Read Biatah Bidayuh LUKE 5 Bible Online

LUKE 5 - Biatah Bidayuh bible

LUKE 5

¹ Agi ndi sidah, Jesus mijog di tabing Rawŭt Gennesaret, ka bara daya birabut an nyindŭk Ayŭh an dingah pinganang Tapa.

²Ayŭh kiris duwŭh buah arud di tabing rawŭt; pinakap iken mating dieh, mbŭh ruah di ngu jaring.

³Jesus mŭrŭt arud adi Simon dapu, ka mite ayŭh sigen-i nisit so deyŭh. Jesus guru darŭm arud ka ngajar bara daya.

⁴Kan-I muko ngajar, Ayŭh nang di Simon, “Sigen meh arud mu ka yŭn adi tŭrŭp; kuu ngga bara dingan mu bisor jaring ngan, nakap iken.”

⁵ “Gurū,” Simon nam, “kieh ko bandar nyiraja ndi ngarŭm ngarŭm pak mating dapŭd ami. Pak amai Kaam bada, aku bisa bisor jaring.”

⁶ Ngara bisor jaring ka nakap raru bagŭ iken ndŭg ka jaring ngara mbŭh re tiratak.

⁷Jadi ngara kapai dingan ngara adi di arud bŭkŭn, da sua mandŭg turung. Ngara mandŭg ka ngisi so-duwŭh arud ngga dudu iken ndŭg ka re kaŭm.

⁸Kan Simon Peter kiris kayuh adi mbŭh jadi, ayŭh sidikang di kaja Jesus ka nang, “Bu so aku Tuhan! Aku ati daya bidosa!”

⁹Ayŭh ngga bara adi bŭkŭn mbŭh inga inga kiris pinyibagŭ iken adi ngara mbŭh nakap.

¹⁰Simŭnŭ gŭh ngara adi biayo ngga Simon, James ka John adi duwŭh madis anak Zebedee. Jesus nang di Simon, “Dŭhnyah taru; so madin kuu re nakap manusia.”

¹¹Ngara tarik arud ka deyŭh, tingge sopŭrŭg kayuh, ka tunda Jesus.

¹²Agi ndi sidah Jesus agi di ndi kupo di yŭn agi ndi naan daya naman andam kurit adi bisā. Kan-i kiris Jesus, ayŭh sidikang buang mutu di kaja Jesus, mite turung so Ayŭh, “Tuan, kambŭi Kaam raan, Kaam bisa bada aku bisig!”[9]

¹³Jesus ton tangan-I, tama ayŭh, “Aku raan,” Ayŭh nam. “Bisig meh!” Jam anŭ gŭh andam anŭ bu so ayŭh.

¹⁴ Jesus pesan ayŭh, “Dŭhnyah kidaan di tadŭ tadŭ daya, pak di ka imam ka bada ayŭh natu kuu sawŭ mbŭh bua. Ka ngga kiren adŭp mu mbŭh bua di daya bagŭ, jugan sadis nimun adi ko Moses pesan.”

¹⁵Pak agah pasar Jesus tanŭ ka kambang di barang yŭn-i, ka bara daya mandŭg an dingah Ayŭh samŭn an dapŭd bua so andam ngara.

¹⁶Pak Jesus bu ka tarun adi pajam, ka simayang.

¹⁷Ndi andu, kan Jesus aŭn ngajar, kada daya Pharisee ka bara gurū Ukum-adat Jahudi mbŭh agi guru diginŭ. Ngara mandŭg so barang kupo di Galilee ngga Judea ka so Jerusalem. Kuasa Tuhan agi ngga Jesus ngga pibua daya birandam.

¹⁸Ka agi kada daya mandŭg taban di ambok ndi naan daya naman andam ruku. Ngara suba an taban ayŭh mŭrŭt, an na ayŭh di sirung jawin Jesus.

