Read Biatah Bidayuh LUKE 4 Bible Online

LUKE 4 - Biatah Bidayuh bible

LUKE 4

¹Jesus pari so Yang Jordan dog nguasa Roh Kudus, adi nguru Ayŭh ka tarun tana-pajam,

²di yŭn-I dog suba Siarap sitian pat puru andu. Darŭm tipuh anŭ, Ayŭh dŭh man ani ani, ka mbŭh sibŭrŭk kan tipuh anŭ mbŭh ripuan.

³Siarap nang di Ayŭh, “Kambŭi Kaam Anak Tapa, mritah batuh ati da jadi ruti.”

⁴ Pak Jesus nam, “Surat-kudus nang, ‘Manusia dŭh bisa udip ngga ruti adŭ.’ ”

⁵Komŭnŭ Siarap taban Ayŭh ka tarun yŭn adi bigatung ka, darŭm ndi kidap batŭh, kiren sopŭrŭg pritah ong di Ayŭh.

⁶“Aku re nggen di Kaam sopŭrŭg kuasa ati samŭn sangŭn-i,” Siarap nang di Ayŭh. “Sopŭrŭg ati mbŭh dog nggen di aku, ka aku bisa nggen-i di tadŭ tadŭ daya aku raan.

⁷Sopŭrŭg ati re jadi tung jamai, kambŭi Kaam nyambah aku.”

⁸ Jesus nam, “Surat-kudus nang, ‘Nyambah Tuhan adi Tapa mu ka bituan di Ayŭh adŭ!’ ”

⁹Komŭnŭ Siarap anŭ taban Ayŭh ka Jerusalem ka na Ayŭh di tibung Ramin Tuhan, ka nang di Ayŭh, “Kambŭi Kaam Anak Tapa, buan adŭp Mai so ti.

¹⁰ Amai Surat-kudus nang, ‘Tapa re mritah bara malaikat-I da nakit kingat Kaam.’

¹¹ Agi gŭh-i nang, ‘Ngara re digŭng Kaam isa sirabi ka kaja Mai dŭh gŭh re kinaman dog batuh.’ ”

¹² Pak Jesus nam, “Surat-kudus nang, ‘Dŭhnyah suba Tuhan adi Tapa mu.’ ”

¹³Kan Siarap muko barang ka mun-i suba Jesus, ayŭh tingge Ayŭh sadang tian-i.

¹⁴Jesus pari ka Galilee, ka kuasa Roh Kudus agi ngga Ayŭh. Agah pasar Ayŭh mbŭh kambang di ndi tarun tana anŭ.

¹⁵Ayŭh ngajar di ramin ramin simayang-Jahudi ka mbŭh dog muji sopŭrŭg daya.

¹⁶Komŭnŭ Jesus di ka Nazareth, tarun yŭn-I ko dog mira. Diginŭ Ayŭh di ka ramin simayang-Jahudi nimun kanyet-I di andu Sabbath. Ayŭh mijog re basa Surat-kudus

¹⁷ka mbŭh dog nggen surat nabi Isaiah. Ayŭh murai barun surat anŭ ka dapŭd yŭn adi agi dog nuris,

¹⁸ “Roh Tuhan agi ngga Aku, sabab Ayŭh mbŭh mien Aku da taban agah kana ka daya sirata. Ayŭh mbŭh pait Aku da piagah pinyirupas di daya-takap, pinyibua di daya adi karak, ka pinyirupas di daya adi dog kinanyuh,

¹⁹buang piagah tika-i mbŭh mandŭg adi ngga Tuhan nyiramat daya-I.”

²⁰Jesus marun surat-barun anŭ ka, ko-I nggen pari di sianŭ adi nguan, Ayŭh guru.[6] Sopŭrŭg daya di darŭm ramin simayang-Jahudi anŭ tirek Ayŭh,

²¹darŭm Ayŭh nang di ngara, “Pinganang Surat-kudus ati mbŭh jadi bitŭtŭk andu ati darŭm angān dingah-i dog basa.”

²²Ngara samah nganju Ayŭh buang inga inga di pinyikana piminyu-I. Ngara nang, “Dŭh kah Ayŭh anak Joseph?”

²³Ayŭh nang di ngara, “Tatu angān re ngagit pinganang pitas ati di Aku, ‘Doktor, pibua adŭp Mai.’ Angān re bada gŭh Aku ndai digiti di kupo adŭp Ku kayuh anŭ adi angān dingah mbŭh dog ndai di Capernaum.

