Read Biatah Bidayuh LUKE 9 Bible Online

LUKE 9 - Biatah Bidayuh bible

LUKE 9

¹Jesus bagan da tikuruk simŭng-duwŭh naan murid-I ka nggen di ngara pinyibisā ngga kuasa ngga pibu umot ka pibua barang masam andam.

²Komŭnŭ Ayŭh pait ngara da piagah pasar munki Tapa mritah,[21] buang pibua daya adi birandam,

³ ripas-I ko nang di ngara, “Dŭhnyah taban ani ani di pimanu ngan: bait-i sikud, bait-i beg, bait-i pinguman, bait-i duit, puan kah tambah jipo.

⁴Di tadŭ yŭn ngan dog kambat, rŭŭ di ramin anŭ ndŭg ka angān bu so kupo anŭ;

⁵ Di tadŭ yŭn ngan dŭh dog kambat daya, bu so kupo anŭ ka gutog dabu so kaja ngan ndu pinyibakan di ngara.”

⁶Bara murid matak ka panu tambus anak anak kupo, nyuse Agah Kana buang pibua daya adi birandam di barang yŭn.

⁷ Kan Herod, adi mritah Galilee, dingah sopŭrŭg kayuh adi mbŭh jadi, ayŭh mbŭh raru riruk, sabab agi kada daya nang John Pembaptisa mbŭh pari udip.

⁸Adi bŭkŭn nang Elijah mbŭh mandŭg, ka agi gŭh adi bŭkŭn nang ndi so bara nabi adi jah mbŭh makat udip dinge.

⁹Herod nang, “Ubak John aku ko kapŭg; pak asi meh siati adi aku dingah kayuh mun anŭ pasar Ayŭh?” Jadi ayŭh gruwŭn an kiris Jesus.

¹⁰Bara pinyuruh mari ka kidaan di Jesus sopŭrŭg kayuh adi ngara ko ndai. Ayŭh taban ngara ngga matak, sadi adŭp-I ngga ngara, ka kupo Bethsaida.

¹¹Kan bara daya bagŭ puan, ngara tunda Ayŭh. Ayŭh kambat ngara, ngajar ngara pasar Pinyipritah Tapa,[22] ka pibua ngara adi raan dog pibua.

¹²Kan-i mbŭh re singumi andu, ngara adi simŭng-duwŭh naan murid-I tudu Ayŭh ka nang, “Bada ngara maad, isa ngara di ka anak anak kupo ka teya teya adi maning arong ati, jiroh pinguman samŭn yŭn nyandong, sabab tarun ati mbŭh tarun adi maput ka jo so daya.”

¹³Pak Jesus nang di ngara, “Adŭp ngan nggen kayuh man di ngara.” Ngara nam, “Kayuh adi kieh biyŭn kaŭs-i rimŭh baru ruti ka duwŭh iken; Kaam bada kieh di miris pinguman kah yŭn sopŭrŭg daya ati?”

¹⁴(Kurang rabis, agi-i rimŭh ribu naan bara dari diginŭ.) Jesus nang di bara murid-I, “Bada daya guru ngga tibaran, ka ndi tibaran kira ka rimŭh-puru naan.”

¹⁵Ripas murid murid ko ngatur simŭnŭ,

¹⁶Jesus mbit rimŭh baru ruti ka duwŭh iken anŭ; buang nyigura ka rangit, Ayŭh nggen trima kaseh di Tapa, mire-i, ka nggen-i di bara murid da kutung di bara daya.

¹⁷Sopŭrŭg ngara man ndŭg bisoh, ka bara murid ngisi simŭng-duwŭh bakur puno ngga tadŭh pinguman.

¹⁸Ndi andu, kan Jesus simayang sadi adŭp-I, bara murid tudu Ayŭh. Jesus siken ngara, “Bara ati nang Aku asi?”

¹⁹ Ngara nam, “Kada-i nang Kaam John Pembaptisa. Adi bŭkŭn nang Kaam Elijah, ka adi bŭkŭn nang Kaam ndi so bara nabi adi jah pari udip.”

²⁰ “Angān boh?” Ayŭh siken ngara. “Angān nang Aku asi?” Peter nam, “Kaam inŭh Kristus so Tapa.”