¹⁹Pak sabab daya mbŭh raru bagŭ, ngara dŭh tungang taban ayŭh mŭrŭt. Jadi ngara taban ayŭh ka tibung ramin, ndai rubang, ka bisor ayŭh ngga ambok-i di yun daya bagŭ di sirung jawin Jesus.

²⁰Kan Jesus kiris munki masam bās-i pinyabah ngara, Ayŭh nang di daya anŭ, “Dingan, dosa mu mbŭh dog apun.”

²¹Bara gurū Ukum-adat Jahudi samŭn bara daya Pharisee piguru nang dupan adŭp-i, “Asi daya ati adi paŭh mbŭh ngujat sakanŭ! Tapa sadi adŭ adi bisa apun dosa!”

²²Jesus, puan pikir-kira ngara, Ayŭh nang, “Mani angān bipikir sakanŭ?

²³Sanang dŭ kah nŭŭh nang, ‘Dosa mu mbŭh dog apun,’ puan kah nang, ‘Makat ka panu’?

²⁴Aku an kiren di angān garang, nang Anak Manusia biyŭn kuasa di ong ngga apun dosa.” Jadi Ayŭh nang di sianŭ adi naman andam ruku, “Aku nang di kuu, makat, mbit ambok mu ka maad!”

²⁵Jam anŭ gŭh daya anŭ makat di sirung jawin ngara, mbit ambok-i adi yŭn-i ko guring, ka maad buang muji Tapa.

²⁶Ngara mbŭh inga inga! Buang taru, ngara muji Tapa, nang, “Ruai nang saruh-i kayuh adi ata kiris andu ati!”

²⁷Ripas anŭ, Jesus ruah ka kiris ndi naan pinsuke dŭn Levi, guru di yŭn daya bayar suke. Jesus nang di ayŭh, “Tunda Aku.”

²⁸Levi makat, tingge sopŭrŭg kayuh, ka tunda Ayŭh.

²⁹Komŭnŭ Levi ndai gawai bās di ramin-i yŭn Jesus, ka di dupan bara pingabang mbŭh bagŭ bara pinsuke samŭn daya bŭkŭn.

³⁰ Kada daya Pharisee samŭn kada gurū Ukum-adat Jahudi adi so tibaran Pharisee, ngadu di murid murid Jesus. “Mani angān man nok ngga bara pinsuke ka bara daya adi dog tirawan?” ngara siken.

³¹Jesus nam ngara, “Daya adi bua dŭh biguna di doktor, adŭ-i ngara adi birandam.

³²Aku dŭh mandŭg di bagan daya adi nang adŭp-i kana, pak bagan daya adi bidosa isa ngara marik pimudip ngara pari ka Tapa.”

³³Kada daya nang di Jesus, “Bara murid John awet bipusa ka simayang, ka simŭnŭ gŭh bara murid daya Pharisee; pak bara murid Mai man nok.”

³⁴Jesus nam, “Bisa kah angān bada bara pingabang di gawai sawan bipusa sitadŭn pingaten dari agi ngga ngara? Manŭn dŭh!

³⁵Pak andu-i re mandŭg kan pingaten dari dog tambit so ngara; nganŭ meh ngara siŭn bipusa.”

³⁶Jesus nang gŭh upama ati di ngara: “Mating daya nyiratak supek banang so piraka adi bauh ngga napung piraka adi amba; amai gŭt-i nyiratak piraka bauh, ka supek anŭ adi bauh dŭh gŭh brinyam ngga anŭ adi amba.

³⁷Bŭn gŭh daya ngisi bŭrŭh-kurit adi amba ngga wain adi bauh, sabab wain adi bauh re mubus bŭrŭh-kurit anŭ; wain re babas, ka bŭrŭh-kurit anŭ re rusak.

³⁸Sipatut-i, wain adi bauh nŭŭh na darŭm bŭrŭh-kurit adi tibŭn!

³⁹Ka mating daya an nok wain adi bauh ripas-i ko nok anŭ adi amba. ‘Adi amba inŭh kana dŭ,’ ayŭh nang.”