⁰Bara daya siken ayŭh, “Ani re ami ndai garang?”

¹¹Ayŭh nam, “Ayŭh adi biyŭn duwŭh jipo dŭh siŭn dŭh nggen ndi di sianŭ adi dŭh biyŭn, ka ayŭh adi biyŭn pinguman dŭh siŭn dŭh samah-i ngga dingan-i.”

¹² Kada daya pinsuke, mandŭg an kambat baptisa, siken ayŭh, “Gurū, ani re ami ndai?”

¹³“Dŭhnyah tambit rabis so adi dog miratak,” Ayŭh nang di ngara.

¹⁴Kada soldadu agi gŭh siken ayŭh, “Kieh boh? Ani re ami ndai?” Ayŭh nang di ngara, “Dŭhnyah sirapas duit daya, bait napŭ daya. Angān patut munos ngga gaji ngan.”

¹⁵Pingarap daya mbŭh tanŭ ka jadi, ka ngara bipikir yŭh kah dŭh John anŭ Kristus.[5]

¹⁶Jadi John nang di sopŭrŭg ngara, “Aku baptisa angān ngga piin, pak Ayŭh adi rabis bās so aku re mandŭg. Bŭŭng kasut-I bina, dŭh aku pus re kuka. Ayŭh re baptisa angān ngga Roh Kudus ka ngga apui.

¹⁷Ayŭh biyŭn tapan di tangan-I. Ayŭh re nguruk gandom adi bisig darŭm panggau; pak aping, Ayŭh re badang di apui adi dŭh bisa pura.”

¹⁸Darŭm bagŭ masam gaya John nyuse Agah Kana di daya buang ngatat daya da ngubah aran pimudip ngara.

¹⁹ Pak John agi nyara Herod, adi gabenor, sabab ayŭh mbŭh tambit Herodias adi sawŭn jurud-i ndu sawŭn adŭp-i ka sabab bagŭ masam pingandai arap-i adi bŭkŭn.

²⁰Komŭnŭ ayŭh bada John dog jer, pingandai-i adi siabo arap.

²¹Ripas sopŭrŭg daya mbŭh dog baptisa, Jesus dog baptisa gŭh. Darŭm Ayŭh simayang, rangit tikuka,

²² ka Roh Kudus mūn ka mbap di tunduh-I darŭm gayŭn manuk asang. Ka sirŭŭn mandŭg so shorga, nang, “Kuu Anak nyirot Ku. Asŭng Ku munos di Kuu.”

²³Kan Jesus piguru ndai kraja-I, umbur-I agi kira ka mbŭh taruh puru sawa. Ayŭh anŭ, nanyam ka rundeng daya, anak Joseph adi anak Heli,

²⁴anak Matthat, anak Levi, anak Melchi, anak Jannai, anak Joseph,

²⁵anak Mattathias, anak Amos, anak Nahum, anak Esli, anak Naggai,

²⁶anak Maath, anak Mattathias, anak Semein, anak Josech, anak Joda,

²⁷anak Joanan, anak Rhesa, anak Zerubbabel, anak Shealtiel, anak Neri,

²⁸anak Melchi, anak Addi, anak Cosam, anak Elmadam, anak Er,

²⁹anak Joshua, anak Eliezer, anak Jorim, anak Matthat, anak Levi,

³⁰anak Simeon, anak Judah, anak Joseph, anak Jonam, anak Eliakim,

³¹anak Melea, anak Menna, anak Mattatha, anak Nathan, anak David,

³²anak Jesse, anak Obed, anak Boaz, anak Salmon, anak Nahshon,

³³anak Amminadab, anak Admin, anak Arni, anak Hezron, anak Perez, anak Judah,

³⁴anak Jacob, anak Isaac, anak Abraham, anak Terah, anak Nahor,

³⁵anak Serug, anak Reu, anak Peleg, anak Eber, anak Shelah,

³⁶anak Cainan, anak Arphaxad, anak Shem, anak Noah, anak Lamech,

³⁷anak Methuselah, anak Enoch, anak Jared, anak Mahalaleel, anak Kenan,

³⁸anak Enosh, anak Seth, anak Adam, anak Tapa.