²¹Jesus pesan ngara da dŭh kidaan kayuh anŭ di tadŭ tadŭ daya.

²²Ayŭh nang gŭh di ngara, “Anak Manusia dŭh siŭn dŭh kinyam pinyusah bās ka dog tirawan nyamba bangsa Jahudi, pingubak pingubak imam, ka bara gurū Ukum-adat Jahudi. Ayŭh re dog ukum kabŭs, pak andu adi taruh Ayŭh re dog pakat udip bauh.”

²³ Ka-I nang di sopŭrŭg ngara, “Kambŭi angān raan tunda Aku, angān dŭh siŭn dŭh an ngarah adŭp ngan, gŭrŭng rigang ngan barang andu, ka tunda Aku.

²⁴ Amai asi asi adi siŭt asŭng-i re kinanyap-i, pak asi asi adi kinanyap asŭng-i sitagar Aku, re dapŭd-i.

²⁵Ani utung ngan kambŭi angān dapu ndi ong ong, pak mbŭh pirabur ka kinanyap adŭp ngan? Mating utung-i!

²⁶Kambŭi angān mangŭh ngarun Aku samŭn ajar Ku, Anak Manusia re mangŭh gŭh ngarun angān kan Ayŭh mandŭg darŭm bragah-I adi bragah Sama ngga bara malaikat kudus.

²⁷Puan meh, agi digiti ngara adi dŭh re kabŭs sibayuh ngara kiris Tapa mritah.”[23]

²⁸ Kira ka ndi minggu ripas Jesus ko nang kayuh anŭ, Ayŭh taban Peter, John, samŭn James maad ndi sandah di simayang.

²⁹Darŭm Ayŭh simayang, raŭn-I birubah, ka piraka-I jadi buda ngasad.

³⁰Ka gŭgŭh agi diginŭ duwŭh naan daya minyu ngga Ayŭh. Ngara anŭ, Moses ngga Elijah,

³¹tatŭng darŭm bragah shorga, minyu ngga Jesus pasar munki Ayŭh re pijadi pinŭtŭn Tapa ngga pinyikabŭs-I di Jerusalem.

³²Peter samŭn ngara adi agi ngga ayŭh mbŭh rŭrŭ bŭŭs, pak ngara burah ka kiris bragah Jesus samŭn ngara duwŭh adi mijog ngga Ayŭh.

³³Atan ngara duwŭh bu so Jesus, Peter nang di Ayŭh, “Gurū, mbŭh raru kana inŭh kieh agi digiti! Kieh re ndai taruh bari, ndi yŭn Mai, ndi yŭn Moses, ka ndi yŭn Elijah.” (Sibandar-i ayŭh dŭh rada kayuh adi nang-i.)

³⁴Darŭm ayŭh babŭ minyu, abun mandŭg ka nyayung ngara; ka murid murid jadi taru kan abun nutu ngara.

³⁵ Sirŭŭn so abun anŭ nang, “Ati inŭh Anak Ku, adi mbŭh Ku mien, dingah pinganang-I!”

³⁶Kan sirŭŭn anŭ muko minyu, Jesus sadi adŭ agi diginŭ. Murid murid mating nang ani ani pasar kayuh anŭ; mating gŭh kidaan di tadŭ tadŭ daya di tipuh anŭ kayuh adi ngara ko kiris.

³⁷Andu anŭ ndi Jesus ngga taruh naan murid-I anŭ mūn sandah anŭ, ka bara daya bagŭ mandŭg bidapŭd ngga Ayŭh.

³⁸Ndi naan daya nyirais bagan so dupan bara daya bagŭ anŭ, “Gurū! Aku mite masi Mai, tingga anak ku, anak tambŭ ku!

³⁹Kan-i dog muak roh arap, ayŭh nyirŭgŭh nyirais buang nyisŭt ndŭg ka baba-i bibude. Roh anŭ adu adu pijera ayŭh ka abah-i bu so ayŭh!

⁴⁰Aku mite murid murid Mai pibu roh arap anŭ, pak ngara dŭh tungang.”