²⁴ Aku kidaan di angān,” Jesus pijuu nang, “Mating nabi dog trima di kupo adŭp-i.

²⁵ “Dingah pinganang Ku ati: taŭn-i sawŭ, di jaman Elijah, agi bara dayung uban di Israel kan ujen mating sitŭkŭd taruh sawa sitangah ka apag adi bisā timbur di ndi tarun tana.

²⁶ Pak Elijah dŭh dog pait ka tadŭ daya di Israel. Ayŭh dog pait ka ndi naan dayung uban adi rŭŭ di Zarephath di tarun tana Sidon.

²⁷ Ka agi gŭh bara daya adi naman andam kurit adi bisā rŭŭ di Israel di jaman nabi Elisha; pak ndi so ngara mating gŭh dog pibua, adŭ-i Naaman adi daya Syria.”

²⁸Kan daya adi darŭm ramin simayang-Jahudi dingah kayuh anŭ, ngara mbŭh raru baji.

²⁹Ngara makat, batak Jesus ka sapa kupo, ka taban Ayŭh ka tibung sandah adi yŭn kupo ngara dog pijog, an buan Ayŭh so jenjang.

³⁰Pak Ayŭh panu ruah so asah bara daya bagŭ ka bu.

³¹Jadi Jesus di ka Capernaum, kupo di Galilee, di yŭn-I ngajar daya di andu Sabbath.

³² Sopŭrŭg ngara mbŭh inga inga di gaya-I ngajar, sabab Ayŭh ngajar ngga kuasa.

³³Di darŭm ramin simayang-Jahudi anŭ, agi ndi naan daya adi dog mŭrŭt umot adi arap. Ayŭh nyirais ngga sirŭŭn bana nang-i,

³⁴“Re Mai simuki ngga kieh, Jesus so Nazareth? Kaam mandŭg an pirabur kieh kah? Aku puan asi Kaam. Kaam inŭh pinyisung Tapa adi kudus!”

³⁵Jesus mritah roh anŭ, “Pajam! Ruah so daya anŭ!” Umot anŭ pitumbang daya anŭ ka tana di sirung jawin ngara ka ruah so ayŭh buang dŭh bada-i kinaman.

³⁶Bara daya mbŭh inga inga ka nang dupan adŭp-i, “Pinganang ani meh anŭ? Ngga kuasa ka pinyibisā Ayŭh mritah bara roh arap anŭ da ruah, ka ngara sawŭ ruah!”

³⁷Ka agah pasar Jesus kambang di barang yŭn-i di ndi tarun tana anŭ.

³⁸Ruah so ramin simayang-Jahudi anŭ, Jesus di ka ramin Simon. Dinŭh Simon mbŭh bana sungoh, ka ngara minyu di Jesus pasar ayŭh.

³⁹Ayŭh di ka mijog di bŭngŭn panggo-i ka mritah sungoh-i anŭ da bu so ayŭh; sungoh anŭ bu so ayŭh, ka ayŭh makat rasu ngidang ngara.

⁴⁰Ripas batŭh andu mbŭh simŭdŭp, sopŭrŭg adi biyŭn dingan adi birandam naman bagŭ masam andam taban dingan-i anŭ adi birandam ka yŭn Jesus; Ayŭh na tangan-I di tunduh barang naan ngara ka pibua sopŭrŭg ngara.

⁴¹Umot gŭh ruah so bagŭ daya, nyirais nang, “Kaam inŭh Anak Tapa!” Jesus mritah bara umot anŭ da dŭh minyu, sabab ngara puan Ayŭh Kristus.[7]

⁴²Kan andu mbŭh jawa, Jesus bu so kupo di ka tarun adi pajam jo so daya. Daya piguru jiroh Ayŭh, ka kan dapŭd Ayŭh, ngara suba an bitan Ayŭh da dŭh bu.

⁴³Pak Ayŭh nang di ngara, “Aku dŭh siŭn dŭh nyuse Agah Kana pasar munki Tapa mritah[8] di kupo kupo bŭkŭn gŭh, amai sabab anŭ inŭh Tapa mbŭh pait Aku.”

⁴⁴Sawŭ meh Ayŭh ngajar di ramin ramin simayang-Jahudi di ndi tarun tana Judea.