⁴¹Jesus nam, “Angān sarah buang kurang sabah! Ndŭg sinde meh Aku dŭh siŭn dŭh rŭŭ ngga angān? Ndŭg sinde Aku patut bijijŭ ngga angān?” Jadi Ayŭh nang di daya anŭ, “Taban anak mu kamati.”

⁴²Darŭm anak anŭ tudu Jesus, umot anŭ pitumbang ayŭh ka tana ka nyisŭt ayŭh. Jesus mritah roh arap anŭ da bu, pibua anak anŭ, ka nggen ayŭh pari ka sama-i.

⁴³Sopŭrŭg daya mbŭh inga inga, kiris kuasa bās Tapa. Sopŭrŭg daya gibabŭ inga inga di pingandai Jesus, darŭm Ayŭh nang di bara murid-I,

⁴⁴“Dŭhnyah kambŭt kayuh adi Aku re kidaan di angān! Anak Manusia re dog nyerah ka darŭm kuasa tangan manusia.”

⁴⁵Pak bara murid dŭh mirati pinganang anŭ. Kayuh anŭ mbŭh dog sukan so ngara isa ngara dŭh mirati-i, buang ngara taŭn mbŭh taru re siken pasar-i.

⁴⁶ Karit timbur dupan bara murid pasar asi adi bās dŭ.

⁴⁷Jesus puan pikir ngara, Ayŭh mbit ndi naan anak-sŭ, bada-i mijog sindŭk adŭp-I,

⁴⁸ ka nang di ngara, “Asi asi adi kambat anak ati ngga adŭn Ku, kambat Aku; ka asi asi adi kambat Aku, kambat Ayŭh adi bada Aku mandŭg. Amai sianŭ adi siabo sŭ dupan sopŭrŭg ngan inŭh adi siabo bās.”

⁴⁹John minyu, nang-i, “Gurū, kieh agi kiris daya pibu umot pakai adŭn Mai. Kieh nagah ayŭh sabab ayŭh dŭh so tibaran ta.”

⁵⁰“Dŭhnyah nagah ayŭh, sabab asi asi adi dŭh rawan angān agi ngga angān,” Jesus nang di ayŭh samŭn di bara murid adi bŭkŭn.

⁵¹Darŭm tipuh mbŭh dŭ dŭ sindŭk adi ngga Jesus re dog paad ka shorga, Ayŭh ndai pikir-I ka matak ka Jerusalem.

⁵²Ayŭh pait daya da panu diŭ so adŭp-I. Ngara matak ka mŭrŭt ndi kupo di Samaria di sidia tarun yŭn Jesus nyirŭmŭn.

⁵³Pak daya diginŭ dŭh an trima Ayŭh, sabab pimanu-I agi tatŭng nuju Jerusalem.

⁵⁴ Kan murid-I, James ngga John kiris kayuh mun anŭ, ngara nang, “Tuhan, bisa kieh bagan apui so shorga da mūn di pirabur ngara?”

⁵⁵Jesus bigiring ka nang ngara.[24]

⁵⁶Ripas anŭ, Jesus ngga bara murid-I panu ka kupo bŭkŭn.

⁵⁷Darŭm ngara panu, agi ndi naan daya nang di Jesus, “Aku an tunda Kaam ka barang yŭn Kaam di.”

⁵⁸Jesus nang di ayŭh, “Bisirŭh biyŭn rubang, manuk biyŭn sarin, pak Anak Manusia dŭh biyŭn tarun yŭn guring ka rŭŭ so kraja-I.”

⁵⁹Di sianŭ ndi Ayŭh nang, “Tunda Aku.” Pak daya anŭ nam, “Tuan, bada aku pari diŭ di ngubur sama ku.”

⁶⁰Jesus nam, “Tandah daya kabŭs ngubur daya adi kabŭs. Kuu di piagah agah pasar Tapa mbŭh piguru mritah.”[25]

⁶¹ Adi bŭkŭn nang, “Aku an tunda Kaam, tuan; pak bada aku mari di kidaan di rawang ku dawŭ-i.”

⁶²Jesus nang di ayŭh, “Daya adi ko na tangan-i di bajak ka ari kimat punok, dŭh-i tibirang re kinyam Pinyipritah Tapa.”[26]